JOHAN 16 - AMÜSÜH HÜM CL Bible (BSI)

¹ “Nüsa jing mümükhepü thsüde inü nüsa ki harü asukdo.

² Arünü nüsa sinagogbo chingnü ayankhitbah; am, shepünü nüsa laksahbanü, apinü ju rhimokhinü Thrünpuh tankihchoh de alümpü kim arüchoh.

³ Tüsho arünü harü nüsa ki rhimobah, tümütüsho arünü I Buh yungsho l mümükheah.

⁴ Tüshe inü harü nüsa ki thado, junangde küyimki kim arübanü, jurübo inü nüsa ki thakheah de nüsanü alümkhitbah. Tüsho inü harü nüsa ki atankih ching mütha, tümütüsho I nüsa lung lakheah.

Amüsüh Me Rhimo

⁵ “Tüshe kheakü I thiyibuh kilim I yüchoh, tüsho nüsa shenü she, ‘Nü külim yücho?’ de mükeo.

⁶ Tüshe inü nüsa ki harü thakhi hode, mulong rozhakkhinü nüsa mulong mia lah.

⁷ Tütüshe inü nüsa ki thiyuro thachoh. I yükhi ju nüsa yihnüpü lah; tümüde I müyüsho, arungrü nüsa kilim marü; tüsho I chamachihsho, inü nüsa kilim api arüshihbah.

⁸ Tüsho küyimki api arübanü, apinü alomi neak, thiyuro-lungki, tüsho mahkhap mütsanmükhibah:

⁹ neak dünkheak, tümütüsho arünü I kheak mükin;

¹⁰ thiyuro-lungki dünkheak, tümütüsho I Buh kilim I ayübah tüsho nüsanü I müngülo;

¹¹ mahkhap dünkheak, tümütüsho ha lomi yakzanshuhrü mahkhapdo.

¹² “Kheaküshe inü nüsa ki thapü ahihdo lah, tüshe nüsanü kheakü jurü marümkhuk.

¹³ Judüalalashe, küyimki thiyuro Me arübanü apinü nüsa thiyuro alala ching bebah; tümüde apinü nihbuh thiyukhümsühmühnü mütha, tüshe tümüpürü apinü asobanü athabah; tüsho adünjipü lakhi apinü nüsa ki thabah.

¹⁴ Apinü I müretahbah, tümüde küpü inü athakhi lanü apinü alubah tüsho ju nüsa ki khipkhitbah.

¹⁵ I Buh lakhi alala I yo ah. Jumonü inü athakhi apinü alubah tüsho nüsa ki ju khipkhitbah de inü nüsa ki thakheah.

Mulong Rozhak tüsho Asühpü

¹⁶ “Sühkhüh labah nüsanü I müngüde alabah; tüsho kheaküshe sühkhüh labah nüsanü I ngübah, tümütüsho I Abuh kilim yüchoh.”

¹⁷ Judüki api jingyanrü khürünü arü bolung thaachih, “Apinü isa ki, ‘Sühkhüh labah nüsanü I müngüde alabah; tüsho kheaküshe sühkhüh labah nüsanü I ngülobah’; tüsho ‘Tümütüsho I Buh kilim yüchoh,’ de athakhi ha tümü a?”

¹⁸ Jumonü arünü tha, “Sühkhüh labah de apinü athakhi ha tümü a? Apinü tümü thachonü isanü mümükheah.”

¹⁹ Kheakü arünü api ki keonelah de Jisunü mükheahbah apinü arü ki tha, “Nüsa bolung inü, ‘Sühkhüh labah nüsanü I müngü; tüsho kheaküshe sühkhüh labah nüsanü I ngülobah,’ de athakhi keokhiachihcho de?

²⁰ Atsütsü inü nüsa ki thachoh, nüsa atripbah tüsho atüzhobah, tüshe alomi a asühachihbah; nüsa mulong rozhakbah, tüshe nüsa mulong rozhak ju asühachihpü ching müthribah.

²¹ Aliberü küyimki thsünü ching labanü mulong rozhak lachoh tümütüsho anihbe kim arüdo; tüshe alibenü khungarü zübe müleangnü thsünü mülümkhitde kamchoh, tümüde mihtsürü asühkhi alomi ching zübedo.

²² Jumonü nüsa kheakü mulong rozhak lah; tüshe inü nüsa ngülobah tüsho nüsa mulong asühbah, tüsho nüsa asühkhi shenü she nüsa kheaknü lude mutso.

²³ Tüsho ju nimung nüsanü I ki tümü mükheang. Atsütsü inü nüsa ki thachoh, nüsanü tümüpürü I mung chingnü I Buh ki kheangbanü apinü nüsa kilim jihbah.

²⁴ Kheakü khiungde nüsanü I mung chingnü tümü mükheang. Kheangang tüsho nüsanü angübah, junangde nüsa asühkhi suhdahde alabah.

Alomi kurungkheak Akuk Ngükhi

²⁵ “Harü inü rüklimnü nüsa ki asukdo; tüshe inü nüsa ki rüklimnü müthapü kim arüchoh, tüshe inü nüsa ki Abuh dünkheak khipkhitde athabah.

²⁶ Ju nimung nüsanü I mung chingnü akheangbah, tüsho inü nüsa thsungkheak Abuh ki tamkhüntamnübah de mütha;

²⁷ tümüde Abuh küdahnü nüsa muzhochoh, tümütüsho nüsanü I muzhodo tüsho I ju Thrünpuh kilimnü arükheah de kindo.

²⁸ Abuh kilimnü I alomi ching arükheah. Kheaküshe, inü alomi zojihbah Abuh kilim yülobah.”

²⁹ Ajingyanrübonü api ki tha, “Kheahang, kheakü nünü khipkhitde thachoh, tüsho rüklimnü mütha!

³⁰ Kheakü nünü alala mükheahlah de isanü mükheahlah, tüsho shenü she nü ki keokhipü yihnüpü müla. Ha hode nü ju Thrünpuh kilimnü arükheah de isanü kinlah.”

³¹ Jisunü arü ki alode tha, “Nüsanü kheakü kincho shi?

³² Atsütsü kim arüchoh, am nüsanü I langzü zojihbah mihbüm aban nihbuh yam lim yüpü kheakü arüchoh. Tütüshe I langzü yung, tümütüsho Abuh I lung lah.

³³ I kheak nüsa mungtsü lapü thsüde inü harü nüsa ki asukdo. Alomi ching nüsa thsümütsü-ato labah; tüshe mulong ato thsang, inü alomi kukdo!”