KHÜNBOLUNGKHÜN 8 - AMÜSÜH HÜM CL Bible (BSI)

¹ Nü a I khiung thsükhülaa, I be niuh duhde mütrükhi thsükhülaa! Inü nü wungdo ching shorukhülaa, inü nü müthsüpa labah, tüsho shenü I mükhenojih.

² Inü nü bebah tüsho I be yam ching, I zübepung khiungshak ching yüzahbah. Inü rhümthüneabe yukhu ayungpü, tsarümkiu ke nü kilim jihbah.

³ O api khah huzulim I ku khüp lakhülaa, tüsho api khah tsülimnü I kapkhülaa!

⁴ Inü nüsa ki thachoh, O Jirusalem tsührü liberübo, müthsakhamyi khiungde amuzho dürhumusu yungsho düyihmusu!

Thurukpü Khün Aliberübo

⁵ Sunglo chingnü anihbe müyambuh kheak angükihbah atucho ju shepü a? Nü zübepung, mukhiuk dung khüp inü nü yihmusukheah.

Alibe

⁶ I nü mulong kheak yümkihkhi nangde, nü bin kheak yümkihkhi nangde zoang; tümüde amuzho ju ashebe nangde müranglah, mükthsükhi kiuyuk nangde bukakhiukkhi lah. Atrukhi ju, mo trukhi, momulo nangde lah.

⁷ Ke ahihdonü amuzho kethürimürikhuk, düchibonü ju zünde mutsokhuk. Khürünü nihbuh yam lakhit amuzho thsungkheak jihkhülaa, api shahde mükheyukde alabah.

Alibe Khiungmungrübo

⁸ Isa niurü akheambe lah, tüsho anihbe niuh mütoyi. Anihbe keokhi nimung ching isanü niurü thsungkheak tümü rhimoba?

⁹ Anihbe rhü khülang thsükhülaa, isanü alibe kheak shotoyinchi rünchang thsükihbah; anihbe khimdopü thsükhülaa, isanü cedar sangbeaknü alibe yihdobah.

Alibe

¹⁰ I rhü khülang ruk ah, tüsho niuhbo rünchang nangde lah; tüsho I api mük ki reangkeamkhi hande arürü nangde lah.

Athrüpü

¹¹ Baal-hamon ching Solomon kurungasolu khülang lah; api kurungasolu ju akümrübo kilim müchejihdo; mihbüm abannü shotoyinchi nak 1000 jihchoh.

¹² I yo kurungasolu, I yo khung ju I thsungkheak lah; nü, O Solomon, nü a 1000 lah, tüsho sangaso kümrübo 200 lah!

¹³ O nü shepü shahwünbo ching la, I müyamrübonü nü düsheak sopü aleanglah; inü ju soanü.

Alibe

¹⁴ Niokheamang, I tsübuh tüsho rhümthüneabe wungbo kheak rimsung nangde yungsho shahyih nunu nangde thsang!