LEVI 1 - AMÜSÜH HÜM CL Bible (BSI)

Taka Kingaünkhi

¹ Atungpuhnü Mosa ji tüsho ashorupung khimyam chingnü tha:

² Israel mihtsürübo ki thaang: Küyimki nüsa khürünü Atungpuh kilim akam-shiwüh chingnü kingaün jihbanü, nüsanü kingaün ju moshi yungsho mihnu bolungnü jihang.

³ Apinü ajihkhi shiwüh ju taka kingaünpü thsüsho, apinü lapha mükihkhi pung handarübeah. Ju Atungpuhnü leangkhikhukpü thsüde Atungpuh shorupung khimyam lunglim yüzah limro zoshang.

⁴ Apinü taka kingaünkhi ku kheak akhah nimbah, tüsho api neak thsükhiabahkhi kingaün dün leangkhibah.

⁵ Atungpuh miki apinü shiwüh pung ju alaksahbah, tüsho Aron tsührü amükeamrübonü thiyih lubah ayübah, tüsho kingaün sadam khuh phüyi tüsho khimyam lunglim yüzah limrobo kheak rhakkihbah.

⁶ Tüsho apinü shih ju aküp khuka bahbah akhapthünakbah,

⁷ tüsho Aron tsührü amükeamrübonü atakbe sang tsanglunga kingaün sadam kheak zobah mo thsahkihbah.

⁸ Arünü shih khapthünakkhi düdrebo, aku tüsho amüdang mo ching yuka takbah;

⁹ tüshe bukningbo le ajingbo apinü kenü müsühabahbeah. Tüsho amükeamrünü ju alala Atungpuh asühshihpü kingaün sadam kheaknü arhümthüneade atakbah.

¹⁰ Mürangkhüh mihtsürü khülangnü namfimihnubo yungsho mihnubo lungnü taka kingaünkhi jihsho, ju lapha mükihkhi pung thsübeah:

¹¹ Apinü ju kingaünpung akulimpeangnü alaksahbah, tüsho Aron tsührü amükeamrübonü kingaünpung khuh phüyi ching athiyih rhakkihbah.

¹² Apinü ju khapthünakshu amükeambuhnü aku tüsho amüdang lua kingaünpung mo takkhi kheak akhinashu thsüde azobah;

¹³ tüshe apinü bukning le jingkhahbo kenü amüsühbah, tüsho amükeambuhnü alala lua kingaünpung kheak Atungpuh ki taka kingaün jihbah. Ha taka kingaünkhi rhümnü Atungpuh asühshihchoh.

¹⁴ Atungpuh kilim taka kingaünpü ju wuhnu thsüsho, müthrithrümpü yungsho chithüreku nunu thsübeah.

¹⁵ Amükeambuhnü ju handarübah aku rhoshaka kingaünpung kheak takbah, tüsho athiyih kingaünpung yean dungkihbah.

¹⁶ Apinü ahidram yihkhitbah tüsho anambo she rukkhia kingaünpung aniakhiuklim awah lapung bahbah.

¹⁷ Apinü muthokhitshihde aghidükeangne kheak tholobah apang ju athorüpbah, tüsho alala kingaünpung sang kheak takbah. Ha taka kingaünkhi rhümnü Atungpuh asühshihchoh.