JIHUSUA 21 - AMÜSÜH HÜM CL Bible (BSI)

Levirü Kiutobo

¹ Judüki Levirü limberübonü amükeambuh Eleazar, Nun tsührü Jihusua tüsho Israel trük guk ching akuthsürübo ki yü;

² Kanan lomi Shilo ching arünü arübo ki tha, “Isa lapung kiutobo, tüsho shiwüh akampü kimtsüh jihshihpü Mosa hode Atungpuhnü thiyukhüm jihdo.”

³ Jumonü Atungpuhnü thiyukhüm jihkhi nangde Israelrünü kiutobo tüsho shiwühbo akampü mükeak arü yamrüplurüp chingnü Levirü kilim jih.

⁴ Kohath guk kilim akhuhde ajihpü shihcham akhiuk. Jumonü amükeambuh Aron yamkhün chingnü atrükkhitrü Levirü kilim Juda, Simeon, tüsho Benjamin trük lomibo chingnü shihcham thsüde kiuto 13 jih.

⁵ Aningkhi Kohath guk kilim Ephraim, Dan, tüsho aniyüzahlim lomibo chingnü shihcham thsüde kiuto 10 jih.

⁶ Gershon guk kilim Issakar, Asher, Naphtali, tüsho Bashan ching lakhi aniakhiuklim Manase chingnü shihcham thsüde kiuto 13 jih.

⁷ Merari guk yamkhün kilim Reuben, Gad, tüsho Zebulun lomibo chingnü kiuto 12 jih.

⁸ Atungpuhnü Mosa ki thiyukhüm jihkhi yande shihcham thsüde harü kiutobo tüsho rimlopung Levirü kilim Israelnü jih.

⁹ Harübo ha Juda tüsho Simeon trükbo chingnü amung jide ha kiutobo jih,

¹⁰ jurü ju Levirü kheaknü atrükkhitrü Kohath guk tüsho Aron tsühsoniusobo thsungkheak lakheah, tümütüsho akhuhde arü kilim jihpü azan thsükhit.

¹¹ Arü kilim Juda awung lomi ching lakhi Kiriath-arba (Arba ju Anak abuh), ju Hebron, ju mühi rimlopungbo bede jih.

¹² Tüshe kiutobo tüsho kiulongbo lubo ju Jephunne tsührü Kaleb kilim yamalo thsüshihpü jih.

¹³ Amükeambuhnü Aron tsühsoniusobo kilim arünü mihtsürü laksahrü tsoyukpung kiuto jihkhi ju Hebron, Libna,

¹⁴ Jattir, Eshtemoa,

¹⁵ Holon, Debir,

¹⁶ Ain, Jutta, tüsho Beth Shemesh: Juda tüsho Simeon trük chingnü kiuto 9.

¹⁷ Benjamin trük chingnü rimlopungbo bebah ajihkhi: Gibeon, Geba,

¹⁸ Anathoth, tüsho Amon; ju kiuto 4.

¹⁹ Amükeambuh Aron tsühsoniusobo kilim rimlopungbo bede ajihkhi lo alalanü kiuto 13.

²⁰ Levi yamkhün ching Kohath guk püpürü kilim a Ephraim trük chingnü kiutobo jih.

²¹ Arü kilim rimlopungbo bede ajihkhi ju: Ephraim awung lomi ching lakhi mihlaksahrü tsoyukpung kiutobo ju Shekem, Gezer,

²² Kibzaim, tüsho Beth Horon, ju kiuto 4.

²³ Dan trük chingnü arü kilim rimlopungbo bede ajihkhi kiuto 4: Elteke, Gibbethon,

²⁴ Aijalon, tüsho Gathrimmon.

²⁵ Aniyüzahlim Manase lomi chingnü arü kilim rimlopungbo bede ajihkhi kiuto 2: Taanak tüsho Gathrimmon.

²⁶ Aningkhi Kohath guk yamkhünnü rimlopungbo bede alukhi kiuto alalanü 10.

²⁷ Levi trük püpürü Gershon guknü aniakhiuklim Manase trük chingnü kiuto 2 lukheah: Bashan ching yo Golan (tsoyukpung kiuto bolung khülang ah) tüsho Beeshtera, ju lung rimlopungbo she belah.

²⁸ Issakar trük chingnü kiuto 4 arünü alukhi: Kishion, Daberath,

²⁹ Jarmuth, tüsho Engannim, ju lung rimlopungbo she belah,

³⁰ Asher trük chingnü kiuto 4 arünü alukhi: Mishal, Abdon,

³¹ Helkath, tüsho Rehob, ju lung rimlopungbo she belah.

³² Naphtali trük chingnü kiuto 3 arünü alukhi: Galilee ching yo Kedesh (tsoyukpung kiuto bolung khülang ah), Hammoth Dor, tüsho Kartan, ju lung rimlopungbo she belah.

³³ Gershon guk yamkhün ahihkhühnü rimlopungbo bebah alukhi kiuto alalanü 13.

³⁴ Aningkhi Levirü Merari guknü Zebulun trük chingnü kiuto 4 lukhi: Jokneam, Karta,

³⁵ Dimna, tüsho Nahalal, ju lung rimlopungbo she belah.

³⁶ Reuben lomi chingnü kiuto 4 arünü alukhi: Bezer, Jahar,

³⁷ Kedemoth, tüsho Mephaath, ju lung rimlopungbo she belah

³⁸ Gad trük chingnü kiuto 4 arünü alukhi: Gilead ching yo Ramoth (tsoyukpung kiuto bolung khülang ah), Mahanaim,

³⁹ Heshbon, tüsho Jazer, ju lung rimlopungbo she belah.

⁴⁰ Junangde Levi yamkhün aningkhi Merari guk kilim kiuto 12 jihkheah.

⁴¹ Israelrü lo phulungnü rimlopungbo bebah Levirünü alukhi alalanü kiuto 48.

⁴² Ju mühi jurübo kiuto abande rimlopung lakheah; junangde kiuto abande alakheah.

Israelrü Lapung Lo ching Lakhamkhi

⁴³ Jumonü Atungpuhnü Israelrü jipürü ki tangzüngkhi nangde alo ju arü kilim jih. Küyimki arünü alo ju alukhea, arü ju ching laabah.

⁴⁴ Arü jipürü ki tangzüngkhi nangde Atungpuhnü lomi mühi alala ching mungtsü jih. Arü riri shenü lang she arü azhihde müzhipkhuk, tümüde thiriri alala Atungpuhnü Israelrü khah ching jih.

⁴⁵ Atungpuhnü Israelrü ki tangzüngkhi atsübo khülang lang she mülakphah; alala dünjido.