KHÜNBOLUNGKHÜN 1 - AMÜSÜH HÜM CL Bible (BSI)

¹ Khide atsüdak Solomon khün.

Akhuhbe Khün Alibe

² Nü münnü I kheak müthsüpang! Tümüde nü muzho a yukhu kheaknü atsübe,

³ nü mujube müdangke arhüm thünealah, nü mung arhüm thüneade dungkhitchoh; jumonü anünürübonü nü muzhochoh.

⁴ I nü lung bea lung, ike alihde tsoanü. Kiulongthsüpuhnü I api khiungshak ching beyuka lah. Isanü nü lung tode asühbah tüsho asühachihbah; isanü nü muzho yukhu kheaknü alü shijihbah; dükde arünü nü muzholah.

⁵ I a müraklah tüshe jak tsülah, O Jirusalem tsührübebo, Kedar khimyambo nangde, Solomon yo zhindokhim nangde.

⁶ O I kheak dükheah tümütüsho I müraklah, tümütüsho aninü I phumürakdo. I be tsührübonü I ki bukakhiuk; arünü I kurungasolu neakrü kamshih, tüshe I yo kurungasolu a inü müneak!

⁷ I ki thaang, nü shepü I menü muzhocho, nü mihnu boto küching yimkipcho, animuro nünü kükheak yapshihcho; tümüde nü müyamrü mihnu boto ki I kudukiukhi liberü nangde alapü?

Athrüpü

⁸ Nünü mümükheahsho, O aliberü bolung atsübe, mihnu boto ru yanang, tüsho mihnu neakrü khimyambo rheang ki nü mihnu nunubo yimkipang.

⁹ Inü muzhobe, Pharao khora-lolungbe bolung khora-dre khülang ki inü nü akeakheahchoh.

¹⁰ Nü müchipbo kheak nüpünü akhamlah, nü hung kheah suna laknü akhamlah.

¹¹ Isanü nü khilim shotoyinchinü amükhipbe thsübah suna nüpübo thsüjihbah.

Alibe

¹² Küyimki kiulongthsüpuh api dükhüm kheak lakhea, I yo arhümthüneabenü münimde yü.

¹³ I tsübuh a arhümthüneabe qiuqiu nangde I khüh kheak yaplah.

¹⁴ I tsübuh a Engedi kurungasolu ching mütüm sangbün pungkhi düchi khülang ruk ah.

Athrüpü

¹⁵ Nü jak küdükhüh atsü, I tsübe; O, nü jak atsü ah; nü mükbo müthrithrümpü mükji ruk ah.

Alibe

¹⁶ Nü küdükhüh akhamla, I tsübuh, atsütsünü tsülah. Ike yapkiu aphüyak lah;

¹⁷ Ike yam binkiu ju cedar sang, damzü ju tsünsang labah.