JONA 2 - AMÜSÜH HÜM CL Bible (BSI)

Jona Tamkhüntamnü

¹ Judüki Jonanü thüngüh buk chingnü Atungpuh api Thrünpuh ki tamkhüntamnü:

² “ Inü I lümthsünü chingnü Atungpuh ki ji tüsho apinü I ki alojih; Ashe-lomi asük chingnü inü zhi, tüsho nünü I düsheak so.

³ Nünü I ketobo asük phulung ching jipyuk, tüsho kekingnü I mükamdo; nü abükkhi alala tüsho keto-bukkhi I kheaknü lungho.

⁴ Judüki inü tha, ‘ I nü mikinü limshude tsoshihdo, küde thsah inü nü amüsüh arüngyam kheak kheahloba?’

⁵ Kebonü I kurung zhidoabah; asüknü I mükamdo; kenipbonü I ku mükamde hingdo.

⁶ I a müzüng yingbo ching, lünnü chipi rihkhi lomi ching yüzah; tütüshe nünü alokhün chingnü I rhangdung bekhit, O Atungpuh I Thrünpuh.

⁷ I rhangdung keamyukde atsochoki, inü Atungpuh lümkhit; tüsho I tamkhüntamnü, nü amüsüh arüngyam ching arü.

⁸ Sherünü akeangkeang sangthsübo kingaünchonü nü ki arü thiyuro bahyukdo.

⁹ Tüshe inü makshe-jihkhi düsheaknü nü ki laksah-a kingaünbah; tümü inü thiyuchihchimkheanü inü ajihbah. Akhümkhitpü ju Atungpuh yo ah!”

¹⁰ Judüki Atungpuhnü thüngüh ki asuk, tüsho alo akung khea Jona mülümkhita bah.