JUDNÜ ATHRÜTKHI KIHÜM HUHTANYU 1 - AMÜSÜH HÜM CL Bible (BSI)

¹ Jisu Khrista tankihrü tüsho Jakob niurü Jud kilimnü, Jia larü, Thrünpuh tüsho Abuh kheak amuzho tüsho Jisu Khrista mükühbah alarü kilim:

² Mihmüthsüm, mungtsü, tüsho amuzho nüsa kilim alü kamshang.

Arükchih Thsangyurübo

³ Amuzho müyamrübo, isa rukhüh akhümkhit dünkheak nüsa kilim thrütpü khide mulungkhinü, khülangkinü lang amüsührü kilim jihkhi akin dünkheak shochihpü tuthsukde nüsa kilim thrütpü yihnüpü lakheah.

⁴ Tümüde adüso ha abahyukkhi ching mütsana lakhi, amükinrü, Thrünpuh amüthsüm makhamaleak kamshihrü tüsho Atungpuh Thrünpuh tüsho Atungpuh Jisu Khrista reanglorü mihtsürü khürü mümükheahshihde azah-a lah.

⁵ Nüsanü khülangki, shepünü Ijip lomi chingnü mihtsürü khümkhitbah, ju dunglim amükinrübo dükheakshihkheanü tsüde mükheah-a lalashe, inü nüsa ki lümkhitloshihpü mulonglah.

⁶ Tüsho yunirübonü arü lapung dükde mülade amüthrikhi mahkhap ato nimung khiungde akheam müla wuhrünliunü rhüka amiting ching zo;

⁷ junangde, Sodom le Gomorra tüsho ju mühi kiutobonü müzammüram tüsho amülim rhimo. Arünü akheam müla mo ching thsümüchinü amütsan thsü.

⁸ Tütüshe hadürü yakli ching harü mihtsürübonü arü milimnü shihphü münean, thiyukhüm-sühmüh bahyuk, tüsho müretahkhibo azhih.

⁹ Tüshe yunirü atobuh Maikelnü she Mosa pang dünkheak arimri ki rukachihchoki mükhemükimde abahyukpü mümürang, tüshe api ki tha, “Atungpuhnü nü thürühshang!”

¹⁰ Tütüshe harü mihtsürübonü arünü manikhitkhi azhihde asukchoh; tüsho shiwüh lüm nangde arünü amükheahkhinü arü thsümünimchoh.

¹¹ Arü are! Tümüde arünü Kain limro ching tsahchoh, tüsho Balaamnü alakmihkhi alü thsüpü lim arü küdahnü bahyukchoh, tüsho Kora azhihkhi ching dükheakchoh.

¹² Harü ha nüsanü amuzhokhi thüniobo ching areak kihkhi, mütrede arü nihbuh lang ahiuhakhiprübo lah; arübo tsüng mübede apungnü yünde ayükhi amobo ah; aso masokhi mumükin sangdungbo, mahne ki shekhi, aying rukkhitkhi ah;

¹³ keto müküpde abükkhi, arü nihbuh achihbe arhukrhukke thurukihchoh; arü khilim lün thsungkheak amiting akheah akhua zokhi tsahde alakhi chiningbo ah.

¹⁴ Adam kheaknü lün thünepü Enoknü harü dünkheak müchitde tha, “Kheahang, Atungpuh api amüsüh yunirü chithürübo bebah arü,

¹⁵ alala kheak mahkhappü, mükinde arhimokhibo dünkheak arü alala tüsho amükinrü aneakrübonü api azhihde amütsü yubo thakhi bahyukpü!”

¹⁶ Harübo ju jijineahneahrü tüsho mührü müdamrü, nihbuh amütsü künkhi yanchoh, thiyu-tode kükheangchoh, alü thsüpü mihtsürü thsungyukchoh.

Atünadoyu tüsho Thsangdankhibo

¹⁷ Tüshe amuzho müyamrübo, isa Atungpuh Jisu Khrista amüsüh-thsangyurübonü müchitkhibo nüsanü lümkhitang;

¹⁸ arünü nüsa ki tha, “Akheam kim ching arü nihbuh mükinkhi shihkünkhi yande luhmünerübo labah.”

¹⁹ Achamnakrü, alomi mihtsürü, Me mülakhi ju harü ah.

²⁰ Tüshe amuzho müyamrübo, nüsanü khide amüsüh nüsa akin kheak rünkihang; Amüsüh Me ching tamkhüntamnüang;

²¹ nüsabo Thrünpuh amuzho ching lang; lün rhangdung lim isa Atungpuh Jisu Khrista mihmüthsüm thsungkheak aleangang.

²² Dukiuhlokhi khürü ki mihmüthsüm huhang;

²³ mo chingnü züngkhitde khürü khümkhitang; tüsho khürü ki trezung thsüde mihmüthsüm huhang, tüshe arü yüliyürakhi neakbonü amüneankhi khimmihbo thraneanang.

Mungshi Tamkhüntamnü

²⁴ Kheakü nüsa mangakde akümpü tüsho areak mükihde api müretah miki asühachihde nüsa yüshihbuh kilim,

²⁵ Thrünpuh, isa Atungpuh Jisu Khrista hode isa khümkhitbuh kilim müretah, wüntre-müretah, yakzan shuhkhi, tüsho wu, kim alala müngüh, kheakü tüsho lünnü laang. Amen.