JIHUSUA 3 - AMÜSÜH HÜM CL Bible (BSI)

Israelrübo Jordan Hokhi

¹ Ashido yapsu Jihusua tüsho Israelrü alala mükikde asürübah Shittim ching akhin, tüsho Jordan ching yübah muhochoki khiungde ju ching binkheam.

² Nimung mahsam dunglim limberübonü khimyam hode yü

³ tüsho mihtsürübo ki tha, “ Küyimki nüsanü amükeamrübo Atungpuh nüsa Thrünpuh tangzüng sangdan hanbah angübanü, khimyam lukang tüsho arü yanang,

⁴ junangde nüsa yüpü limro nüsanü amükheahbah tümüde nüsa püpüki ha limro arüamükheah, tüshe tangzüng sangdan phünide düyü; kilomitir 1 ngüm ching tsahang.”

⁵ Jihusuanü mihtsürübo ki tha, “Nüsabo tsangkhitang, tümüde shido Atungpuhnü nüsa bolung khinthiyinbe rhimobah.”

⁶ Tüsho apinü amükeamrübo tangzüng sangdan hanbah mihtsürübo müngüh thiyia yüshih. Apinü athakhi nangde arünü rhimo.

⁷ Atungpuhnü Jihusua ki tha, “Inü tümü khihre rhimobanü junü Israelrü athrünkhinü nü atorü ah de wüntreshihbah, tüsho inü künangde Mosa lung lakheanü junangde nü lung she lah de arünü amükheahbah.

⁸ Tangzüng sangdan shuhrü amükeamrübo ki nünü hade thiyukhüm jihang, küyimki nüsa Jordan ke münküp ki arübanü, nüsa Jordan ching zhikde zhipang.”

⁹ Jumonü Jihusuanü Israelrübo ki tha, “ Ha ching arang tüsho Atungpuh nüsa Thrünpuh yu aniang.

¹⁰ Jihusuanü tha, Hade athsükhinü nüsanü rhangdung Thrünpuh nüsa lung lah de amükheahbah, apinü nüsa müngühnü Kananrü, Hitrü, Hivrü, Perizrü, Girgashrü, Amorrü tüsho Jebusrü mülakphahde ayankhitbah.

¹¹ Lomi alala kurungkheak Atungpuh tangzüng sangdan ju nüsa müngüh Jordan lim hanbah ayübah.

¹² Kheakü Israelrü trük aban chingnü khülang khülang mihtsürü 12 mokhitang.

¹³ Küyimki amükeamrübonü alomi kurungkheak A TUN GPU H tangzüng sangdan shuhbahle arü jing ke ching tsahyukbanü, Jordan ke mubukde akambah, tüsho ke bukde akikhi ju dangkhüh kingmukhungbah.”

¹⁴ Jumonü küyimki mihtsürübo Jordan hopü mihtsürü müngüh amükeamrübo tangzüng sangdan hanshihbah, arü khimyam chingnü atsahmusukhea,

¹⁵ tüsho küyimki amükeamrübonü tangzüng sangdan hanbah ke münküp ching tsahyukkheanü Jordan ke ju yimlu ruhroro bukkhitde buk,

¹⁶ tüsho achanglimnü bukde akikhi ju tuklo tüsho kingmukhungde Zarethan kiuto yean Adam kiuto khiungde kingmukhung, junangde Araba keto lim bukde ayükhi yung ju tukloabah tüsho mihtsürübo Jirikho phünide ju hokhukde yü.

¹⁷ Küyimki mihtsürübo akung lo kheak tsahhode ayükhea, mihtsürü alala muhokhamchoki amükeamrübonü Atungpuh tangzüng sangdan shuhbah Jordan phünide akung lo kheak zhipde aleang.