JEREMIA 52 - AMÜSÜH HÜM CL Bible (BSI)

Jirusalem Keamkhi

¹ Zedekia kiulongthsüpü tankihchoki api kam 21 lakheah; apinü Jirusalem ching kam thürükheak khülang kiulongthsü. Abe mung ju Lebnarü Jeremia tsührübe Hamutal lakheah.

² Apinü Jehoiakimnü arhimokhi nangde, Atungpuh miki amütsübe rhimo.

³ Atsütsü, Jirusalem tüsho Judanü Atungpuh khide bukakhiukshih, junangde apinü arübo amikinü yankhitabah. Zedekianü Babilon kiulongthsüpuh azhih.

⁴ Tüsho api kiulongthsü kam tukupü, khinu thürü, nimung thürü nipü, Babilon kiulongthsüpuh Nebukednezarnü api bonungrü alala bebah Jirusalem azhihde arü, tüsho arünü kiuto aleanglim binpung thsü; arünü ju mühide aheangyünbo thsü.

⁵ Jumonü kiulongthsüpuh Zedekia kam thürükheak khülang khiungde kiuto ju yandoa lakheah.

⁶ Khinu phüyi nimung tuku nipü ju kiuto ching khümzung muthsukde arükhi hode lomi mihtsürü thsungkheak tsühyungpü mülade alakheah.

⁷ Judüki kiuto chipi ching rhümashung; tüsho kiuto mühide Kaldearü lalashe bonungrübonü shan tüsho kiulongthsüpuh shahwün ki chipi mahne dükeak khuhto-ripit chingnü azhing ching kiuto chingnü wukhiuk. Arünü Araba limpeang yü.

⁸ Tüshe Kaldearü bonungrübonü kiulongthsüpuh Zedekia yande müsham tüsho Jirikho dükhün chingnü Zedekia yanphuh; tüsho api bonungrü alalanü api bahbah hiumüzüt.

⁹ Judüki arünü kiulongthsüpuh tholo, tüsho api ju Hamath lomi Ribla ching Babilon kiulongthsüpuh kilim hande atu, tüsho apinü anihbuh sheshihpü thaa jih.

¹⁰ Babilon kiulongthsüpuhnü Zedekia tsührübo api mük kinü laksah, tüsho Juda torübo she alala Ribla ching laksah.

¹¹ Apinü Zedekia mükjibo khünkhit, tüsho yinchiliunü api rhük, tüsho Babilon kiulongthsüpuhnü api Babilon ching bede yü, tüsho api shekhi nimung khiungde rihyam ching yuka zo.

Arüngyam Thsümünimkhi

¹² Khinu phüngü, nimung thürü nipü–küpü Babilon kiulongthsüpuh Nebukednezar kam thürükheak tukupü lakhea–Babilon kiulongthsüpuh tankihrü, aheangrü wühkenobuh Nebuzaradannü Jirusalem ching yüzah.

¹³ Apinü Atungpuh yam, kiulongthsüpuh yam, tüsho Jirusalem yambo alala tak; atorü yambo alala takabah.

¹⁴ Aheangrü wühkenobuh lung yürü Kaldearü bonungrü alalanü Jirusalem mühide chipi yihkheamabah.

¹⁵ Aheangrü wühkenobuh Nebuzaradannü zhochih traktrak mihtsürü khürü tüsho kiuto ching aninga larü mihtsürübo tüsho Babilon kiulongthsüpuh kilim tsorü, ju lung keaklahrü bebah ramtso ching yü.

¹⁶ Tüshe aheangrü wühkenobuh Nebuzaradannü lomi ching zhochihrü mihtsürü khürü kurungaso-nitrü tüsho alo kiurü thsüpü aninga lashih.

¹⁷ Atungpuh yam ching lakhi müwayinchi dungjingbo, tüsho dubopungbo tüsho müwayinchi kekung, Kaldearünü adütre kamde yihthünak, tüsho müwayinchi alala Babilon ching hanbah yü.

¹⁸ Arünü phühbo, mokhih-müjipbe, phühshuhbe, müsühmüra-phuru, jakobo, tüsho arüngyam mukhungmüdan ching ahoribe müwayinchi pungphurubo alala lubah tso.

¹⁹ Aheangrü wühkenobuhnü phurusük aninibo, mophuru, müsühmüra-phuru, phühbo, tsünpung zopung, jakobo, tüsho pungbo she suna tüsho shotoyinchinü athsükhi lu.

²⁰ Dungjing 2, kekung 1, kekung khüp lakhi müwayinchi moshi 12 tüsho dubopungbo, küpü kiulongthsüpuh Solomon nü A TU N GPU H yam thsungkheak thsükhea, müwayinchi pungphurubo alala madünbinbe lakheah.

²¹ Dungjingbo ju, dungjing khülang achanglim limthrip 8, atolim limthrip 5.3 lakheah; ju alung ching akeangkeang lakheah tüsho akheahlim yingkhing 4 lakheah.

²² Ju kheak müwayinchi düthrün lakheah; düthrün khülang ju achanglim limthrip 2.2 lakheah; yakthsükhi tüsho tsarümkiubo, alala müwayinchi adüthrün mükamde thsü. Tüsho mahnepü dungjing she ju ruk tsarümkiubo lakheah.

²³ Arheanglimbo kheak tsarümkiu 96 lakheah; yakthsükhi mükamkhi tsarümkiu alala thsürubah 100 lakheah.

Judarü Babilon lim Bede Ayükhi

²⁴ Aheangrü wühkenobuhnü akube amükeambuh Seraia bea lu, mahnepü amükeambuh Zephania tüsho ripit neakrü 3;

²⁵ tüsho kiuto chingnü apinü bonungrü limthorü atorü 1, tüsho kiuto ching lakhi kiulongthsüpuh lümthiyan-jihrü mihtsürü 7 bea lu; bonungrü limthobuh yo athrütbuh shepünü lomi mihtsürü trüngmukhungkhea; tüsho kiuto alunglim lakhi lomi mihtsürü 60.

²⁶ Judüki aheangrü wühkenobuh Nebuzaradannü arübo bea lu, tüsho Ribla ching Babilon kiulongthsüpuh kilim bebah arü.

²⁷ Tüsho Babilon kiulongthsüpuhnü Hamath lomi Ribla ching arübo kingsahabah. Jumonü Judarü ju nihbuh lomi chingnü ramtso ching yükheah.

²⁸ Ha Nebukednezarnü ramtso ching bede ayükhi mihtsürü khekhi: kam thünepü ching Judarü 3023;

²⁹ Nebukednezar kam thürükheak tizheahpü ching apinü Jirusalem chingnü mihtsürü 832 ramtso ching bede yü;

³⁰ Nebukednezar kam mukukheak mahsampü ching, aheangrü wühkenobuh Nebuzaradannü Juda mihtsürü 754 ramtso ching bede yü; mihtsürü alalanü 4600 lakheah.

³¹ Juda kiulongthsüpuh Jehoiakin ramtso ching lakhi kam samrükheak thünepü, khinu thürükheak mahne, nimung mukukheak phüngü nipü, Babilon kiulongthsüpuh Evil-merodaknü api kiulongthsü atankih kam, Juda kiulongthsüpuh Jehoiakin ki amuzho huh tüsho rihyam chingnü api bekhit;

³² apinü anihbuh ki muzhode asuk, tüsho Babilon ching api lung lakhi kiulongthsürü püpürü binkiubo kumung kheak api kilim wüntre jihkhi binkiu khülang jih.

³³ Jumonü Jehoiakinnü api rihyam khimmihbo müthri, tüsho api rhangdung ching nimung aban kiulongthsüpuh dükhüm kheak yimtsüh.

³⁴ Nimung abande Babilon kiulongthsüpuhnü Jehoiakin kilim, api rhangdung lakhi amuyung, api shekhi nimung khiungde api mihkhahmo mutukzhakde jih.