JIHUSUA 20 - AMÜSÜH HÜM CL Bible (BSI)

Tsoyukpung Kiutobo

¹ Atungpuhnü Jihusua ki tha,

² “ Mosa hode inü nüsa ki thiyukhüm jihkhi kiutobo tsoyukpung thsungkheaknü mokhitang de Israelrü ki thaang,

³ junangde mihtsürü khürünü müranglimnü khürükhüh laksahsho athrihpü larü mihtsürü kheaknü tsokhide yünü ju ching jikbah.

⁴ Api jurü kiutobo ching alihde ayübah tüsho kiuto chipimurung ching zhipbahle adünjikhibo limberübo ki mükheahshihbah. Jushu arünü api kiuto ching yüzahshihbah api kilim lapung jihbah, tüsho api ju ching labah.

⁵ Mürangkhüh royimrünü adunglim müshamde arüsho mihtsürübonü api ju arü khah ching müjih. Arübonü api khümkhitbeah tümütüsho püpüki ane dükeak mükthsü mülade müranglimnü mihtsürü ju alaksahkheah.

⁶ Boto miki mah mükhapyiki tüsho ju kim ching achangbe amükeambuh müsheyi khiungde api ju ching labah. Jushu lang api alihde atsopung kiuto ching ayam lim alode ayüpü kuklah.”

⁷ Jumonü arünü Naphtali awung lomi ching Galilee ching lakhi Kadesh mokhit; Ephraim awung lomi ching Shekem mokhit; tüsho Juda awung lomi ching Kiriath-arba (ju Hebron) mokhit.

⁸ Tüsho Jordan hobah, Jirikho aniakhiuklim wungdüpheak kheak sunglo ching arünü Reuben trük chingnü Bezer mokhit; Gad chingnü Gilead ching lakhi Ramoth mokhit; tüsho Manase trük chingnü Bashan ching lakhi Golan mokhit.

⁹ Harü kiutobo ha Israelrü tüsho arü lung larü khiungkerü khürü thsungkheaknü tsoyukpung mokhitkheah. Khürünü mihtsürü müranglimnü laksahsho royimrü kheaknü yübah ju ching jikpü kuklah; tüsho boto miki mah mükhapchokia royimrünü api mülaksahkhuk.