KOLOSI 1 - AMÜSÜH HÜM CL Bible (BSI)

¹ Thrünpuh lümkhi hode, Jisu Khrista amüsüh-thsangyurü Paul tüsho isa keoniorü Timothi kilimnü,

² Kolosi ching amüsührü tüsho Khrista ching thiyuro larü keoniorübo kilim: Isa Abuh Thrünpuh kilimnü nüsa kilim amüthsüm tüsho mungtsü laang.

Makshe Jihkhi Tamkhüntamnü

³ Küyimki isanü nüsa thsungkheak tamkhüntamnübanü kamruhroro isa Atungpuh Jisu Khrista ki makshe jihchoh,

⁴ tümütüsho Jisu Khrista ching nüsa akin tüsho amüsührü alala thsungkheak nüsa amuzho lakhi isanü sodo,

⁵ thiyuro thiyusheak-atsü yu ching nüsanü akhuhlim sokhi yinmi ching nüsa thsungkheak zojihkhi mulonglam dünkheaknü,

⁶ alomi alala ching lakhi nangde, küpü nüsa kilim arükhea, tüsho nüsanü asokhi nimungnü nüsa bolung lakhi tüsho Thrünpuh amüthsüm thiyuro ching zokhi nangde;

⁷ nüsa thsung thsüde thiyuro lakhi Khrista tankihrü isanü amuzhokhi yamlarü Epaphra kheaknü nüsanü asokhi nangde,

⁸ apinü Me ching nüsa amuzho isa ki she thaa huh.

⁹ Jumonü isanü ju sokhi nimungnü, me lümlung tüsho anikhitkhi alala ching api lümkhi mükheahmudunü nüsa mide akampü keokhide nüsa thsungkheak tamkhüntamnüpü isanü anüzhak müthsü,

¹⁰ Atungpuh ki athülün rhangdung lapü, api tsüde asühshihpü, rhimo atsü aban ching aso asoshihpü tüsho Thrünpuh mükheahkhi ching rünkihpü lah.

¹¹ Api müretah sühmüh yande, rünkhiungpü tüsho asühachih arümkheam alala thsungkheak wu alalanü nüsa reangzahshang,

¹² ayinatrüm ching amüsührü yamrüplurüp shihcham ching isa thülünde kamshihbuh, Abuh ki makshe jihde laang.

¹³ Apinü amiting yakzan shuhkhi chingnü isa bekhit tüsho apinü muzhokhi tsührü kiulongthsü ching beakhinjih,

¹⁴ api hode isa rhokhitkhi, neak bahjihkhi lah.

Khrista Mihtsürü tüsho Rhimo

¹⁵ Api ju amüngübe Thrünpuh mejak, thrüna lakhi alala kheaknü adüjibuh ah;

¹⁶ tümüde api hode alala thrün: Yinmi ching tüsho alomi kheak angübe tüsho amüngübe, kiulongthsü-binkiubo yungsho wubo yungsho yakzanshuhrübo yungsho thiyukhüm-sühmühbo; alala api hode tüsho api thsungkheak thrün.

¹⁷ Alala müngühnü api lah, tüsho alala api kheak zamrulah.

¹⁸ Api ju borü, pang yo aku ah; api ju atankih, asherü bolungnü adüjibuh, junangde lüpdükhi ching apinü kihokhi labah.

¹⁹ Tümüde api kheak Thrünpuh khiukdahkhi alala lapü asüh,

²⁰ tüsho alomi kheak yungsho yinmi ching thsüthsü, api sangkim thiyihnü mungtsü thsüde api hode anihbuh kheak tsüarihlo.

²¹ Tüsho nüsa sherü khülangki limshude tüsho amütsü rhimode lüm ching thiriri lakhea,

²² api miki nüsa amüsüh, areak mükihde tüsho amülim mülashihpü thsüde api shekhi hode apang ching kheakü apinü tsüarihlodo.

²³ Judüalalashe, nüsanü akin düküngkhi ching mutukzhakde tüsho mütsanmükhi khimtan labeah, tüsho nüsanü thiyusheak-atsü sobah alü thsükhi I mulonglam chingnü nüsa matrütshihbeah. I Paul, alomiküp ching alala ki thsangyuthsangrakhi ha thiyusheak-atsü tankihrü kamkheah.

Borü thsungkheak Paul Rhimo

²⁴ Kheakü nüsa dünkheak thsünükhi ching I asühchoh, tüsho Khristanü api pang, ju borü dünkheak thsünükhi ching mübanthsangkhi I shih ching inü banthsangshihchoh.

²⁵ Tüsho nüsa tsüpü thsungkheak ha rhimo I kilim jihbuh Thrünpuhnü I borü tankihrü kamshih. Ha suhdahde api yusheak zhiyukpü rhimo,

²⁶ ahokhi lünbo alala ching mihtsürü alala kheaknü rama lakheah tüshe kheakü amüsührü ki amikheak akhiukshihdo.

²⁷ Nüsa kheak lakhi Khrista, müretah mulonglam, ha aramyu müretah lakhit khiungkerü bolung mükheahshihpü Thrünpuhnü arü ki mulongkhit.

²⁸ Isanü mihtsürü aban Khrista ching khiukdahkhi kamshihpü mihtsürü aban lümlung alala ching dande thsangyuchoh.

²⁹ Khristanü ajihkhi sühmüh tüsho I kheak rhimode alakhinü inü ha rhimochoh tüsho mürangchoh.