KHÜNBOLUNGKHÜN 5 - AMÜSÜH HÜM CL Bible (BSI)

¹ Inü I wündo ching arüchoh, I tsübe, I yamkhünbe; inü I yo rhümthüneabe ju thüneathürabe lung lumukhungchoh, inü I mukhukerüp tüsho mukhuke tsühchoh, inü I niuhke tüsho I yukhu yungchoh. Tsühang, müyamrübo, yungang, tüsho amuzhonü müshangang.

Aliberübo Phüyipü Khün Alibe

² I yapdo, tüshe I mulong arhang lakheah. Aniang! I tsübuhnü thrungchoh. “ I ki khimshuhjang, I tsübe, inü muzhobe, I yo müthrithrümpü, khiukdahbe; tümüde ayinkenü I ku chimkhita lah, azhing ching atsamkhinü I kuyü japjaplah.”

Athrüpü Alibe

³ Inü I khimmih khukkhitdo; küde thsah inü ju yihlokhukpü? Inü I jing müsühdo, küde thsah inü alo müneanpü?

⁴ I tsübuhnü khimdopü rihbe ching akhah chungyuk, tüsho I mulongnü api künsahde kam.

⁵ Inü I tsübuh thsungkheak khimshuhjihpü wusu, tüsho I khahbo kheaknü jinjinlak atsamkhi, I yingkhingbo kheak jinjinlak kenü akhrihbe sang kheak pang.

⁶ Inü I tsübuh ki khimshuhjih, tüshe I tsübuhnü rholo tüsho tsoabah. Apinü asukchoki I mulongnü api kilim wukhiuk. Inü api yim, tüshe api müngü; inü api ji, tüshe apinü tümü malo.

⁷ Kiuto mükamde aheangrübonü I ngü; arünü I lak, tüsho I yurijih, chipi aheangrübonü I khimmihbo lude tso.

⁸ Inü thachoh, O Jirusalem tsührü liberübo, nüsanü I tsübuh ngüsho, I a muzhoachih tukthsülah de api ki thaang.

Aliberübo

⁹ O aliberübo lung atsüdakbe, nü tsübuh ju püpürü müyamrü kheaknü tümü büthsü la? Nünü isa ki thapü thsüde nü tsübuh ju püpürü müyamrü kheaknü tümü büthsü la?

Alibe

¹⁰ I tsübuh a müyelah tüsho mürümmürido lah, chithürü bolung khülang ah.

¹¹ Api ku ju suna müthsün; api kuyü duphungbo zhokhilah, khüyak nangde müraklah.

¹² Api mükjibo keyung miki, niuhkenü müsühbah azhipkhi müthrithrümpü nangde lah.

¹³ Api ngobo ju thüneathürabe shahwünbo nangde, arhüm thüneade akhiukchoh. Api münküpbo thrilung sangbünbo, jinjinlak ke tsangkhitkhi nangde lah.

¹⁴ Api binbo mürelung yihkihkhi suna mükambo lah. Api pang thsotorünü thsülah, shotolung-bluknü lüpdolah.

¹⁵ Api jingbo lungmüye dungjingbo, suna müchinbo kheak lah. Api akheahpü ju Lebanon, amokhitkhi cedar nangde lah.

¹⁶ Api yu thakhi khide niunglah, tüsho api a alala tsülah. Ha I tsübuh tüsho api I müyambuh, O Jirusalem tsührü liberübo.