KHÜNBOLUNGKHÜN 4 - AMÜSÜH HÜM CL Bible (BSI)

¹ Nü küdükhüh she jak atsü, I tsübe, küdükhüh khide jak atsü! Amuhiudokhi khüp nü mük ju müthrithrümpü mük ruk lah. Nü kuyü ju mihnu boto Gilead düpheak yükikhi nangde lah.

² Nü hübo anam-hütkhi namfimihnu boto kemüyihkhi chingnü atukhi ruk ah, alala atrurü lah, tüsho arü bolung sheshe langzü müla.

³ Nü münküpbo aneakrüm hing nangde lah, tüsho nü mün tsülah. Muhiudokhi khüp nü ngobo tsarümkiu tsankhüh ruk ah.

⁴ Nü hung ju David aheangsadam nangde lah, mükamde shahshah thsülah; ju kheak thirithsürü tsungbo nangde tsungnini chithürü zhinlah.

⁵ Nü niuh mahne ju shihmüchi nunu mahne nangde, rimsung nunu mahne thrilung sangbün bolung niuh duhkhi nangde lah.

⁶ Müyinkhiyichoki tüsho amitingbo mutsoyiki inü rhümthünea wung tüsho jinjinlak wung ching niokheamde ayübah.

⁷ Nü a lüpdükhi jak tsülah, I tsübe; nü kheak areak kihkhi müla.

⁸ Lebanon chingnü I lung arang, I tsübe; Lebanon chingnü I lung arang. Amana wung mujuk kheaknü, Senir tüsho Hermon wung mujuk kheaknü, kekhüzübo yam chingnü, khüzübo wung chingnü chamde arang.

⁹ Nünü nü yo suna lak khülangnü I mulong ahühdo, I tsübe, I yamkhünbe, Nü müknü rheaka kheahkhi ching nünü I mulong ahühdo.

¹⁰ Nü muzho küdükhüh niungla, I tsübe, I yamkhünbe! nü muzho a küdükhüh yukhu kheaknü atsübe, tüsho püpü thüneathürabe kheaknü nü rhüm thüneakhi atsübe la!

¹¹ Nü münküp kheaknü aniungbe atsamchoh, I yamkhünbe; mukhuke tüsho niuhke nü mulo khüp lah; nü khimmih rhüm thüneakhi ju Lebanon rhüm nangde lah.

¹² Arihkhi wündo, kenü rihdokhi, ke-bukpung yihdokhi ju I tsübe, I yamkhünbe ah.

¹³ Nü sangdungbo ju tsarümkiu, ju lung amokhitkhi sangasobo, mürümmüri-sang lung molisang,

¹⁴ molisang lung molisangbün, thüre tüsho kelülüsang, ju lung jinjinlak-sang alala, rhümthüneabe tüsho akhühsang, ju lung thüneathürabe atsüdakbo alala–

¹⁵ ke-bukpung wündo, rhangdung kekhip, tüsho Lebanon chingnü keyung bukkhibo.

Alibe

¹⁶ Asürang, O dukulim apung! tüsho arang, O düjinglim apung! I wündo kheak yünang, junangde arhümthüneakhi yünmüzütbah. I tsübuh api wündo ching arüshang, tüsho amokhitkhi sangasobo tsühshang.