LEVI 16 - AMÜSÜH HÜM CL Bible (BSI)Dünthsükhikhi Nimung 1 Aron tsührü athrürü mahnenü mümüsühkhi mo kingaünkhi hode ane Atungpuhnü asheshihshu Atungpuhnü Mosa ki tha; 2 apinü tha, “ Khide Amüsüh Dangpung ching zhinkhi khim miki kim yancho ching darü de nü khiung Aron ki thaang, tümüde ju tangzüng sangdan khidopü kumung amo ching I akhiukchoh. Apinü mihyumanisho, api asheshihbah. 3 Hanangde Aronnü amüsüh dangpung ching arübah: neak kingaünpü thsungkheak moshi nunu tüsho taka kingaünpü thsungkheak mihnupung lubah.” 4 Tüsho Atungpuhnü thsangdankhibo harü jih. Aronnü khide Amüsüh Dangpung ching müyüyide, apinü kemüyihjungbeah tüsho amükeamrü khimmih yihbeah; shulünkhim zhingzhing tüsho khimmih akhihkhihbo, pangrümbe, tüsho kuhingbe lubeah. 5 Israel trüknü Aron kilim mihnupung mahne neak kingaünpü tüsho namfimihnupung khülang taka kingaünpü jihbah. 6 Apinü anihbuh tüsho yamkhün neak dünthsükhipü moshipung khülang jihbah. 7 Tüsho apinü Atungpuh shorupung khimyam ripit ki mihnu mahne lubah ayübah. 8 Jude thsah Aronnü mihnu mahne kheak azan thsübah: Khülang Atungpuh thsungkheak tüsho püpü ju Azazel thsungkheak. 9 Atungpuh thsungkheak azankhi mihnu ju Aronnü Atungpuh kilim neak kingaün jihbah; 10 tüsho Azazel jihpü zan thsükhi mihnu ju arhangnü Atungpuh kilim jihbah tüsho mihtsürübo neak dünthsükhide sunglo ching Azazel kilim dükhea tsoshihbah. 11 Küyimki Aronnü api tüsho ayamkhün thsungkheak moshipung arü neak dünthsükhipü laksah-a neak kingaün jihbanü, 12 apinü Atungpuh miki kingaün sadam kheaknü mo takpung ching mokhih zahde alubah tüsho tsüde anitkhi rhümthüneabe müyikhüh lubah Amüsüh Dangpung ki arübah. 13 Apinü Atungpuh miki rhümthüneabe ju mo kheak yihkihbah, tüsho rhümthüneabe takkhi mokhühnü tangzüng sangdan khidopü liudobah, jude athsükhinü apinü ju müngü tüsho müshe. 14 Apinü moshipung thiyih anükhüh lubah tüsho akhidopü tsülimpeang ayingkhingnü arhakkihbah; tüsho apinü tangzüng sangdan mikhuh ki thüne ki rhaka bahbah. 15 Jushu apinü mihtsürübo thsungkheak neak kingaünpü mihnu laksahbah, tüsho khim zhindokhi khüp athiyih handarübah, tüsho moshi thiyih rhaka bahkhi ruk, akhidopü kheak tüsho tangzüng sangdan mikhuh ching rhaka bahbah. 16 Hanangde apinü Israel mihtsürü mümüsühkhi tüsho arü neak chingnü amüsüh dangpung dünthsükhibah, junangde apinü arü mümüsühkhi bolung ching lakhi ashorupung khimyam thsungkheak rhimobah. 17 Aronnü api, ayamkhün tüsho Israel amukhungrü alala thsungkheak dünthsükhipü amüsüh dangpung ching yüzahbah makhiukloyi khiungde sheshe ashorupung khimyam ching müla. 18 Tüsho apinü Atungpuh miki lakhi kingaün sadam ki wukhiukbah ju thsungkheak dünthsükhibah, tüsho moshi le mihnu thiyih khürü lubah kingaün sadam juhbo kheak yihkihbah. 19 Ayingkhing kheaknü athiyih khürü kingaünpung kheak thüne ki rhakkihbah. Hanangde apinü Israel mihtsürübo neak chingnü throde müsühkhitbah. Dünthsükhikhi Mihnu 20 Küyimki apinü amüsüh dangpung, ashorupung khimyam tüsho kingaünpung müsühkhitpü rhimo banbanü, apinü rhangdung lakhi mihnu handarübah. 21 Apinü akhah ane chido mihnu ku kheak nimde Israel tsührünü ayihbeakkhi amülim alala, azhihde thiyuzüng thsümünimkhi alala, tüsho arü neak thsükhibah, tüsho akhukhita lubuhnü mihnu bebah yünü sunglo ching dükhebah. 22 Mihnunü arü neak alala hanbah mihtsürü mülapung, sunglo ching mihnu ju dükhea tsoshihbah. 23 Aronnü amüsüh dangpung ching yüki yihkhi amükeamrü khimmih yihbah ashorupung khimyam ching yüzahbah, tüsho jurübo ju kheak zojihbah; 24 tüsho apinü amüsüh dangpung ching junü kemüyihbah nihbuh khimmih yih-a lubah. Jushu apinü anihbuh neak tüsho mihtsürübo neak dünthsükhipü wukhiukbah taka kingaünkhi jihbah. 25 Tüsho neak kingaünbe amüdang ju apinü kingaün sadam kheak takbah. 26 Tüsho Azazel kilim mihnu dükhea yüshihbuhnü akhimmih müsühbah tüsho pang müyihbah, jushu lang api binpung ching azahlopü kuklah. 27 Neak kingaünpü lukhi moshi tüsho mihnu thiyih neak dünthsükhipü amüsüh dangpung ching lude ayüzahkhi ju, binkheampung aleanglim hande awukhiukbah tüsho atakbah. Aküp, ayin, tüsho bukningbo alala takabahbah. 28 Shepünü jurü takbanü akhimmihbo müsühbah tüsho kemüyihabahbah, jushu lang api binpung ching azahlopü kuklah. Dünthsükhikhi Nimung Arüngkhi 29 Ha nüsa thsungkheak lünnü thiyuzüng thsübah: Khinu thüne nimung athürü nipü nüsa Israelrü tüsho nüsa lung lakhi khiungkerübonü khümkeak thsübeah tüsho tümü she mürhimobeah. 30 Tümüde ha nimung amükeambuhnü nüsa neak dünthsükhijihbah, junangde Atungpuh miki nüsa neak alala chingnü amüsüh labah. 31 Ha nüsa thsungkheaknü sühakhim amunimung tüsho nüsanü khümkeak thsübeah. Ha kamruhroro thsungkheak yakzan thsükhi lah. 32 Anihbuh abuh müthri amükeamrü thsüpü mujudemüsühkhitkhinü amüsüh amükeamrü khim yihbah dünthsükhibah. 33 Tüsho apinü amüsüh dangpung, Atungpuh shorupung khimyam, kingaünpung, amükeamrübo, tüsho Israel mihtsürü amukhungrü alala thsungkheak dünthsükhibah. 34 Ha kam ching khülang ki Israel neak dünthsükhipü nüsa thsungkheaknü kamruhroro yakzan thsükhi lah. Tüsho Atungpuhnü api ki thiyukhüm jihkhi nangde Mosanü rhimo. |
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.
Bible Society of India