JOHAN 10 - AMÜSÜH HÜM CL Bible (BSI)

Namfimihnu Neakrü Shihdanglimyu

¹ Atsütsü inü nüsa ki thachoh, “Shepünü ripit chingnü yungde püpü limronü künde namfimihnubo yam ching yüzahchonü ahührü tüsho jangkhijangrarü ah.

² Tüshe shepünü ripit chingnü yüzahchonü namfimihnu neakrü ah.

³ Ripit neakrünü api kilim khimshuhjihchoh, tüsho namfimihnunü api düsheak sochoh; tüsho apinü anihbuh yo namfimihnubo mungnü jide bekhita luchoh.

⁴ Tüsho küyimki apinü namfimihnubo bekhitbanü, apinü arü müngüh yüchoh; tüsho namfimihnubonü api yanchoh, tümüde arünü api düsheak mükheahlah.

⁵ Arünü küyimkishe jaksorü dunglim a müyan, tüshe api kheaknü alihde atsobah, tümüde arünü jaksorü düsheak mümükheah.”

⁶ Jisunü ha shihdanglimyu arü ki tha, tüshe apinü arü ki asukkhi arünü manikhit.

Jisu ju Namfimihnu Neakrü Atsü

⁷ Judüki Jisunü arü ki tha, “Atsütsü inü nüsa ki thachoh, I namfimihnu ripit ah.

⁸ I müngühnü arürü alala ahührü tüsho jangkhijangrarübo, tüshe namfimihnubonü arü ki manijih.

⁹ I ripit ah. Khürünü I hode yüzahsho, api khümkhitbah, tüsho yüzahla akhiukla de rimlopung ngübah.

¹⁰ Ahührünü a ahühpü, alaksahpü, tüsho athsümünimpü lang düna marüchoh. Arü rhangdung lapü thsüde I arükheah, tüsho arübo muzhomopungde alabah.

¹¹ I namfimihnu neakrü atsü ah. Namfimihnu neakrü atsünü namfimihnubo thsungkheak api rhangdung jihchoh.

¹² Shepü namfimihnu neakrü yungde amulokhi la, shepü namfimihnu putungrü yungnü, rimre arükhi ngübah namfimihnubo bahjihbah alihde tsochoh; rimrenü namfimihnubo tholochoh tüsho yanmüzütchoh.

¹³ Amulokhinü alihde tsochoh tümütüsho api ju amulokheah tüsho namfimihnubo thsungkheak sükde mülüm.

¹⁴ I namfimihnu neakrü atsü; inü I yo namfimihnubo mükheahlah, tüsho arünü I mükheahlah.

¹⁵ I Buhnü I mükheahkhi nangde, inü I Buh mükheahlah; tüsho inü namfimihnubo thsungkheak I rhangdung jihchoh.

¹⁶ Namfimihnubo püpü ha yam ching mülakhi she inü bede arübah, tüsho arünü I düsheak anibah; tüsho arübo namfimihnu boto khülang tüsho namfimihnu neakrü khülang labah.

¹⁷ Jumonü I Buhnü I muzhochoh, tümütüsho inü ju ngülopü thsüde I rhangdung jihchoh.

¹⁸ Shenü she I kheaknü muluchoh, tüshe I küdahnü jihchoh. Jihabahpü I wu lah, tüsho ju lulopü I wu lah. Ha yukhüm I Buh kilimnü aleangkhikheah.”

¹⁹ Jumonü harü yubo dünkheaknü Jihudarü bolung achamnak lakheah.

²⁰ Tüsho arü ahihkhühnü tha, “Api amünean me lah tüsho bünchoh. Tümüde nüsanü api ki anicho?”

²¹ Püpürünü tha, “Harü ju amünean me larü yubo yung. Amünean menü müktukrü khimshuhkhukba de?”

Jisu Bahyukkhi

²² Kheakü Jirusalem ching amüsühkhitkhi thünio lakheah, tüsho ju tsüngkam lakheah.

²³ Tüsho Jisu ju arüngyam limkhuh Solomon ayinkhe khüp tsahde alakheah.

²⁴ Judüki Jihudarünü api zündo tüsho tha, “Külokhüh nünü isa lümshangmang ching lashihba? Nü Khrista a sho isa ki khipkhitde thaang.”

²⁵ Jisunü arü ki alo, “Inü nüsa ki thado, tüshe nüsanü mükin. Inü I Buh mung chingnü arhimokhibonü I thiyumütsanbo jihchoh.

²⁶ Tüshe nüsanü mükin, tümütüsho inü nüsa ki thakhi nangde nüsa ju I yo namfimihnubo yung.

²⁷ I yo namfimihnubonü I düsheak anichoh, tüsho inü arü mükheahlah, tüsho arünü I dunglim yanchoh.

²⁸ Inü arü kilim lün rhangdung jihchoh, tüsho arübo küyimkishe müdükheak; yungsho shenü she I khah chingnü arübo jangkhide mutso.

²⁹ I Buh, shepünü arübo I kilim jihkheanü alala kheaknü atobe ah; tüsho shenü she I Buh khah chingnü arübo müjangkhikhuk.

³⁰ I tüsho I Buh khülang ah.”

³¹ Judüki Jihudarübonü api kingpü lungbo lulo.

³² Jisunü arü ki tha, “I Buh kilimnü inü rhimo atsü ahihdo nüsa kilim huhdo. Jurü rhimobo küpü dünkheak nüsanü I kingcho?”

³³ Jihudarübonü api ki alo, “Rhimo atsü dünkheak isanü nü müking, tüshe mükhemürangkhi dünkheak ah, tümütüsho nü mihtsürü thsübah Thrünpuh khechoh.”

³⁴ Jisunü arü ki thalo, “Nüsa thrünpuhbo ah de Thrünpuhnü athakhi nüsa yakzan ching thrüta müla de?

³⁵ Apinü Thrünpuh yu arüshihrü ki thrünpuhbo de jisho (tüsho amüsühyu ju müthsümünimkhuk),

³⁶ inü I Thrünpuh tsührü de athamonü, Abuhnü tsangkhitde alomi ching arüshihbuh ki, ‘Nünü mükhemükimchoh,’ de nüsanü thacho de?

³⁷ Inü I Buh rhimobo müthsüsho, I dükin;

³⁸ tüshe inü rhimosho, nüsanü I mükina lalashe, rhimobo kinang, junangde I Buh I kheak lah tüsho l api kheak lah de nüsanü amükheahbah tüsho akinbah.”

³⁹ Jumonü arünü api rampü yimlo, tüshe arü khah chingnü api tsokhit.

⁴⁰ Tüsho apinü Jordan hobah Johannü akhuhde baptikhi dangpung ching yü tüsho ju ching bin.

⁴¹ Judüki ahihkhüh api ki arübah tha, “Johannü khinthiyinbe mürhimo, tüshe Johannü ha mihtsürü dünkheak thakhi alala thiyuro lah.”

⁴² Tüsho ju ching ahihkhühnü api kheak kin.