JOHAN 12 - AMÜSÜH HÜM CL Bible (BSI)

Jisu kheak Müdangke Mujujihkhi

¹ Judüki phungho-thünio müngüh nimung thuruk lachoki, shebah apinü arhang kamloshihbuh Lazar lapung Bethani ching Jisunü arü.

² Ju ching arünü api khilim are-jim thsakham; tüsho Marthanü ahiuhakhip, tüshe Lazar a dükhüm ki binrü lung lakheah.

³ Judüki Marinü amo-chakkhi rhümthünea müdangke pungdüchi chamshakkhüh lubah Jisu jing kheak bukkihjih, tüsho anihbe kuyünü nanjih, tüsho müdangke rhümthüneakhinü thüyam mide kam.

⁴ Jushu api jingyanrü bolung, khülang api yinatsühpü lakhi Simon tsührü Juda Iskariotnü tha,

⁵ “Tümü thsükhi ha rhümthüneabe shotoyinchi nak 300 dün yinbah ju sho zhochihrü kilim müjihkhea?”

⁶ Ha apinü zhochihrü lümrhihmonü athakhi yung, tüshe api ju ahührü tüsho sho qiuqiu lamonü ah; tüsho ju ching yukkhi apinü lude la.

⁷ Judüki Jisunü tha, “Alibe langzü zojang; alibenü ha I mibah nimung thsungkheak zolah.

⁸ Tümüde zhochihrü a nüsa lung kamruhroro lah, tüshe I a nüsa lung kamruhroro lapü yung.”

Lazar azhihde Rük Yimkhi

⁹ Judüki Jihudarü ahihkhühnü api ju ching lakhi mükheah; tüsho arünü Jisu thsungkheaknü lang yung, tüshe apinü ashe chingnü arhang kamloshihkhi Lazar she akheahpü arükheah.

¹⁰ Jumonü amükeam putungrübonü Lazar she asheshihpü lümkhi thsü,

¹¹ tümütüsho api dünkheaknü Jihudarü ahihkhüh tsoabah tüsho Jisu kheak kin.

Akuk Ngüde Yüzahkhi

¹² Ashidopü thünio ching arükhi yimto atonü küyimki Jisu ju Jirusalem lim arüde asokhea,

¹³ ashisang khahbo lubah api shorupü wukhiuk, tüsho zhi, “Hosanna! Shepü Atungpuh mung ching arüchonü müngühmühi thsang! Israel kiulongthsüpuh Thrünpuhnü müngühshang!”

¹⁴ Jisunü donki nunu ngübah ha thrüta lakhi nangde ju kheak bin:

¹⁵ “Dütre, O Zion tsührübe; kheahang, nü kiulongthsüpuh donki nunu kheak binbah arüchoh.”

¹⁶ Akhuhlim api jingyanrübonü ha manikhit; tüshe küyimki Jisu müretahkheanü, api dünkheak harü thrütkhi tüsho api kheak ju dünjikhi arünü lümkhit.

¹⁷ Jumonü apinü Lazar kiuyuk chingnü ajikhitchoki tüsho ashe chingnü api arhang kamloshihchoki api lung larü mihtsürünü thiyumütsan thsü.

¹⁸ Ha dünkheaknü mihtsürübonü api shoru, tümütüsho apinü khinthiyinbe rhimodo de arünü so.

¹⁹ Jumonü Pharisirünü arü bolung thaachih, “Nüsanü tümü müthsükhukkhi nüsanü ngülah. Kheahang, alominü api dunglim yüabahdo!”

Greekrünü Jisu Yimkhi

²⁰ Kheakü thünio ching kingaünpü aturü bolung Greekrü khürü lakheah.

²¹ Judüki arünü Galilee ching lakhi Bethsaidarü Philip kilim arübah api ki keokhi, “Atobuh, isanü Jisu ngünelah.”

²² Philipnü arübah Andria ki tha, tüsho jushu Andria le Philipnü Jisu ki tha.

²³ Tüshe Jisunü arü ki alo, “Mihtsürü Tsührü müretahpü thsüde kim arüdo.

²⁴ Atsütsü inü nüsa ki thachoh, wheat hi ju alo ching ayobah müshikhitsho, ju ruk lang lachoh; tüshe ju shikhitsho, junü hi ahihdo mukhuhshihchoh.

²⁵ Shepünü nihbuh rhangdung muzhochonü ju adükheakbah, tüsho shepünü ha lomi ching nihbuh rhangdung thraneanchonü ju lün rhangdung thsungkheak labah.

²⁶ Khürünü I tankihsho, apinü I dunglim yanshang; tüsho I küching labanü I tankihrü she ju ching labah. Khürünü I tankihsho, I Buhnü api wüntre jihbah.

Jisunü Api Shepü Thakhi

²⁷ “Kheakü I me küpkhuklah, tüsho inü tümü thaba? ‘Abuh, ha kim chingnü I khümkhitang’ de athaba shi? Tüshe ha thsungkheaknü I ha kim ching arükheah.

²⁸ Abuh, nü mung müretahang.” Judüki yinmi chingnü düsheak khülang arü, “Inü müretahdo tüsho kheaküshe müretahbah.”

²⁹ Jumonü ju ki zhipkhi mihtsürübonü ju sobah tsüngmukdo de tha. Püpürünü tha, “Yunirü khülangnü api ki asukdo.”

³⁰ Jisunü tha, “Ha düsheak ju I yungde nüsa thsungkheak ah.

³¹ Kheakü ha lomi mahkhapkhi lah; kheakü ha lomi yakzanshuhrü yankhitbah.

³² Tüsho alomi chingnü I bekihsho, mihtsürü alala I kilim bea lubah.”

³³ Api tümünü ashebanü ju amütsan apinü athakheah.

³⁴ Mihtsürübonü api ki alo, “Khrista lünnü alabuh de isanü yakzan chingnü sodo; Mihtsürü Tsührü abekihbah de küde thsah nünü thacho? Mihtsürü Tsührü ha she a?”

³⁵ Jisunü arü ki tha, “Nüsa lung ayin ju anükhüh ruhde lah. Nüsanü ayin lachoki tsahang, jude yungsho amitingnü nüsa yanphuhbah; shepü amiting ching tsahchonü külim yüchonü mümükheah.

³⁶ Nüsanü ayin lachoki ayin kheak kinang, junangde nüsa ju ayin tsührübo kambah.” Jisunü harü thabah chamachih, tüsho arü kheaknü jikabah.

Mihtsürübonü Mükinkhi

³⁷ Tüshe apinü arü miki khinthiyinbe ahihdo rhimomo she arünü api kheak mükin,

³⁸ junangde wukihrü Isaianü athakhi yu dünjipü lakheah: “Atungpuh, shepünü isa yusheak kinkhea? Tüsho shepü ki Atungpuh khah akhiuka huhkhea?”

³⁹ Jumonü arünü mükinkhuk, tümütüsho Isaianü kheaküshe tha:

⁴⁰ “Apinü arü mük tukshih tüsho arü mulong müküpshih, jude yungsho arü mükbonü angübah tüsho mulongnü anikhitbah, tüsho rholode arübah inü arü thsüngubah.”

⁴¹ Harü Isaianü api müretah ngüchoki tüsho api dünkheak asukchoki thakheah.

⁴² Judüalalashe yakzanshuhrü bolung ahihkhühnü api kheak kin, tüshe Pharisirübo dünkheaknü arünü api ki malokhi, jude yungsho sinagog chingnü ayankhitbah;

⁴³ tümüde arünü Thrünpuh mungshi kheaknü mihtsürü mungshi alü muzhodo.

Jisu Yu hode Mahkhap

⁴⁴ Judüki Jisunü zhide tha, “Shepünü I kheak kinchonü, I yungde I thiyibuh kheak kinchoh.

⁴⁵ Tüsho shepünü I ngüchonü I thiyibuh ngüchoh.

⁴⁶ I ju alomi ching ayinatrüm khülang nangde arü, junangde sherünü I kheak kinbanü amiting ching müla.

⁴⁷ Tüsho khürünü I yubo sobah I mükinsho, inü api mahmükhapchoh; tümüde I alomi mahkhappü yung tüshe alomi khümkhitpü arükheah.

⁴⁸ Shepünü I bahyukcho tüsho I yubo müleangkhichonü mahkhap khülang lah; inü athakhi yu hode akheam nimung api mahkhapbah.

⁴⁹ Tümüde inü I yo thiyukhüm-sühmühnü masuk; tüshe inü tümü thaba tüsho tümü asukbanü I thiyibuh I Buhnü I ki thiyukhüm jih.

⁵⁰ Tüsho api yukhüm ju akheam müla rhangdung de inü mükheahlah. Jumonü inü tümüpürü asukchonü I Buhnü I ki thakhi nangde asukchoh.”