JOHAN 19 - AMÜSÜH HÜM CL Bible (BSI)

¹ Jüdüki Pilatnü Jisu bea lubah rhap.

² Tüsho bonungrübonü ayang kuthran thsübah aku kheak thranjih, tüsho arünü api kheak mürümmuchu shulünkhim phuyujih.

³ Arünü tha, “Jihudarü kiulongthsüpuh, tsüde laang!” Tüsho arü khahnü api dam.

⁴ Kheaküshe Pilatnü wukhiuk, tüsho arü ki tha, “Inü api kheak amülim tümü müyimkhit de nüsanü amükheahpü thsüde inü api nüsa kilim bede akhiukchoh.”

⁵ Judüki Jisunü ayang kuthran tüsho mürümmuchu shulünkhim yihbah akhiuk. Tüsho Pilatnü arü ki tha, “Mihtsürü kheahang!”

⁶ Jumonü küyimki amükeam putungrü tüsho atorübonü api ngükhea, arünü zhide tha, “Api yümkihang, api yümkihang!” Pilatnü arü ki tha, “Nüsanü api lubah yümkihang, tümüde inü api kheak amülim tümü müyimkhit.”

⁷ Jihudarünü api ki alo, “Isa yakzan khülang lah, tüsho isa yakzan yande api ashepü tsütsü, tümütüsho api aküdah thsüde Thrünpuh tsührü kamshihdo.”

⁸ Jumonü küyimki Pilatnü ju thakhi sokhea, api alü trede kam,

⁹ tüsho thüyam ching yüzahlobah Jisu ki tha, “Nü küchingnü a? Tüshe Jisunü api ki tümü malo.”

¹⁰ Judüki Pilatnü api ki tha, “Nünü I ki thiyu müthaba de? Inü nü yümkihpü tüsho adükhepü wu lah de nünü mümükheah de?”

¹¹ Jisunü alo, “Akulimnü nü kilim müjih-a lasho nünü I azhihde tümü wu müla. Jumonü shepünü I nü kilim jihkheanü neak atobe lah.”

¹² Ju kim chingnü Pilatnü api dükhepü mürang, tüshe Jihudarünü zhide tha, “Nünü ha mihtsürü tsoshihsho, nü a Kaesar müyambuh yung. Shepünü nihbuh küdahnü kiulongthsürü kamchonü Kaesar azhihde asukchoh.”

¹³ Küyimki ju thakhi Pilatnü asokhea, apinü Jisu bede akhiukbah Ibri yunü Gabbatha de ajikhi dangpung Lung-khimkhi mahkhap binkiu ching bin.

¹⁴ Kheakü ju phungho-thünio thsakhampü nimung tüsho animuro lakheah. Tüsho apinü Jihudarü ki tha, “Nüsa kiulongthsüpuh kheahang!”

¹⁵ Tüshe arünü zhi, “Api sheshang, api sheshang! Api yümkihang!” Pilatnü arü ki tha, “Inü nüsa kiulongthsüpuh yümkihba shi?” Amükeam putungrübonü alo, “Kaesar kheak hode isa kiulongthsürü müla!”

¹⁶ Jumonü apinü arü kilim api yümkihpü jih. Junangde Jisu bea lubah tso.

Jisu Yümkihkhi

¹⁷ Tüsho apinü sangkim hanbah Ibri yunü Golgotha de ajikhi kuro dangpung ching yü,

¹⁸ ju ching arünü api yümkih, tüsho api lung püpürü mahne, Jisu aphulung thsübah thrip aban yümkih.

¹⁹ Kheakü Pilatnü thiyu thrütbah sangkim kheak yihkih. Tüsho athrütkhi ju ha lakheah: Jihudarü kiulongthsüpuh, nazarethrü jisu.

²⁰ Jihudarü ahihdonü ha thrütkhi khe, tümüde Jisu yümkihkhi dangpung ju kiuto phünide alakheah; tüsho ju Ibri, Greek, tüsho Latin yunü thrüta lakheah.

²¹ Judüki Jihudarü amükeam putungrübonü Pilat ki tha, “Jihudarü kiulongthsüpuh de düthrüt, tüshe ‘I Jihudarü kiulongthsüpuh,’ de ha mihtsürünü athakheah.”

²² Pilatnü alo, “Inü tümü thrütdünü, inü thrütdo.”

²³ Küyimki bonungrübonü Jisu yümkihkheanü api khimmihbo le shulün-pangkhümpübo arü abande khülang khülang lubah shihcham phüyi thsü. Shulün-pangkhümpü ju athüredung mülade akulimnü abolim khiungde bümkhüh lang keaka lakheah.

²⁴ Jumonü arünü arü bolung thaachih, “Isanü ha müruknaknü, tüshe ju shepü yo thsübanü azan thsanü,” junangde thaa lakhi amüsühyu dünji: “Arünü I khimmihbo arü bolung chama lu, tüsho I khimmih thsungkheak arünü azan thsü.” Jumonü bonungrübonü harü rhimo.

²⁵ Kheakü Jisu sangkim ki abe, abe niurü Klopa niube Mari, tüsho Mari Magdalen lakheah.

²⁶ Jumonü küyimki Jisunü abe le apinü amuzhokhi jingyanrü zhipde angükhea, apinü abe ki tha, “Aliberü, nü tsührü kheahang!”

²⁷ Jushu apinü jingyanbuh ki tha, “Nü be kheahang!” Tüsho ju kim chingnü jingyanbuhnü alibe ju anihbuh yam ching bede yü.

Jisu Shekhi

²⁸ Ju dunglim, kheaküa alala bando de mükheahbah, amüsühyu dünjipü thsüde Jisunü tha, “I Kethürilah!”

²⁹ Kheakü asan ke mide azahkhi phüh khülang ju kheak lakheah; arünü minapnü asan ke ching thsambah dükheangmung kheak yihkih, tüsho amün ching yukjih.

³⁰ Jumonü küyimki Jisunü asan ke leangkhikheanü, apinü tha, “ Ha bando!” Tüsho aku mükhümbah sheabah.

Jisu Rheang Düchipashungkhi

³¹ Jumonü ju athsakhamkhi nimung thsükhinü, pangbo ju Amuni sangkim kheak mükihpü lakhi hode (tümüde Amuni ju adungto nimung lakheah), arü jingbo yihshakbah lude atsopü thsüde Jihudarünü Pilat ki keokhi.

³² Judüki bonungrübo arü tüsho akhuhbuh le püpü api lung yümkih-a lakhi jingbo yihshak.

³³ Tüshe küyimki arünü Jisu kilim arübah api shea ngükhea, arünü ajingbo müyihshak.

³⁴ Tüshe bonungrü khülangnü api rheang ching thsühnü düchipashungjih, tüsho zukleangnü thiyih tüsho ke akhiuk.

³⁵ (Tüsho shepünü angükheanü thiyumütsan thsü, tüsho api thiyumütsan thiyuro; tüsho apinü thiyuro thachoh de apinü mükheahlah, junangde nüsanü akinbah.)

³⁶ Tümüde amüsühyu dünjipü thsüde harü rhimokheah, “Api robo khülang she müyihshak.”

³⁷ Tüsho kheaküshe amüsühyu püpünü thachoh, “Arünü düchipashungbuh kheak arünü akheahbah.”

Jisu Mi Bahkhi

³⁸ Ju dunglim Jisu jingyanrü Arimathearü Josepnü Jihudarü trekhinü ramde Jisu mi lude atsopü Pilat ki keokhi; tüsho Pilatnü api ki mülüjih. Jumonü apinü arübah Jisu mi ju lu.

³⁹ Tüsho akhuhlim Jisu kilim azhing ching arübuh Nikodemanü jinjinlak tüsho aloe düsahkhi rhümthüneabe khahngak 30 bande lubah arü.

⁴⁰ Jushu anenü Jisu mi lu, tüsho Jihudarü mibah yakli yande rhümthüneabebo bede amütri khimthünak ching hing.

⁴¹ Kheakü api yümkihkhi dangpung ju shahwün khülang lakheah, tüsho shahwün ching ju she müyapkhi kiuyuk aso khülang lakheah.

⁴² Jumonü anenü ju ching Jisu yapshih, tümütüsho ju Jihudarü athsakham nimung tüsho kiuyuk ju phünide alakheah,