JOHAN 6 - AMÜSÜH HÜM CL Bible (BSI)

Chithürü Phüngü Yimkipkhi

¹ Ju dunglim Jisunü Galilee keto (yungsho Tiberia keto) hode yü.

² Judüki yimto ato khülangnü api dunglim yan, tümütüsho apinü tukthsürü kheak khinthiyinbebo rhimokhi arünü ngü.

³ Tüsho Jisunü awung kheak yükih, tüsho api jingyanrübo lung bin.

⁴ Kheakü Jihudarü phungho-thünio, thüninde alakheah.

⁵ Judüki Jisunü yimto ato api kilim arükhi abina ngübah Philip ki tha, “Harü tsühpü isanü yikhap küchingnü athuloba?”

⁶ Tüshe apinü anihbuh rükakide athakheah, tümüde apinü tümü rhimobanü mükheahbah alakheah.

⁷ Philipnü api ki alo, “Shotoyinchi nak 200nü athulokhi yikhapnü arü anini abanpü suhdahbah.”

⁸ Api jingyanrü bolung khülang, Simon Peter niurü Andrianü api ki tha,

⁹ “Ha lim azürü khülangnü Barli yikhap 5 tüsho thüngüh 2 de lah, tüshe junü hadükhüh külungki athsangpü?”

¹⁰ Judüki Jisunü tha, “Mihtsürübo binshang.” Ju dangpung ching rimkiu hihde alakheah. Jumonü mihtsürübo akhekhi 5000 bande bin.

¹¹ Jisunü yikhapbo ju lu tüsho makshe jihbah jingyanrübo kilim chama jih, tüsho jingyanrübonü bina larü kilim ahiuh; tüsho apinü thüngüh she junangde thsü.

¹² Küyimki arü bukthsükhea, apinü ajingyanrübo ki tha, “Adütre aningkhibo mübahde hanmukhungang.”

¹³ Jumonü arünü atsüh aning barli yikhap 5 chingnü adütre muluk 12 mide hanmukhung.

¹⁴ Judüki Jisunü khinthiyinbe rhimochoki ngürü mihtsürübonü tha, “Tsükjide ha alomi ching arüpü lakhi wukihrü ah.”

¹⁵ Jumonü küyimki arünü api muhde bea lubah kiulongthsürü kamshihpü Jisunü amükheahkhea, apinü alangzü awung lim yülo.

Jisunü Kemi kheak Tsahkhi

¹⁶ Küyimki arelim kamkhea, api jingyanrübonü keto lim yükibah

¹⁷ sangkung ching yüzah, tüsho Kapernaum lim keto hode yü. Judüchoki mitingde alakheah, tüsho Jisunü arü kilim marü.

¹⁸ Judüki apung tode ayünkhinü ke müküpde kam.

¹⁹ Jumonü küyimki arünü mail 3 yungsho 4 bekhea, arünü Jisu ju kemi kheaknü tsahde sangkung thüninde arükhi ngü; tüsho arü trede alakheah.

²⁰ Tüshe apinü arü ki tha, “I a le dütre.”

²¹ Judüki arünü api ju asühde sangkung ching beyukpü kün, tüsho nahdü lang sangkung ju arü yülim kemungyean khiung.

Mihtsürübonü Jisu Yimkhi

²² Ashidopü keto thripkhüh lakhi botonü ju ching sangkung khülang labah Jisunü ajingyanrü lung müyüzahde arü zangrü yüde ngü.

²³ Judüalalashe, Atungpuhnü makshe jihbah arünü yikhap tsühkhi dangpung phüni Tiberia chingnü sangkung püpübo arü.

²⁴ Küyimki mihtsürübonü Jisu le ajingyanrübo ju ching mülakhi ngükhea, arünü sangkungbo ching yüzah tüsho Jisu yimde Kapernaum lim arü.

Jisu ju Rhangdung Tsühyungbe

²⁵ Tüsho arünü api keto thripkhüh ngübah tha, “Rabbi, nü ha ching küyimki arükhea?”

²⁶ Jisunü arü ki alo tüsho tha, “Atsütsü inü nüsa ki thachoh, nüsanü khinthiyinbebo ngümonü I yimchoh yung, tüshe yikhapbo tsühbah bukthsümonü ah.

²⁷ Adükheakpü lakhi tsühyungbe thsungkheak yung, tüshe Mihtsürü Tsührünü nüsa jihpü lakhi akheam müla rhangdung rünkhiungpü tsühyungbe thsungkheak rhimoang, tümütüsho Abuh Thrünpuhnü api kheak anihbuh amütsan yümkih-a lah.”

²⁸ Judüki arünü api ki tha, “Isanü Thrünpuh rhimobo thsüpü thsüde tümü rhimoba?”

²⁹ Jisunü alo tüsho arü ki tha, “Apinü athiyibuh kheak nüsanü akinpü ju Thrünpuh rhimo ah.”

³⁰ Jumonü arünü api ki tha, “Isanü ngübah nü kinpü thsüde nünü khinthiyinbe tümü rhimoba? Nünü tümü rhimoba?

³¹ Isa jipürünü sunglo ching manna tsüh; ha thrüta lakhi nangde, ‘Apinü yinmi chingnü arü kilim atsühpü yikhap jih.’”

³² Judüki Jisunü arü ki tha, “Atsütsü inü nüsa ki thachoh, Mosanü yinmi chingnü nüsa kilim yikhap jihkhi yung, tüshe I Buhnü yinmi chingnü thiyuro yikhap nüsa kilim jihchoh.

³³ Tümüde Thrünpuhnü ajihkhi yikhap ju yinmi chingnü akichoh tüsho alomi ching rhangdung jihchoh.”

³⁴ Judüki arünü api ki tha, “Atungpuh, kamruhroro ha yikhap isa kilim jihang.”

³⁵ Tüsho Jisunü arü ki tha, “I rhangdung tsühyungbe ah. Shepü I kilim arüchonü küyimkishe mükhüm, tüsho shepünü I kheak kinchonü küyimkishe kemüthüri.

³⁶ Tüshe nüsanü I ngübah mükin de inü nüsa ki thachoh.

³⁷ I Buhnü I jihkhi alala I kilim arübah, tüsho shepü I kilim arüchonü inü küyimkishe müyankhit.

³⁸ Tümüde I lümkhi yungde I thiyibuh lümkhi rhimopü I yinmi chingnü akikheah.

³⁹ Ha I thiyibuh Abuh lümkhi ah, junangde apinü I jihkhi alala tümü she müdükheak tüshe akheam nimung ching arhang kamlobah.

⁴⁰ Tüsho ha I thiyibuh lümkhi ah, junangde atsührü ngübah api kheak kinrü aban akheam müla rhangdung labah; tüsho inü akheam nimung ching api arhang kamloshihbah.”

⁴¹ Jihudarünü neangneangde api azhih, tümütüsho apinü tha, “I ju yinmi chingnü akikhi tsühyungbe ah.”

⁴² Tüsho arünü tha, “Ha isanü abuh tüsho abe mükheahkhi Josep tsührü Jisu yung de? Apinü küde thsah, ‘I yinmi chingnü akikheah’ de thacho?”

⁴³ Jumonü Jisunü arü ki alo tüsho tha, “Nüsa bolung datsangachih.

⁴⁴ I thiyikhi I Buhnü bede marüsho shenü she I kilim marükhuk; tüsho akheam nimung ching inü api arhang kamloshihbah.

⁴⁵ Ha wukihrübonü thrüta lah, ‘Tüsho arü alala Thrünpuhnü thsangyubah.’ Jumonü Abuh kilimnü asorü tüsho anikhitrü abannü I kilim arüchoh.

⁴⁶ Shepü Thrünpuh kilimnü lanü apinü yungsho shenü she Abuh müngü; apinü Abuh ngüdo.

⁴⁷ Atsütsü inü nüsa ki thachoh, shepünü I kheak kinchonü akheam müla rhangdung lah.

⁴⁸ I rhangdung tsühyungbe ah.

⁴⁹ Nüsa jipürübo sunglo ching manna tsüh, tüsho shedo.

⁵⁰ Ha yinmi chingnü akikhi yikhap, junangde khürünü ju tsühbah tüsho müshe.

⁵¹ I ju yinmi chingnü akikhi rhangdung tsühyungbe. Khürünü ha tsühyungbe tsühsho api lünnü alabah, tüsho inü alomi rhangdung thsungkheak jihpü lakhi yikhap ju I shih.”

⁵² Jumonü Jihudarübonü arü bolung arhungangümde tha, “Küde thsah ha mihtsürünü isa kilim api shih tsühpü jihpü?”

⁵³ Judüki Jisunü arü ki tha, “Atsütsü inü nüsa ki thachoh, nüsanü Mihtsürü Tsührü shih mütsühsho tüsho api thiyih muyungsho, nüsa kheak nüsa rhangdung müla.

⁵⁴ Shepünü I shih tsühcho tüsho I thiyih yungchonü lünnü rhangdung labah, tüsho akheam nimung inü api arhang kamshihbah.

⁵⁵ Tümüde I shih ju jim tsütsü tüsho I thiyih ju ayungbe tsütsü ah.

⁵⁶ Shepünü I shih tsühcho tüsho I thiyih yungchonü I lung lachoh, tüsho l api lung lachoh.

⁵⁷ Arhang labuh I Buhnü I thiyikhi nangde tüsho Abuh hode I lakhi nangde, shepünü I tsühyungbanü I dünkheaknü alabah.

⁵⁸ Nüsa jipürünü sunglo ching manna tsühbah shea lakhi ruk yungde, ha yinmi chingnü akikhi yikhap ah. Shepünü ha yikhap tsühbanü lünnü alabah.”

⁵⁹ Harübo apinü Kapernaum ching thsangyuchoki sinagogbo ching thakheah.

Akheam Müla Rhangdung Yubo

⁶⁰ Jumonü api jingyanrübo ahihkhühnü ha sochoki tha, “Ha thakhi achak ah; shenü ju anikhitkhukba?”

⁶¹ Küyimki api jingyanrübonü ha dünkheak arü bolung dapdaprarakhi mükheahkhea, apinü arü ki tha, “Hanü nüsa masühde kamshihcho shi?

⁶² Dale tüsho Mihtsürü Tsührü akhuhlim api lapung yükihde nüsanü ngükhülaa küde?

⁶³ Rhangdung jihbuh ju me lah; shih yihnüpü müla. Inü nüsa ki asukkhi yubo ju me ah, tüsho jurü rhangdung ah.

⁶⁴ Tüshe nüsa amükinrü khürü lah.” Tümüde atankih chingnü amükinrübo ju she a tüsho shepünü api yinatsühbanü Jisunü mükheah.

⁶⁵ Tüsho apinü tha, “Jumonü I Buhnü api ki mümülüjihsho shenü she I ki marükhuk de inü nüsa ki thado.”

⁶⁶ Ju kim chingnü api jingyanrü ahihkhühnü tsolo tüsho api lung mütsahdebah.

⁶⁷ Judüki Jisunü thürükheak mahne ki ju tha, “Nüsa she tsoabahpü künla de?”

⁶⁸ Simon Peternü api ki alo, “Atungpuh, isanü shepü ki yüpü? Nü yubo akheam müla rhangdung lah.

⁶⁹ Kheaküshe nü ju Thrünpuh kilimnü arükhi Amüsüh Khülang de isanü kinlah tüsho mükheahlah.”

⁷⁰ Jisunü arü ki alo, “Inü nüsa thürükheak mahne mokhitkhi yung de? Tütüshe nüsa bolung khülang a arimri ah!”

⁷¹ Apinü Simon tsührü Juda Iskariot dünkheak asuk, tümüde thürükheak mahne bolung anihbuh yinatsühpü ju api lakheah.