JIHUSUA 14 - AMÜSÜH HÜM CL Bible (BSI)

Aniyüzahlim Jordan Lomi Chamnakkhi

¹ Harü ha amükeambuh Eleazar, Nun tsührü Jihusua tüsho Israel trük gukbo chingnü akuthsürübonü mihtsürübo kilim chama jih Kananrü lo ching Israelrünü yamrüplurüp lukhi ah.

² Atungpuhnü Mosa ki thiyukhüm jihkhi nangde trük tuku tüsho aniyüzahlim trük chamnakkhüh kilim a azan thsübah yamrüplurüp jih.

³ Tümütüsho Mosanü trük mahne tüsho Jordan hobah trük chamnakkhüh kilim a yamrüplurüp jih; tüshe Levirü kilim a apinü yamrüplurüp müjih.

⁴ Tümüde Josep mihtsürübo ju trük mahne lakheah, Manase tüsho Ephraim; tüsho Levirü kilim a alo tümü müjih, tüshe arü lashihpü kiutobo tüsho akam-shiwühbo tsühyungshihpü thulubo lang jih.

⁵ Atungpuhnü Mosa ki thiyukhüm jihkhi nangde Israelrünü alo ju chamnaka lu.

Kaleb kilim Hebron Jihkhi

⁶ Judüki mihtsürü khürü Juda trük chingnü Gilgal ching Jihusua kilim arü; tüsho Kenizrü Jephunne tsührü Kalebnü api ki tha, “ Kadesh-barnea ching Atungpuhnü I tüsho nü dünkheak Thrünpuh mihtsürü, Mosa ki tümü thakheanü nünü mükheahlah.

⁷ Atungpuh yamlarü Mosanü lomi ching thirirhua kheahshihpü Kadesh-barnea chingnü I thiyichoki I kam 40 azorü lakheah; tüsho inü atsütsü thiyusheak api kilim lulobah arü.

⁸ Tüshe I lung yürübonü mihtsürübo mulong müyinkhishih tüshe I mulong athrünkhinü Atungpuh I Thrünpuh yan.

⁹ Tüshe ju ni Mosanü thiyuchihchimde tha, Tsükjide nünü athrümkhi lo lünnü nü tüsho nü tsührübo yamrüplurüp thsübah, tümütüsho nünü mulong athrünkhinü Atungpuh I Thrünpuh yando.

¹⁰ Tüsho kheakü nüsanü ngülah, apinü athakhi nangde Israelrü sunglo hode hantsahchoki Atungpuhnü ha yu Mosa ki thakhi kim chingnü ha kam yirükheak phüngü Atungpuhnü I rhangdung lashihlah; tüsho khihni I kam 85 azorü kamdo.

¹¹ Mosanü I thiyia alungshihchoki ruk lang khihni khiungde I sühmüh lah; keochihpü thsüde yungsho yüla arüla düpü sühmüh lah.

¹² Jumonü ju nimung Atungpuhnü athakhi nangde kheakü ha awung lomi I kilim jihang; tümüde Anakimrü künangde chipi düküngde kiutobo ching lakheanü nünü ju nimung sodo; khükijua Atungpuh I lung labah, tüsho Atungpuhnü athakhi nangde inü arü yankhita bahbah.”

¹³ Judüki Jihusuanü Jephunne tsührü Kaleb müngühjih tüsho Hebron kiuto api kilim yamrüplurüp jih.

¹⁴ Jumonü khihni khiungde Hebron ju Kenizrü Jephunne tsührü Kaleb tsühsoniusobo yamrüplurüp ah, tümütüsho api mulong athrünkhinü Atungpuh Israel Thrünpuh yan.

¹⁵ Ha müngüh a Hebron ju Kiriath de ajikheah, (Ha buh Araba ha Anakimrü lung atoshang mihtsürü lakheah). Tüsho kheaküa lomi ching thirithsü müladebah.