KOLOSI 2 - AMÜSÜH HÜM CL Bible (BSI)

¹ Nüsa tüsho Laodikea ching larü le I miro müngürü alala thsungkheak inü küdükhüh tode mürangchonü nüsanü mükheahshihnelah,

² junangde dükde anikhitkhi lakhitbo tüsho Thrünpuh mükheahmudu aramyu, Khrista lapü arü amuzho ching rukhüh kamkhinü arü mulong toshihbah.

³ Api kheak lümlung tüsho mükheahmudu rahpung alala rama lah.

⁴ Shenü she thiyu akenü nüsa mümülapyukshihpü inü ha thachoh.

⁵ Tümütüsho pangnü I mülalashe, me ching I nüsa lung lade, nüsa tsüde alakhi tüsho Khrista ching nüsa akin düküngkhi asühde kheahchoh.

Khrista ching Suhdahkhi Rhangdung

⁶ Jumonü nüsanü Atungpuh Jisu Khrista leangkhiang, junangde api kheak laang,

⁷ aying chinyukde api kheak thrünkihde tüsho akin ching düküngde nüsa ki thsangyukhi nangde makshe jihkhi ching suhdahde laang.

⁸ Khrista yungde mihtsürü lalim tüsho alomiküp yuzüng yande lümlung-yu akeangkeang tüsho mülapyukbe hode shenü she nüsa mümünityukpü kümkangang.

⁹ Tümüde api kheak abanathsangkhi Thrünpuh pangnü lachoh,

¹⁰ tüsho thiyuzüng le thiyukhüm-sühmüh alala kurung aku labuh kheak nüsa rhangdung abanathsangkhi kamdo.

¹¹ Shih pang chingnü zuzu kamshihde Jisunü tsütabahkhi hode, khah mübede api lung nüsa tsütabah;

¹² tüsho baptikhi ching nüsa api lung kiuyuka bah, ju ching api ashe chingnü arhang kamloshihbuh Thrünpuh rhimo akin hode api lung nüsa she arhang kamloshih.

¹³ Tüsho nüsa sherü neak tüsho shih tsütamübahkhi ching shea lakhea, Thrünpuhnü isa neakbo alala bahjihde api lung arhang lashih;

¹⁴ isa mayede, isa azhihde thrüta lakhi yuzüngbo apinü nankhita bahjih; apinü ju sangkim kheak yümkihde lubah tsoabah.

¹⁵ Wubo tüsho thiyukhüm-sühmühbo kheamshihde, apinü sangkimnü jurü kurungkheak akuk ngüde botonü kheahshih.

¹⁶ Jumonü atsühpü tüsho ayungpü yungsho thünio le khinu aso yungsho amuni dünkheak keokhikhibo ching shenü she nüsa kheak thiyudükhapshih.

¹⁷ Harü ha arüpü lakhi alamme khülang lang ah; tüshe atsütsü jua Khrista ah.

¹⁸ Michihbo, arükchih azhihayih tüsho yunirübo kingaünkhi hode ato khea lurünü nüsa dübahyukshih. Tümü amütsan mülade, hadürü mihtsürü nihbuh lümkhinü sheak dükipchoh

¹⁹ tüsho Thrünpuhnü azoshihkhi pang abümnü, amüchinbo tüsho sühbonü tholobah alakhi yo aku kheak düküngde mutholo.

Khrista Lung Shekhi tüsho Alakhi

²⁰ Khrista lung nüsa ha lomi yakliyakko ching shekheasho, nüsanü tümüde kheakü khiungde alomi yo nangde lacho le? Tümüde nüsanü hadürü yuzüngbo anicho,

²¹ “Ha dürhimo, ha düthsüakheah, ha düqiu”?

²² Rhimode harü alala dükheakpü thsülah, tümütüsho jurübo mihtsürü yukhüm tüsho thsangyukhibo kheak ningkihlah.

²³ Harü yuzüngbo ju arünü arochihde yunirübo kingaünkhi, arükchih azhihayih, tüsho pang thsümünimkhi ching a lümlung kheak ningkihkhi nangde lah, tüshe shihnü akünkhi danyukpü ching a tümü adungto müla.