JOEL 2 - AMÜSÜH HÜM CL Bible (BSI)

Tangkhobonü Atungpuh Nimung Amütsan

¹ Zion ching hulipungpung mütang; I amüsüh müzüng kheak alanang! Lomi mihtsürü alala ajanshang, tümüde Atungpuh nimung arüchoh, ha thüninde lah–

² amiting tüsho azhingdokhi nimung, amobo lakhi tüsho kheahde amitingkhi nimung khülang! Müzüngbo kheak amürak liukihkhi nangde ato tüsho wulakhi tangkho bonungrü arüchoh; arü nangde adüsonü mülaakheah, yungsho arü dunglim arüpü lünbo ching mülalo.

³ Arü müngüh mo takchoh tüsho arü dunglim motru aniuchoh. Arü müngüh alo ju Eden shahwün nangde lah, tüshe arü dunglim a athsümünim sunglo nangde lah, tüsho tümü she arü kheaknü mutsokhi.

⁴ Arübo khorabo nangde lah, tüsho thirithsü-khorabo nangde arübo alihchoh.

⁵ Khora-lolungbebonü atruktrukkhi nangde, arünü müzüng mujukbo kheak jukchoh, motrunü reapreapde sünit aniukhi nangde, wulakhi bonungrü nangde keochihpü shihkhin thsüchoh.

⁶ Arü müngüh mihtsürübo thsünü ching lah, alala miro pheakmulukdo kamchoh.

⁷ Thirithsürü nangde arünü yanchoh, bonungrü nangde rhü kheak künkihchoh. Mihbüm abannü nihbuh ru ching lah, arünü arü limrobo chingnü manguh.

⁸ Arü khülangnü khülang mükhangachih, mihbüm abannü nihbuh ru ching lah; arünü thüram hode leamde yüchoh tüsho tümünü arü muwuhlo.

⁹ Arünü kiuto kheak jukchoh, arünü rhübo kheak alihchoh; arünü thüyambo kheak künkihchoh, arünü ahührü nangde ayinripit chingnü yüzahchoh.

¹⁰ Arü miki alonü niukchoh, thüningbo ajanchoh. Ani tüsho khinu mitinga lah tüsho chiningbonü arü ayin tukloa lah.

¹¹ Atungpuhnü api bonungrü kumung adüsheak thsüchoh; api bonungrü küdükhüh she hihla! api yukhüm anirü mükhebinkhi lah. Tsükjide Atungpuh nimung ato ah; atsütsü atrebe–shenü ju arümkhukba?

Mulong Müthripü Jikhi

¹² Kheaküshe, Atungpuhnü thachoh, khümkeak thsüde, tripde tüsho tüzhode, nüsa mulong alalanü I kilim rholoang.

¹³ Nüsa khimmih yungde nüsa mulong yihthünakang. Atungpuh , nüsa Thrünpuh kilim rholoang, tümüde api ju mihmuzho tüsho mihmüthsüm, arünnü bukakhiukchoh, tüsho düküngde amuzhopü suhdahde lah tüsho thsümüchi chingnü lümalochoh.

¹⁴ Khükia Atungpuh nüsa Thrünpuhnü api lümkhi müthribah tüsho suhdahde nüsa ki hi müngühjihbah. Junangde nüsanü hi tüsho yukhu api ki jihbah.

¹⁵ Zion ching hulipungpung mütang; khümkeak thsüpü zhiyukang; amüsüh amukhung lapü jiang;

¹⁶ mihtsürübo bemukhungang, amukhungrü müsühkhitang; ashinbuhrübo bemukhungang; azürübo bemukhungang, niuh yungrü khungarübo she. Niuberü lubuhnü nihbuh khiungshak bahkhishang, tüsho arhangberünü nihbe khiungshak bahkhishang.

¹⁷ Mükü tüsho kingaün sadam dükeak ching Atungpuh tankihrü, amükeamrübonü tripshang. Arünü thashang, “ Nü mihtsürübo aninga lashang, O Atungpuh , tüsho nü yamrüplurüp ha trükshih bolung keangrümüne, münedung dükamshih. Tümüde mihtsürü bolung ha thashihpü, ‘ Arü Thrünpuh küching la?’”

Atungpuhnü Alojihkhi

¹⁸ Judüki Atungpuhnü api lomi thsungkheak lümrhihde kam, tüsho api mihtsürü kheak amuzho la.

¹⁹ Api mihtsürü ki alojihde Atungpuhnü tha: Inü nüsa kilim hi, yukhu tüsho müdangke arüshihchoh, tüsho nüsa reangkeambah; tüsho kheaküa inü nüsa trükshih bolung mükhemükim mükamshih.

²⁰ Inü dukulim bonungrü nüsa kheaknü limshude atsoshihbah, tüsho loshelo le tümü masürükhi lo ching yana yüshihbah, mikhuh larübo aniakhiuklim keto ching, tüsho dunglimrü aniyüzahlim keto ching tsoshihbah; ashemibo shuhrhüm münimbah. Tümütüsho arünü nüsa kheak tode rhimodo.

²¹ Dütre, O alo; asühang tüsho asühachihang, tümüde Atungpuhnü ato rhimodo!

²² Dütre, nüsa mütüm shiwühbo, tümüde sunglo rimbo phüyaklah; sangdungbonü aso asochoh, khubaso tüsho kurungaso suhdahde lah.

²³ O Zion zürübo, Atungpuh nüsa Thrünpuh lung asühang tüsho asühachihang; tümüde apinü thiyuro-lungkinü nüsa kilim mumükin tsüng jihdo. Apinü nüsa kilim suhdahde, mumükin tüsho mükheankim tsüng püpüki nangde arüshihdo.

²⁴ Rhimopung ju hinü mide alabah, pangjiphühbo yukhu tüsho müdangkenü zhikhiukbah.

²⁵ I bonungrü ato, nüsa azhihde inü arüshihkhi, tangkho boto ajukbe, athsümünimrü tüsho ayihshakrünü atsühkhi kambo ching nüsa kukshahkhi inü ajihlobah.

²⁶ Nüsanü muzhomopungde atsühbah tüsho reangkeambah, tüsho nüsa ki amüyinsahbe rhimobuh Atungpuh nüsa Thrünpuh mung shibah. Tüsho kheaküa I mihtsürübo küyimkishe achih müngüshih.

²⁷ I Israel bolung lah de nüsanü mükheahbah, tüsho I, Atungpuh nüsa Thrünpuh ah tüsho püpü she müla. Tüsho kheaküa I mihtsürübo küyimkishe achih müngühshih.

Atungpuh Nimung

²⁸ Ju dunglim inü alala kheak I me dungkihbah; nüsa tsührübo tüsho nüsa tsührübebonü müchitbah, azobuhrübonü milimbo mibah, tüsho athrününgtsüngbonü michihbo ngübah.

²⁹ Athrürü tüsho aliberü yamlarübo kheak she, ju nimungbo ching inü I me dungkihbah.

³⁰ Inü thüningbo ching tüsho alomi kheak amüyinsahbebo, thiyih tüsho mo le mokhüh liude ahuhbah.

³¹ Atungpuh nimung ato tüsho atrebe müngüh ani ju mitingdo akambah, tüsho khinu ju thiyih kambah.

³² Judüki sherünü Atungpuh mung jibanü akhümkhitbah; tümüde Atungpuhnü athakhi nangde, Zion Müzüng tüsho Jirusalem ching atsokhitrü labah, tüsho rhangdung larü bolung ching Atungpuhnü ajirü labah.