KOLOSI 4 - AMÜSÜH HÜM CL Bible (BSI)

¹ Aputungrübo, nüsa she yinmi ching Aputungrü khülang lah de mükheahbah nüsa yamlarübo ki alungkinü tüsho tsüde mütrüang.

Thsangdankhibo

² Makshe jihkhi ching kurhangde, müdüchingde tamkhüntamnüpü ching düküngang;

³ I küpü dünkheak rihyam ching la, Khrista aramyu khipkhitpü thiyusheak thsungkheak Thrünpuhnü ripit khimshuhpü isa thsungkheak she tamkhüntamnüjang,

⁴ junangde inü athapü lümkhi nangde ju mütsanmükhia jihbah.

⁵ Nü kim tsüde ahoride, amükinrü ki lümlung lade rhimoang.

⁶ Nü yu thakhi kamruhroro amuzho lade tüsho thiyu-kede laang, junangde mihbüm aban ki küde alobeanü nünü amükheahbah.

Akheam Salüm

⁷ I rhimo alala dünkheak Tykikanü nüsa ki thabah; api ju amuzhokhi keoniorü, thiyuro tankihrü tüsho Atungpuh lung rukhüh tankihrü ah.

⁸ Inü ha thsungkheaknü api nüsa kilim thiyichoh, junangde isa künangde lanü nüsanü amükheahbah tüsho apinü nüsa mulong toshihbah.

⁹ Tüsho api lung thiyuro lakhi tüsho amuzhokhi keoniorü, nüsa borü Onesima arüchoh. Ha ching dünjikhi lüpdükhi anenü nüsa ki thabah.

¹⁰ I lung rihyam ching lakhi Aristarka tüsho Barnaba phüle Marknü nüsa kilim salüm mühahchoh (Mk dünkheak küde arhimobeanü nüsanü thsangdan ludüle, api nüsa kilim arüsho beyukang),

¹¹ tüsho Justa de ajikhi Jisunü she salüm mühahchoh. Thrünpuh kiulongthsü thsungkheak rukhüh rhimorü bolung harü lang tsütabahkhi mihtsürübo ah, tüsho arü ju I mulong shukheam khülang lakheah.

¹² Nüsa borü, Jisu Khrista yamlarü Epaphranü nüsa kilim salüm jihchoh. Nüsanü Thrünpuh lümkhi ching yeanzamde azhippü tüsho khiukdahkhi mütsanpü thsüde apinü kamruhroro nüsa thsungkheak tamkhüntamnü ching keokhide lümkhitjihchoh.

¹³ Tümüde apinü nüsa le Laodikea tüsho Hierapoli ching larü thsungkheak mürangde rhimodo de inü api thiyumütsan thsüchoh.

¹⁴ Molimükheahbuh amuzho Luk tüsho Demanü nüsa kilim salüm jihchoh.

¹⁵ Laodikea ching larü keoniorübo, tüsho Nympha le anihbe yam ching borü ki I yo salüm thajang.

¹⁶ Tüsho küyimki ha kihüm nüsa bolung khebanü, Laodikea arüngyam ching she kheang; tüsho nüsanü Laodikearü kihüm she kheang.

¹⁷ Tüsho Arkeppa ki thaang, “Atungpuh tankihpü ching nü kilim jihkhi rhimo akuk ngüpü thsang.”

¹⁸ I Paul, ha salüm I khahnü thrütchoh. I rihyam ching lakhi lümkhitjang. Nüsa lung amüthsüm laang.