KHÜNBOLUNGKHÜN 7 - AMÜSÜH HÜM CL Bible (BSI)

¹ Jingkhümpübo ching nü jing küdükhüh she akhamla, O kiulongthsüberü anünürü! Nü pho thulungkhi ju mürelungbo, thsüsonungnürü khahyo nangde lah.

² Nü phülekhuh ju rhümthüneabe thsürukhi yukhu makeangde azahkhi phurusük lah. Nü chim ju wheat hi mujung nangde, thrilung sangbünbonü mükamdobah lah.

³ Nü niuh mahne ju shihmüchi nunu mahne, rimsung mahne ruk ah.

⁴ Nü hung thsotorü rünchang nangde lah. Nü mükjibo Heshbon ching kekungbo, Bath-rabbim ripit ki lakhi nangde lah. Nü nupung ju Damaska lim chinzhinpung Lebanon rünchang nangde lah.

⁵ Nü ku thrankhi Karmel wung nangde, tüsho nü kuyü leamkhi mürümmüri zhingzhing nangde; kuyü thsünkhi ching kiulongthsüpuh tholochoh.

⁶ Küdükhüh nü tsüla tüsho jak tsüla, O amuzho, asühpü anünürü!

⁷ Nü a ashidung nangde, tüsho nü niuhbo adüchi nangde lah.

⁸ Ashidung kheak künkihbah de inü thachoh tüsho akhahbo kheak ramlobah. O, nü niuhbo kurungaso düchi nangde, tüsho nü sheak rhüm mukhiuk nangde,

⁹ tüsho nü mün müthsüpkhi yukhu atsüdak nangde thsang. Yukhu ju I tsübuh kilim langde, münküp tüsho hü kheak bukde yükishang.

Alibe

¹⁰ I a I tsübuh yo, tüsho api künkhi I kilim lah.

¹¹ Arang, I tsübuh, ike mükeak ching yüanü, tüsho kiulongbo ching binanü;

¹² Ike yapsu mükikde kurungasolubo ching yüanü, tüsho kurungasobo duduhkhi, kurungasobo pungkhi tüsho tsarümkiu pungkhi kheahanü. Ju ching inü I muzho nü kilim jihbah.

¹³ Mandrak wophüyakbonü arhüm thüneashihchoh, tüsho ike khimdopübo ki amokhitkhi sangasobo, aso le awün chido lah, küpü inü nü thsungkheak zojihkhea, O I tsübuh.