JIHUSUA 13 - AMÜSÜH HÜM CL Bible (BSI)

Yankhita Lupü Lomi

¹ Kheakü Jihusua khide ashinbuhrü lakheah, tüsho Atungpuhnü api ki tha, “Nü khide shina lah, tüshe kheaküshe alo ahihdo yankhia lupü lah:

² Filistia tüsho Geshur lomi alala,

³ tüsho düjinglim Avvim lomi alala. (Ijip aredung yean ching Shihor kenü lo chingnü Ekron aredung yean dukulim khiungde Kananrü de ajikheah; Filistiarü yakzanshuhrü phüngü ju Gaza, Ashdod, Ashkelon, Gath, tüsho Ekron ching lakheah.)

⁴ Kheaküshe Kananrü lomi alala, tüsho Meara (Sidonrü lo) chingnü Amorrü aredung yean Aphek khiungde;

⁵ Gebalrü lo tüsho Baalgad chingnü Hermon wung khüp Lebo-hamath limpeang Lebanon aniakhiuklim alala,

⁶ Lebanon tüsho Misrephoth-maim ane dükeak awung lomi ching larü Sidonrü alala. Israelrü müngühlim yü yande inü harü mihtsürübo yankhita bahbah; judü lang inü thiyukhüm jihkhi nangde nünü alobo ju Israelrü kilim yamrüplurüp chama jihang,

⁷ kheakü, ha lo trük tuku tüsho Manase trük chamkhüh kilim nihbuh lo thsüshihpü chama jihang.”

Jordan Aniakhiuklim Lomi Chamnakkhi

⁸ Reuben le Gad trükbo tüsho Manase trük chamnakkhühnü Atungpuh yamlarü Mosanü ajihkhi nangde Jordan aniakhiuklim lu.

⁹ Arü lomi chinde ayükhi ju Aroer (Arnon jindükhün chinkheam ching), jindükhün phulung kiuto tüsho wungduduh alala Medeba chingnü Dibon khiungde;

¹⁰ tüsho Heshbon ching yakzanshuhbuh Amor kiulongthsüpuh Sihonnü kiulongthsükhi kiutobo alala chingnü Amon aredung khiungde ah.

¹¹ Ju chingnü Gilead, Geshur tüsho Maaka lomi Hermon wung alala, tüsho Bashan chingnü Saleka khiung;

¹² Bashan ching Og kiulongthsü alala, shepünü Ashtaroth tüsho Edrei ching kiulongthsükhea (api Rephaimrü bolung ashukheamde rhangdung lakheah); Mosa nü harü mihtsürübo kukde yankhitabah.

¹³ Tütüshe, Israelrünü Geshur tüsho Maaka mihtsürübo müyankhit; arü khihni khiungde Israel ching lah.

¹⁴ Mosanü Levi trük kilim alo müjih; Atungpuhnü Mosa ki thakhi nangde, arü a kingaünpung kheak Atungpuh Israel Thrünpuh ki taka kingaünpü ju arü yamrüplurüp ah.

Reubenrü kilim Jihkhi Lomi

¹⁵ Mosanü Reuben trük kilim arü guk ayannü yamrüplurüp jih.

¹⁶ Arü lomi chinde ayükhi ju Aroer (Arnon jindükhün mungyean), ju jindükhün ching lakhi kiuto tüsho Medeba mühide alakhi wung düpheak ah.

¹⁷ Heshbon tüsho awung düpheak kheak kiutobo: Dibon, Bamoth Baal, Beth-baalmeon,

¹⁸ Jahaz, Kedemoth, Mephaath,

¹⁹ Kiriathaim, Sibma, jindükhün wungbo kheak lakhi Zereth Shahar,

²⁰ Beth Peor, Pisga wung düpheak, tüsho Beth Jeshimoth,

²¹ wung düpheak kheak lakhi kiutobo tüsho Heshbon ching yakzanshuhbuh Amor kiulongthsüpuh Sihon kiulongthsü alala belah. Mosanü api tüsho Midia yakzanshuhrü harü kukkhit: Evi, Rekem, Zur, Hur, tüsho Reba. Arü alalanü Sihon kiulongthsüpuh lung lomi ching yakzan shuh.

²² Jurü bolung Israelrünü nukshangnü alaksahbuh ju müchitmudurü Beor tsührü Balaam lakheah.

²³ Jordan ju aniyüzahlim Reuben trük aredung yean lakheah. Harübo ju Reuben trük kilim nihbuh yamrüplurüp thsüpü arü guk ayannü ajihkhi kiutobo tüsho kiulongbo ah.

Gadrü kilim Jihkhi Lomi

²⁴ Mosanü Gad trük kilim she arü guk ayannü yamrüplurüp jih.

²⁵ Arü lo ju Jazer tüsho Gilead kiutobo, Rabba aniakhiuklim Aroer khiungde alakhi Amonrü lo shihchamkhüh;

²⁶ Heshbon chingnü Rama-mizpe tüsho Betonim, Mahanaim chingnü Debir khiungde,

²⁷ Jordan jindükhün ching Beth Haram, Beth Nimra, Sukkoth, Zaphon, tüsho aningkhi Heshbon kiulongthsüpuh Sihon kiulongthsü aniakhiuklim Jordan keto yean chingnü düjinglim Galilee keto akheam khiunglah.

²⁸ Harü kiutobo tüsho kiulongbo ha Gad trük kilim arü guk ayannü ajihkhi yamrüplurüp ah.

Aniakhiuklim Manaserü kilim Jihkhi Lomi

²⁹ Mosanü Manase trük chamkhüh kilim arü guk ayannü yamrüplurüp jih.

³⁰ Arü lomi ju Mahanaim tüsho Bashan lomi–Og kiulongthsü alala, tüsho Bashan ching lakhi Jair kiulong 60,

³¹ tüsho Gilead shihchamkhüh, Bashan ching lakhi Og kiulongthsü kiutobo Ashtaroth tüsho Edrei. Harü alala Manase tsührü Makir tsührübo arü guk ayannü Makirrü chamkhüh kilim jih.

³² Harü ha Mosanü Moab dükhün ching lachoki Jirikho aniakhiuklim tüsho Jordan ching chamjihkhi yamrüplurüp ah.

³³ Tüshe Mosanü Levirü trük kilim a yamrüplurüp tümü she müjih; apinü arü ki thakhi nangde Atungpuh Israel Thrünpuh kingaünpü ju lang arü yamrüplurüp ah.