JIHUSUA 24 - AMÜSÜH HÜM CL Bible (BSI)

Shekem ching Tangzünglokhi

¹ Jihusuanü Israel trük alala Shekem ching bemukhung, tüsho apinü azothsürübo, mahkhaprübo tüsho Israel atorübo ji tüsho arübo Atungpuh miki arü.

² Jihusuanü mihtsürübo ki tha, “ Ha Atungpuh Israel Thrünpuhnü thachoh: Adüso nüsa jipürü Tera tüsho atsührü Abraham tüsho Nahor, Ephraim ayung thripkhüh lim lade püpürü thrünpuhbo kingaünkheah.

³ Tüsho inü nüsa jipürü Abraham ju Euphra chingnü bekhitbahle Kanan lo alala behode yü, tüsho tsühsoniuso amükhebin jih. Inü api kilim Isak jih;

⁴ tüsho Isak kilim Jakob tüsho Esau jih. Esau kilim inü Edom awung lomi api lapung lo thsüpü jih tüshe Jakob le atsührübo a Ijip ching yüki.

⁵ Judüki inü Mosa tüsho Aron ane yüshih, tüsho inü Ijip ching arüm hanyuk. Ju dunglim inü nüsa jipürü Ijip chingnü bekhit.

⁶ Inü nüsa jipürü Ijip chingnü bekhit, tüsho Ijiprübonü arü dunglim khora lolungbe tüsho khora-berü bebah müshamde Amürüm keto khiung.

⁷ Küyimki arünü I ki zhikhea, inü arü le Ijiprü dükeak zhingdoshih, tüsho keto ju Ijiprü kheak bukde arüshihbah arübo thüraksah. Inü Ijiprü kheak tümü rhimokheanü nüsa müknü ngüdo; ju dunglim nüsa sunglo ching ashangkhüh lado.

⁸ Tüsho inü nüsa Jordan aniakhiuklim Amorrü lo ching bedarü. Arünü nüsa bede keochih, tüshe inü arübo nüsa khah ching jih tüsho nüsanü arü lo lu, tüsho inü nüsa müngühnü arü dükheakshih.

⁹ Tüsho Zippor tsührü Balak, Moab kiulongthsüpuhnü Israel bede keochih; tüsho apinü Beor tsührü Balaam thiyia nüsa athrushih,

¹⁰ tüshe inü Balaam yu mani; jumonü apinü nüsa müngühjih; junangde api khah chingnü inü nüsa bekhit.

¹¹ Küyimki nüsa Jordan hobah Jirikho lim arükhea, Jirikho mihkhungbonü nüsa bede keochih tüsho Amorrü, Perizrü, Kananrü, Hitrü, Girgashrü, Hivrü, tüsho Jebusrünü bede keochih. Tüshe arü alala inü nüsa kilim jih.

¹² Amorrü kiulongthsü mahne yankhita bahshihpü inü mukhuto nüsa müngüh yüshih; hoju nüsa nukshang yungsho sanglühnü yung.

¹³ Nüsanü küyimkishe thulu müthsükhi tüsho kiuto müthrünkhi lo inü nüsa kilim jih tüsho nüsa ju ching lachoh; nüsanü amükhimkhibo kurungasolu tüsho oliv lu chingnü aso tsühchoh.”

¹⁴ “Jumonü Atungpuh wüntreang, tüsho rhüngrhüngde tüsho thiyuronü api tankihang; nüsa jipürünü ke thripkhüh tüsho Ijip ching kingaünkhi thrünpuhbo bahkhiang tüsho Atungpuh tankihang.

¹⁵ Kheakü nüsanü api mütankihnesho, nüsa lakhi lo ching nüsa jipürünü akingaünkhi kethripkhüh yungsho Amorrü thrünpuhbo tankihba shi shepü tankihbanü khihni mokhitang; tüshe I tüsho I yamkhün a Atungpuh tankihbah.”

¹⁶ Judüki mihtsürübonü alo, “Püpü thrünpuhbo tankihpü thsungkheak isanü Atungpuh mübahyuk;

¹⁷ tümüde Atungpuh isa Thrünpuhnü isa jipürü tüsho isa Ijip azhorü kuhi chingnü bedarü, tüsho apinü amüyinsahbe rhimokhi isanü ngü. Isanü hode arükhi limro tüsho mihtsürü bolung chingnü apinü isa khümkhit;

¹⁸ tüsho ju lo ching larü Amorrübo Atungpuhnü isa müngühnü yankhitabah. Jumonü isa she Atungpuh tankihbah, tümüde api isa Thrünpuh.”

¹⁹ Tüshe Jihusuanü mihtsürübo ki tha, “Nüsanü Atungpuh mütankihkhukpü labah tümüde api amüsüh Thrünpuh, api mükthsü Thrünpuh; nüsanü alakmihkhi yungsho neakbo apinü mübahjih.

²⁰ Nüsanü api bahyukde khiungkerü thrünpuhbo tankihsho, apinü nüsa ki atsü rhimo dunglim rholobah nüsa thsümüchide adükheakshihbah.”

²¹ Tüsho mihtsürübonü Jihusua ki tha, “Yung! Isanü Atungpuh tankihbah.”

²² Judüki Jihusuanü arü ki tha, “Nüsa zangrünü nüsa thiyumütsan thsüde nüsanü Atungpuh tankihpü mokhitdo.” Tüsho arünü tha, “Isa thiyumütsan ah.”

²³ Apinü tha, “Dale tüsho nüsa bolung lakhi khiungkerü thrünpuhbo bahyukang, tüsho Atungpuh Israel Thrünpuh kheak nüsa mulong jihang.”

²⁴ Mihtsürübonü Jihusua ki tha, “Atungpuh isa Thrünpuh isanü tankihbah, tüsho isanü api düsheak anibah.”

²⁵ Jumonü Jihusuanü mihtsürübo thsungkheak ju nimung tangzüng thsakham, tüsho Shekem ching arü thsungkheak yakzan tüsho thiyuzüngbo thsüjih.

²⁶ Jihusuanü harü yubo Thrünpuh yakzan hüm ching thrütyuk; tüsho apinü lung ato khülang lubahle Atungpuh arüngyam ki thülamdung khüp khima zo.

²⁷ Jihusuanü mihtsürü alala ki tha, “ Kheahang, ha lungnü isa thiyumütsan thsübah; tümüde Atungpuhnü isa ki thakhi yu alala sodo; jumonü nüsa Thrünpuh kheak thiyuro mülasho hanü nüsa azhihde thiyumütsan thsübah.”

²⁸ Jumonü Jihusuanü mihtsürübo ju buh lapungpung ching thiyia tsoshih.

Jihusua tüsho Eleazar Shekhi

²⁹ Ju dunglim Nun tsührü Atungpuh yamlarü Jihusua kam 110 labah she.

³⁰ Arünü api mi anihbuh lo Gaash wung dukulim Ephraim awung lomi Timnath Sera ching kiuyukabah.

³¹ Jihusua rhangdung la khiungde Israel mihtsürübonü Atungpuh tankih, tüsho api sheshu she Atungpuhnü Israel mihtsürübo thsungkheak rhimokhi ngürü limberübo lakhi khiungde tankih.

³² Josep robo Israelrünü Ijip chingnü handarükhi ju, Jakobnü Shekem abuh Hamor tsührübo kheak shotoyinchi 100 jihbah athulokhi lo ching kiuyukabah; ju Josep tsührü yamrüplurüp kamabah.

³³ Aron tsührü Eleazar sheabah; tüsho atsührü Phinehas kilim jihkhi Ephraim awung lomi Gibea ching arünü api mi kiuyukabah.