LEVI 11 - AMÜSÜH HÜM CL Bible (BSI)

Atsühbe le Amütsühbe Shiwühbo

¹ Tüsho Atungpuhnü Mosa le Aron büne ki tha,

² Israel tsührübo ki thaang, Alomi ching lakhi shiwühbo lung nüsanü atsühpü shiwühbo ju:

³ shiwüh bolung abiuo dübeakkhi tüsho mukhiuhkhitloa müjakkhi mungjibo, nüsanü atsühpü kuklah.

⁴ Judüalalashe mukhiuhkhitloa müjakkhi yungsho abiuo dübeakkhi bolung nüsanü harü dütsüh: kemel, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh.

⁵ Loyeak, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh.

⁶ Ayipungshih, tümüde apinü mukhiuhkhitloa müjakchoh tüshe abiuo müdübeak, ju nüsa thsungkheaknü mümüsüh.

⁷ Tüsho kheaknu, tümüde abiuo dübeaklah tüshe apinü mukhiuhkhitloa mümüjak, ju nüsa thsungkheaknü mümüsüh.

⁸ Jurü shih nüsanü dütsüh yungsho nüsanü ashemi kheak she düqiu; jurübo nüsa thsungkheaknü mümüsüh.

⁹ Nüsanü ke ching lakhi thüngüh aghi tüsho aphülap kihkhi–ketobo yungsho ayungbo ching lakhi athrünkhi tsühpü kuklah.

¹⁰ Tüshe ketobo yungsho ayungbo ching lakhi lorilokobo tümüshe aghi tüsho aküp mükihkhibo nüsanü mütsühbeah.

¹¹ Hadürü lorilokobo nüsanü mümüsühkhi khebeah. Nüsanü jurü shih dütsüh yungsho ashemibo she düqiu.

¹² Nüsanü ke ching tümüshe aghi tüsho aphülap mükihkhi dütsüh.

¹³ Nüsanü wuhnu harü athraneanbebo dütsüh: müleang, müleangtopü, ke-müleang,

¹⁴ arilupü, müleangmuchu,

¹⁵ khüyak mungjibo,

¹⁶ kewühtopü,

¹⁷ lungru, thüngüh tsühbe lungru, lungrutopü,

¹⁸ kewunu, loshelungru, merham,

¹⁹ kewuhnu, kewüh mungjibo, asherü-wuhnu, tüsho phihnuliplip.

²⁰ Aghi kihbe lorilokobo ajing phüyinü abübe alala nüsa thsungkheaknü mümüsüh.

²¹ Tüshe aghi kihbe loriloko ajing kihbah alo kheak jukde atsahbe nüsanü atsühpü kuklah.

²² Nüsanü harü tsühpü kuklah: tangkho mungjibo, muthsutangkho mungjibo, jerepung mungjibo, tüsho müngrhüh tangkho mungjibo.

²³ Tüshe aghi kihbe lorilokobo ajing phüyi kihkhi nüsa thsungkheaknü mümüsüh.

Mümüsühkhi Shiwühbo

²⁴ Tüsho hade athsükhinü nüsa mümüsühde akambah; sherünü loriloko ashemibo qiubanü arelim khiungde mümüsüh.

²⁵ Tüsho sherünü jurü ashemibo khürü lang she ahanbanü apinü nihbuh khimmih müsühbah tüsho arelim khiungde mümüsühkhi labah.

²⁶ Shiwüh abiuo dübeaka lah tüshe tsüde müdübeakkhi yungsho mukhiuhkhita mümüjakkhibo nüsa thsungkheaknü mümüsüh; sherübonü harü qiubanü mümüsühde akambah.

²⁷ Tüsho shiwühbo ajing phüyi kihbah jinglungnü atsahkhibo nüsa thsungkheaknü mümüsüh; sherünü ju ashemi qiubanü arelim khiungde mümüsühkhi labah,

²⁸ tüsho shepünü ashemi ju ahanbanü akhimmih müsühbah tüsho arelim khiungde mümüsühkhi labah, jurübo nüsa thsungkheaknü mümüsüh.

²⁹ Tüsho harü alo kheak abüde atsahbe lorilokobo nüsa thsungkheaknü mümüsüh: udung, phihnu, chimutrungtopü mungjibo,

³⁰ thüyam chimutrung, münto-chimutrung, loyichimutrung, yakmüthrichimutrung.

³¹ Loriloko alala bolungnü harü nüsa thsungkheaknü mümüsüh; sherünü jurü ashemi kheak qiubanü arelim khiungde mümüsüh.

³² Judürü ashemi tümükhüh kheak lang she keamkihsho ju mümüsühde akambah, ju sang kukruk, khimmih, shihküp, yungsho shungliukhim thsüala, yihnübe kukruk tümütümü thsüthsü she ke ching thsambeah, tüsho arelim khiungde mümüsühde alabah; jushu müsühde akambah.

³³ Tüsho ashemi ju alo phüh kheak keamsho, ju ching zahkhi abümnü mümüsühde akambah, tüsho nüsanü phüh ju yihrüpabahbeah.

³⁴ Atsühbe tsühyungpü khürü kheak ha phüh ching yo kenü pangsho, ju mümüsühde akambah, tüsho ha phüh ching yo ayungbe tümütümü she mümüsühkhi labah.

³⁵ Tüsho ashemi tümükhüh kheak lang she keamkihsho ju mümüsüh; yinchikuk yungsho mophüh thsüthsü, ju yihthünaka bahang, jurübo mümüsüh, tüsho jurübo nüsa thsungkheaknü mümüsüh,

³⁶ tüshe kekhip yungsho kesopung a müsühlah; tütüshe tümütümü she ashemi kheak qiukhi a mümüsüh.

³⁷ Tüsho ju ayangpü lakhi müjih kheak keamsho, ju a müsühlah,

³⁸ tüshe kenü müjih kheak pangsho tüsho ashemi ju kheak keamsho, müjih ju mümüsüh.

³⁹ Nüsanü atsühbe shiwüh khürü shebahle, khürünü ashemi qiusho arelim khiungde mümüsühde akambah,

⁴⁰ tüsho khürünü ashekhi shih ju tsühsho, apinü akhimmih müsühbeah, tüshe api arelim khiungde mümüsüh; khürünü ashemi hansho khimmih müsühabahbeah, tüshe api arelim khiungde mümüsühkhi labah.

⁴¹ Alo kheak abüde atsahbe loriloko alala athraneanbe ah; jurübo mümüsüh.

⁴² Buknü chinde atsahkhi thsüala, yungsho ajing phüyi yungsho ahihkhüh kihbah atsahkhi thsüala, jurü mütsühbeah; tümüde nüsa thsungkheaknü jurübo athraneanbe.

⁴³ Abüde atsahbe lorilokobo hode nüsa zangrü athraneanbe dükam; nüsanü harü hode zangrü müneana lude mümüsühkhi dükam.

⁴⁴ Tümüyungde I Atungpuh nüsa Thrünpuh ah; jumonü nüsabo müsühkhitang, tüsho müsühde laang, tümütüsho I amüsüh ah. Alo kheak abüde atsahbe lorilokobo dünkheaknü müneana dulu.

⁴⁵ Tümüyungde I nüsa Thrünpuh thsüpü thsüde, nüsa Ijip lo chingnü bekhitbuh Atungpuh ah; jumonü nüsa müsühde laang, tümütüsho I amüsüh ah.

⁴⁶ Jumonü, ha rhangdung lakhi shiwühbo tüsho wuhnubo, ke ching labe alala, tüsho alo kheak tsahbe alala dünkheaknü yakzan ah.

⁴⁷ Nüsanü amüsüh le amümüsüh dükeak, tüsho atsühbe rhangdung lakhi shiwüh le amütsühbe rhangdung lakhi dükeak shihcham thsübeah.