JOHAN 20 - AMÜSÜH HÜM CL Bible (BSI)

Kiuyuk Akeangkeang

¹ Amu-khip akhuhbe nimung, mitingde alachoki mükikde Mari Magdalennü kiuyuk ching arü, tüsho lung ju kiuyuk kheaknü lahkhia bah-a ngü.

² Judüki alibenü Simon Peter tüsho Jisunü muzhode alabuh jingyanrü püpü kilim alihde arübah tha, “Arünü Atungpuh kiuyuk chingnü yihkhita lude tsoa lah, tüsho arünü api küching yapshihlanü isanü mümükheah.”

³ Jumonü Peter le püpü jingyanrünü wukhiuk, tüsho kiuyuk lim yüde alakheah.

⁴ Jumonü ane chidonü rukhüh alih, tüsho jingyanrü püpü junü Peter alihhobah akhuhde kiuyuk ching arü.

⁵ Tüsho apinü mükhümbah abinyuka kheahchoki, ju ching khimthünak ngü; tütüshe apinü müyüzah.

⁶ Jushu Simon Peternü api dunglim yü tüsho kiuyuk ching yüzah; tüsho ju ching khimthünak yapde ngü,

⁷ Miphukhim Jisu hingkhi she alakheah. Khim ju khimthünak kheaknü büthsüde napa alakheah.

⁸ Jushu jingyanrü püpü kiuyuk ching akhuh arübuh she yüzah; apinü ngü tüsho akin la.

⁹ Tümütüsho api ashe chingnü arhang kamlobah de arünü amüsühyu mümükheahyide alakheah.

¹⁰ Jushu jingyanrü bünenü ane yam lim alode yü.

Jisunü Mari Magdalen ki Akhiukkhi

¹¹ Tüshe Mari Magdalennü kiuyuk ki tripde zhip, tüsho alibenü tripde amükhümchoki kiuyuk ching abinyuka kheah.

¹² Tüsho alibenü yunirü mahne khim amüye yihbah Jisu mi yappung khülang akulim tüsho püpü ju ajing lim binde ngü.

¹³ Judüki anenü alibe ki tha, “Aliberü, tümüde nü tripcho?” Alibenü ane ki alo, “Tümütüsho arünü I Tungpuh lude tsoa lah, tüsho api kükheak yapshihlanü inü mümükheah.”

¹⁴ Küyimki alibenü ha thakhea, anihbenü rholo tüsho ju ching Jisu zhipde ngü, tüshe ju Jisu ah de alibenü mümükheah.

¹⁵ Jisunü alibe ki tha, “Aliberü, tümüde nü tripcho? Nü she yimcho?” Alibenü api ju shahwün thsürü ah de lümbah tha, “Atobuh, nünü api lude tsoa lasho api kükheak yapshihlanü I ki thaang, tüsho inü api lude tsoanü.”

¹⁶ Jisunü alibe ki tha, “Mari!” Alibenü rholo tüsho api ki alo, “Rabboni!” (amütsan Thsangyurü).

¹⁷ Jisunü alibe ki tha, “I kheak dütholo, tümüde I Buh kilim I müyükihyi; tüsho I keoniorü ki yübah thaang, ‘I Abuh, nüsa Abuh, tüsho I Thrünpuh tüsho nüsa Thrünpuh kilim yüchoh.’”

¹⁸ Mari Magdalennü arübah anihbenü Atungpuh ngüdo tüsho apinü anihbe ki harü thado de jingyanrübo ki tha.

Jisunü Jingyanrübo ki Akhiukkhi

¹⁹ Ju nimung arelim, amu-khip akhuhbe nimung Jihudarübo trekhinü jingyanrübonü ripit rihbah alachoki, Jisu arübah arü bolung zhipbah tha, “Nüsa lung mungtsü laang!”

²⁰ Küyimki apinü ha thakheanü arü ki api khahbo le rheang huh. Jushu jingyanrübonü Atungpuh ngüchoki asüh.

²¹ Judüki Jisunü arü ki thalo, “Nüsa lung mungtsü laang! I Buhnü I thiyikhi nangde, inü nüsa thiyichoh.”

²² Küyimki apinü ha thakheanü arü kheak sheak mütkih tüsho tha, “Amüsüh Me leangkhiang.

²³ Nüsanü khürü ki neak bahjihsho, jurü bahjihdo; nüsanü khürü neak mübahjihsho, jurü mübahjih.”

Jisu tüsho Thoma

²⁴ Tüshe thürükheak mahne bolung khülang rüpde-zübekhi de ajihkhi Thoma ju Jisu arüchoki arü lung mülakheah.

²⁵ Jumonü jingyanrü püpürünü api ki tha, “Isanü Atungpuh ngüdo.” Tüshe apinü arü ki tha, “Inü akhah ching yümruyinchi reak ngübah, ju ching I yingkhing muyukyikia, tüsho arheang ching I yingkhing muyukyikia, inü akin müla.”

²⁶ Tüsho nimung tizheah dunglim jingyanrübo kheaküshe alunglim lakheah; tüsho arü lung Thoma lakheah. Khimdopü rih-a lalashe arübah arü bolung zhip, tüsho tha, “Nüsa lung mungtsü lang!”

²⁷ Judüki apinü Thoma ki tha, “Ha ching nü khah chungang, tüsho I khahbo kheak kheahang, tüsho ju I rheang ching yukang. Mükinde düla, tüshe kinang.”

²⁸ Tüsho Thomanü api ki tha, “I Tungpuh tüsho I Thrünpuh!”

²⁹ Jisunü api ki tha, “Thoma, tümütüsho nünü I ngümonü kindo. Shepünü müngü tütüshe kindünü müngühmühi.”

³⁰ Tüsho atsütsü ha hüm ching thrüta mülakhi Jisunü khinthiyinbe ahihdo api jingyanrübo miki rhimo;

³¹ tüshe Jisu ju Khrista, Thrünpuh tsührü de nüsanü akinpü thsüde, tüsho akinkhi hode api mung ching nüsa rhangdung lapü thsüde harü thrüta lah.