JOHAN 8 - AMÜSÜH HÜM CL Bible (BSI)

Müzammüram Liberü

¹ Tüshe Jisunü Oliv Müzüng ching yü.

² Yapsu mükikde apinü arüngyam ching arülo, tüsho mihtsürü alala api ki arü; tüsho apinü binbah arü thsangyu.

³ Judüki yakzan thsangyurü le Pharisirünü müzammüramberü khülang api ki bedarü. Tüsho küyimki arü miki api zhipshihkhea,

⁴ arünü api ki tha, “Thsangyurü, ha liberü ha müzammüram rhimode alachoki tholokheah.

⁵ Kheakü yakzan ching, hadürü a lungnü rusahbeah de Mosanü isa ki thiyukhüm jih-a lah. Tüshe nünü küde athaba?”

⁶ Ha arünü tümükhüh amülim jihpü api rükakide athakheah. Tüshe Jisunü amusokhi nangde mükhümbah ayingkhingnü alo kheak thrüt.

⁷ Jumonü küyimki arünü mutuklode api ki keokhea, apinü asürübah arü ki tha, “Nüsa bolung shepü neak mülanü, apinü akhuhde alibe kheak lungnü kingshang.”

⁸ Tüsho kheaküshe apinü mükhümbah alo kheak thrüt.

⁹ Judüki sherünü ju sokheanü, arü küdah thsüde lümkhiungbah azopünü akhuhbah khülang khülangnü tsoabah. Alibe ju ching zhipde Jisu zangrü aning.

¹⁰ Jisunü abinkih-a kheahbah alibe ki tha, “Alibe, nü amülim jihrübo küching la? Shenü she nü mübahyuk de?”

¹¹ Alibenü alo, “Atobuh, shenü she mübahyuk.” Tüsho Jisunü alibe ki tha, “Inü she nü mübahyuk; yüang tüsho neak düyihbeaklo.”

Jisu Alomi Ayinatrüm

¹² Judüki Jisunü arü ki tha, “I alomi ayinatrüm. Shepünü I yanchonü amiting ching mütsah, tüshe rhangdung ayinatrüm labah.”

¹³ Jumonü Pharisirübonü api ki tha, “Nünü nü küdah thsüde thiyumütsan thsüchoh; nü yo thiyumütsan thiyuro yung.”

¹⁴ Jisunü arü ki alo, “Inü I küdah thsüde thiyumütsan thsüthsü she, I thiyumütsan thiyuro ah tümüde I küchingnü arükhea tüsho I küching yüchonü inü mükheahlah; tüshe I küchingnü arücho tüsho I küching yüchonü nüsanü mümükheah.

¹⁵ Nüsanü shih limnü mahkhapchoh; inü a sheshe mahmükhap.

¹⁶ Tüshe inü mahkhapsho, I mahkhapkhi ju thiyuro; tümüde I langzü yung, tüshe I thiyibuh I Buh lung I lah.

¹⁷ Mihtsürü mahne thiyumütsan ju thiyuro ah de nüsa yakzan ching she thrüta lah.

¹⁸ I küdah thsüde thiyumütsan thsübuh ju I ah, tüsho I thiyibuh I Buhnü I thiyumütsan thsüchoh.”

¹⁹ Judüki arünü api ki tha, “Nü Buh küching la?” Jisunü alo, “Nüsanü I yungsho I Buh she mümükheah. Nüsanü I mükheahkhülaa, I Buh she mükheah-a labah.”

²⁰ Harü yubo Jisunü apinü arüngyam ching thsangyude alachoki shozopung chingnü tha; tüsho shenü she api kheak khah muchung, tümüde api kim marüyide alakheah.

I Yüpung Nüsanü Müyükhuk

²¹ Judüki Jisunü arü ki thalo, “I tsochoh, tüsho nüsanü I yimbah, tüsho nüsa neak ching nüsa shebah. I küching yübanü nüsanü marükhuk.”

²² Jumonü Jihudarübonü tha, “Aküdah thsüde api laksahba shi, tümütüsho apinü thachoh, ‘l küching yübanü nüsanü marükhuk’?”

²³ Tüsho apinü arü ki tha, “Nüsa abolimnü ah; I a akulimnü ah. Nüsa ha lomi yo ah; I a ha lomi yo yung.

²⁴ Jumonü nüsa neakbo ching nüsa shebah de inü nüsa ki thakheah; tümütüsho I api ah de nüsanü mükinsho, nüsa neakbo ching nüsa shebah.”

²⁵ Judüki arünü api ki tha, “Nü she a?” Tüsho Jisunü alo, “Atankih chingnü inü nüsa ki tümü thakheanü ju ah.

²⁶ Inü nüsa dünkheak ahihdo thapü tüsho mahkhappü lah, tüsho I thiyibuh thiyuro lah; tüsho küpü api kilimnü asokheanü inü alomi ki ju asukchoh.”

²⁷ Apinü arü ki Abuh dünkheak thakheah de arünü manikhit.

²⁸ Judüki Jisunü arü ki tha, “Küyimki nüsanü Mihtsürü Tsührü shuhkihbanü, I api ah, tüsho inü I küdahnü tümü müthsü de nüsanü amükheahbah, tüshe I Buhnü thsangyukhi nangde inü harü asukchoh.

²⁹ Tüshe shepünü I thiyikheanü I lung lah. Abuhnü I langzü muzojih, tümüde kamruhroro apinü amulongkhi inü rhimochoh.”

³⁰ Apinü harü yubo thachoki, ahihkhühnü api kheak kin.

Zuzu Mihtsürü tüsho Azhorü

³¹ Judüki Jisunü api kheak kinrü Jihudarü ki tha, “Nüsanü inü thsangyukhi anisho, atsütsü nüsa I jingyanrü ah.

³² Nüsanü thiyuro mükheahbah, tüsho thiyuronü nüsa zuzu kamshihbah.”

³³ Arünü api ki alo, “Isa Abraham tsühsoniusobo ah, tüsho she bukkhüp laamükheah. ‘Nüsa zuzu kamshihbah,’ de nünü küde thacho?”

³⁴ Jisunü arü ki alo, “Atsütsü inü nüsa ki thachoh, shepü neak yihbeakchonü neak yo azhorü ah.

³⁵ Tüsho azhorü ju thüyam ching lünnü mülachoh, tüshe tsührü a lünnü lachoh.

³⁶ Jumonü atsührünü nüsa zuzu kamshihsho, nüsa zuzu kambah.

³⁷ Nüsa ju Abraham tsühsoniusobo ah de inü mükheahlah, tüshe nüsanü I laksahpü yimchoh, tümütüsho inü thsangyukhi nüsanü müleangkhi.

³⁸ Inü I Buh kheak tümü ngüdünü ju thachoh, tüsho nüsanü nüsa abuh kheak tümü ngüdünü ju rhimochoh.”

³⁹ Arünü alo tüsho api ki tha, “Abraham ju isa abuh ah.” Jisunü arü ki tha, “Nüsa Abraham tsührübo a sho nüsanü Abraham rhimobo thsübeah.

⁴⁰ Tüshe kheakü nüsanü Thrünpuh kilimnü sobah nüsa ki thiyuro thabuh mihtsürü I laksahpü yimchoh. Abrahamnü hade mürhimo.

⁴¹ Nüsanü nüsa abuh rhimobo thsüchoh.” Judüki arünü api ki tha, “Isa a aleangkheak tsührü yung; isa Abuh khülang, Thrünpuh lah.”

⁴² Jisunü arü ki tha, “Thrünpuh ju nüsa Abuh thsükhülaa, nüsanü I muzhobah, tümüde I Thrünpuh kilimnü arükheah; yungsho I küdah thsüde marü, tüshe apinü I thiyikheah,

⁴³ Tümü thsükhi nüsanü I yu manikhitcho? Tümütüsho nüsanü I yu anipü marümkheam.

⁴⁴ Nüsa a nüsa abuh arimri tsührü ah, tüsho nüsa abuhnü akünkhi nüsanü rhimonelah. Atankih chingnü api mihkhukrü lakheah, tüsho thiyuro ching müzhip, tümütüsho api kheak thiyuro müla. Küyimki apinü akeangyu thabanü, apinü nihbuh yakli chingnü thachoh, tümüde api akeangyu tharü ah tüsho ju abuh ah.

⁴⁵ Tüshe inü thiyuro thakhinü, nüsanü I kheak mükin.

⁴⁶ Nüsa shepünü neak dünkheak I ki mütsanmükhi jihkhukba? Tüsho inü thiyuro thasho, tümüde nüsanü I mükin le?

⁴⁷ Shepü Thrünpuh yoanü Thrünpuh yu anichoh; jumonü nüsanü mani, tümütüsho nüsa a Thrünpuh yo yung.”

Jisu tüsho Abraham

⁴⁸ Judüki Jihudarünü alo tüsho api ki tha, “Nü Samariarü ah tüsho nü amünean me lah de isanü lungkide mütha de?”

⁴⁹ Jisunü alo, “I a amünean me müla; tüshe inü I Buh wüntre jihchoh, tüsho nüsanü I wüntre müjih.

⁵⁰ Tüsho inü I müretahpü müyim; ju yimpü tüsho mahkhappü khülang lah.

⁵¹ Atsütsü inü nüsa ki thachoh, khürünü I yu anisho apinü küyimkishe ashepü müngü.”

⁵² Judüki Jihudarünü api ki tha, “Kheakü nü amünean me lah de isanü mükheahlah! Abraham tüsho wukihrübo shedo; tüsho nünü thachoh, ‘Khürünü I yu anisho apinü küyimkishe ashepü müngü.’

⁵³ Nü isa abuh sheabahkhi Abraham kheaknü atobe a de? Tüsho wukihrübo shedo. Nü she ah de nünü lümcho?”

⁵⁴ Jisunü alo, “Inü I küdahnü wüntresho, I wüntrekhi tümü müla. Nüsanü shepü nüsa Thrünpuh ah de thachonü, I Buhnü I wüntre jihchoh.

⁵⁵ Tütüshe nüsanü api mümükheah, tüshe inü api mükheahlah. Tüsho inü, ‘Inü api mümükheah,’ de thasho nüsa nangde I ju akeangyu tharü thsübah; inü api mükheahlah tüsho api yu zochoh.

⁵⁶ Nüsa abuh Abrahamnü I nimung kheahpü asüh, tüsho apinü ngübah asüh.”

⁵⁷ Judüki Jihudarünü tha, “Nü kam 50 she müthsüyi tüsho nünü Abraham ngüdü de?”

⁵⁸ Jisunü arü ki tha, “Atsütsü inü nüsa ki thachoh, Abraham müngüh I lakheah.”

⁵⁹ Judüki arünü lung thrüa lubah api kheak king; tüshe Jisunü jikabah tüsho arü bolungnü hode yübah arüngyam chingnü wukhiuk, tüsho tsoabah.