JOEL 1 - AMÜSÜH HÜM CL Bible (BSI)

¹ Pethuel tsührü Joel kilim arükhi Atungpuh yu ha lah.

Mihtsürübonü Tüzhokhi

² Ha aniang, O azothsürübo, nükhün muphoang, lomi ching larü alala! Hadürü nüsa nimungbo, yungsho nüsa jipürü nimung ching dünjidü de?

³ Nüsa tsührübo ki ha thaang, tüsho nüsa tsührübonü arü tsührübo ki, tüsho arü tsührünü lün püpü ki thashang.

⁴ Tümü anguhshakbe tangkhonü aningshih-a la, tangkho botonü tsühdo. Tümü tangkho botonü aningshih-a la, ajukbe tangkhonü tsühdo, tüsho tümü ajukbe tangkhonü aningshih-a la, athsümünimbe tangkhonü tsühdo.

⁵ Asürang, nüsa amüshangrübo, tüsho tripang; tüsho nüsa yukhu yungrü alala amühdo yukhu dünkheak tüzhoang, tümüde ju nüsa mün kheaknü mülade kamdo.

⁶ Tümüde trükshih khülang I lomi ching azahdo, sühmüh lakhi tüsho mükhebinkhi; ahü ju kekhüzü hü ah, tüsho kekhüzü dreto hülangpü nangde lah.

⁷ Hanü I yo kurungaso thsümünimdo, tüsho I yo khubasodungbo müjakdo; akhahbo müyedo mükamyi khiungde aküp khuka bahdo.

⁸ Anünürü khülangnü arhangpü thsüchoki nihbe müyambuh shekhi shungliukhim phuyubah tüzhokhi nangde tüzhoang.

⁹ Hi kingaün tüsho ayungbe kingaün Atungpuh yam chingnü tuklodo. Atungpuh tankihrü, amükeamrübonü tüzhochoh.

¹⁰ Thulubo thsümünima lah, alonü tüzhochoh; tümüde hi thsümünima lah, yukhu kunga lah, müdangke müla.

¹¹ Mulong dükheakang, nüsa thulu thsürübo, tüzhoang, nüsa kurungasolu thsürübo, wheat hi tüsho barli hi dünkheak; tümüde thulu ching hibo thsümünima lah.

¹² Kurungaso kungabahdo, khubasodung yiuhabahdo. Tsarümkiu, ashisang, tüsho mukhiuk– thulu sangdung alala yiuhabahchoh; tsükjide, mihtsürü bolung asühpü kungabahchoh.

¹³ Shungliukhim phuyuang tüsho tüzhoang, nüsa amükeamrübo; tüzhoang, nüsa kingaün sadam kheak tankihrübo. Arang, shungliukhim chingnü tsüngre hoshang, nüsa I Thrünpuh tankihrübo! Hi kingaün tüsho ayungbe kingaün nüsa Thrünpuh yam chingnü tukloa lah.

¹⁴ Khümkeak khülang lapü zhiyukang, amüsüh amukhung khülang lapü jiang. Azothsürübo tüsho lomi mihtsürü alala Atungpuh nüsa Thrünpuh yam ching mukhungang tüsho Atungpuh ki zhiang.

¹⁵ Nimung thsungkheak aha! Tümüde Atungpuh nimung thüninde lah, tüsho athsümünimpü Wuto kilimnü arüchoh.

¹⁶ Isa mük kinü tsühyungpü, asühachih tüsho asühpü isa Thrünpuh yam chingnü mutuklo de?

¹⁷ Müjihbo alo akung khüp dütsüpabahchoh, zowupungbo thsümünima lah; jakambo lunga lah, tümütüsho hi müla.

¹⁸ Küdükhüh shiwühbonü khungcho! Moshi boto rümde tsahchoh tümütüsho arü thsungkheak rim müla; namfimihnu boto she küpkhukchoh.

¹⁹ O Atungpuh , nü ki inü zhichoh: Tümüde monü sunglo rim muliuabahdo, tüsho motrunü thulu sangbo alala takabahdo.

²⁰ Mütüm shiwühbonü she nü ki khungchoh tümütüsho kenübo ngah-a lah, tüsho monü sunglo rim muliuabahdo.