JONA 3 - AMÜSÜH HÜM CL Bible (BSI)

Jonanü Atungpuh ki Anikhi

¹ Atungpuh yu mahne kipü Jona kilim arü,

² “Asürang, kiuto ato Nineve lim yüang, tüsho inü nü ki thakhi thiyusheak ju ching zhiyukang.”

³ Jumonü Jonanü Atungpuh yu yande tsahmusu tüsho Nineve lim yü. Kheakü Nineve ju tomülakkhi kiuto, nimung mahsam tsahhobe lakheah.

⁴ Jonanü nimung khülang tsahde kiuto ching yüzahpü tsahmusu. Tüsho apinü zhi, “ Nimung yirü labah Nineve thsümünimbah!”

⁵ Tüsho Nineve mihtsürübonü Thrünpuh kin; arünü khümkeak thsüpü zhiyuk tüsho mihbüm aban ato tüsho anininü shungliukhim phuyu.

⁶ Küyimki thiyusheakbo ju Nineve kiulongthsüpuh khiungkhea, apinü anihbuh kiulongthsü-binkiu chingnü asürü, api shulünkhim yihkhit, shungliukhimnü anihbuh lüpdo, tüsho awah ching bin.

⁷ Judüki apinü Nineve ching zhiyukkhi khülang lakheah: “ Kiulongthsüpuh tüsho api yo atorübo yuzüng hode: Mihtsürü yungsho shiwüh, moshi yungsho mihnunü tümü she mütsühake. Arübo müyimkip, yungsho arünü ke muyung.

⁸ Mihtsürübo tüsho shiwühbo shungliukhim phuyubah, tüsho arünü sühmüh lade Thrünpuh ki zhibah. Alalanü arü amütsü limrobo tüsho athsümünim chingnü arholobah.

⁹ Shenü mükheahla? Thrünpuhnü lümalobah tüsho api lüm müthribah; api buk müshakde akhiukkhi chingnü apinü atuklobah, junangde isa müdükheak.”

¹⁰ Küyimki arünü arhimokhi, arü amütsü limrobo chingnü rholokhi Thrünpuhnü angükhea, apinü arü kheak thsümütsü hande arüpü thakhi Thrünpuhnü api lüm müthri; tüsho apinü ju mürhimo.