JIHUSUA 4 - AMÜSÜH HÜM CL Bible (BSI)

Lümrhih Lungbo Khimkhi

¹ Küyimki mihtsürü athrünkhi Jordan hokhea, Atungpuhnü Jihusua ki tha,

² “ Trük aban chingnü khülang khülang mihtsürü 12 mokhitang,

³ tüsho Jordan phulung ching amükeamrü zhippung chingnü lung 12 shuh-a handarübahle, nüsa khihre binkheampü lakhi dangpung ching thiyukhüm jih-a khimshang.”

⁴ Jumonü Israel ching mihtsürü 12 mokhitkhi ju Jihusuanü ji

⁵ tüsho apinü arü ki tha, “Atungpuh nüsa Thrünpuh sangdan müngüh Jordan phulung yüang, tüsho Israel trük abande nüsa dubuh kheak lung khülang khülang shuhkih-a hanang.

⁶ Ha lungbo hode Atungpuhnü arhimokhi mihtsürübo ki lümkhitloshihbah. Arübe kim ching nüsa tsührübonü ha lungbo amütsan keokhisho,

⁷ Atungpuh tangzüng sangdan ayung hanhochoki, Jordan keto mubukde akamkheah de arü ki thaang. Ha ching tümü dünjikheanü Thrünpuhnü mihtsürübo ki lünnü ha lungbo hode alümkhitshihbah.”

⁸ Jihusuanü thiyukhüm jihkhi nangde Israelrünü rhimo. Atungpuhnü Jihusua ki thakhi nangde, arünü Israel trük abande lung 12 Jordan phulung chingnü lubahle arü binkheampung handarü khim.

⁹ Tüsho Jihusuanü she tangzüng sangdan hanrü amükeamrü zhippung Jordan phulung ching lung 12 khim, jurü khihni khiungde zhiplah.

¹⁰ Thrünpuhnü Jihusua ki thiyukhüm jihkhi alala mihtsürübonü mürhimokhamchoki khiungde sangdan shuhrü amükeamrübonü Jordan phulung ching zhipde aleang. Haju ha Mosanü thiyukhüm jihkhi yande rhimo, tüsho mihtsürübonü niokheamde ayung ju ho.

¹¹ Küyimki arübo dükihlim peang khiungkhea, amükeamrübonü A TUN GPU H tangzüng sangdan hanbah mihtsürübo müngüh yü.

¹² Mosanü thiyukhüm jihkhi yande, Reuben, Gad tüsho Manase chamkhüh trükbonü keochihpü thsühnuk thsakhambahle Israelrü müngüh yü.

¹³ Mihtsürübo 40,000 ngüm keochihpü thsüde Atungpuh müngüh Jirikho dükhün ching yü.

¹⁴ Ju nimung Atungpuhnü arhimokhi hode Israel mihtsürü miki Jihusua ato kamshih. Mosa kheak wüntre jihkhi nangde api rhangdung amuyung arünü api kheak wüntre jih.

¹⁵ Atungpuhnü Jihusua ki tha,

¹⁶ “ Amükeamrübo tangzüng sangdan hanbah Jordan chingnü akhiukshihpü thiyukhüm jihang.”

¹⁷ Jihusuanü thiyukhüm jih, “ Jordan chingnü akhiukang.”

¹⁸ Küyimki Atungpuh tangzüng sangdan hanrü amükeamrübo Jordan phulungnü akhiuk tüsho amükeamrübo jingnü alo akung qiukhea, Jordan ke ju abukpung alodarü tüsho püpüki nangde ayung mide buk.

¹⁹ Mihtsürübo akhuhbe khinu thürü nipü Jordan chingnü akhiuk tüsho Jirikho aniakhiuklim, Gilgal ching binkheampü khimyam thsü.

²⁰ Ju ching Jihusuanü Jordan ching yo lung 12 handarünü khim.

²¹ Apinü Israelrübo ki tha, “ Arübe kim ching, nüsa tsührübonü ha lungbo amütsan keokhisho,

²² Israelrü Jordan hode akung lo ching yükhi arü ki mükheahshang.

²³ Amürüm keto ngahshihkhi nangde, nüsa muhochoki khiungde Jordan keto she Atungpuh nüsa Thrünpuhnü ngahshihdo de arü ki nüsanü thaang.

²⁴ Ha hode alomiküp ching mihbüm abannü Atungpuh wu-sühmüh ato mükheahbah, tüsho Atungpuh nüsa Thrünpuh nüsanü lünnü wüntre jihbah.”