JEREMIA 49 - AMÜSÜH HÜM CL Bible (BSI)

Amon kheak Atungpuh Mahkhap

¹ Amonrü dünkheaknü Atungpuhnü ha thachoh: Israel tsührü müla de? Api münü müla de? Dale küde thsah Moleknü Gad mükühkhea tüsho api mihtsürü ju kiutobo ching lashihkhea?

² Jumonü, tsükjide kim arüchoh, Atungpuhnü thachoh, küyimki inü Amonrü yo Rabba azhihde keochih düsheak arhunganimba; ha azhikkhi wungduduh kambah tüsho kiulongbo monü atakbah; judüki Israelnü api yankhita bahrü yankhitbah, Atungpuhnü thachoh.

³ Mulong rozhakang, O Heshbon, tümüde Ai thsümünima yaplah! Zhiang, O Rabba tsührübebo! Shungliukhim rümkihang, tüzhoang tüsho yingyingde api yo amükeamrübo tüsho atorübo rukhühnü alihang, tümüde Molek ramtso ching yüpü lah.

⁴ Tümüde nü yo jindükhün thsungkheak nü kükheangcho? Nü sühmüh keakeade kamchoh O akin mülakhi tsührübe. Nünü nü rahpungbo ching kinde thachoh, “Shenü I azhihpü?”

⁵ Nü yamhingrü alala chingnü inü nü kheak atrebe handarübah, Wuto Atungpuhnü thachoh, nüsa mihbüm aban yanmüzütbah, tüsho tsotsahrümtsahrübo shenü mübemukhung.

⁶ Tüshe ju dunglim inü Amonrü kuhi jihlobah, Atungpuhnü thachoh.

Edom kheak Atungpuh Mahkhap

⁷ Edom dünkheak Wuto Atungpuhnü ha thachoh: Teman ching kheaküa lümlung müla de? Lümlung larü kheaknü lümthiyan dükheaka la de? Arü lümlung dükheaka la de?

⁸ Dedan ching larübo, alihang, rholoang, lungkhünbo ching jikang! Inü Esau tsühsoniusobo thsümüchipü lah, tümütüsho inü arü thsümüchipü kim arüdo.

⁹ Kurungaso-rhorü nü kilim arüsho arünü kurungaso anükhüh maningshihba de? Ahührü azhing ching arüsho arünü arü künkhi thülün lang mahühba de?

¹⁰ Tüshe inü Esau khukkhitdo, inü api jikpung lahkhitdo, tüsho apinü müjikkhuk. Api tsührübo, api keoniorübo tüsho api yamhingrübo dükheakdo; tüsho api kheaküa müla.

¹¹ Nüsa yo mürerübo zojang, inü arü rhangdung kümbah tüsho nüsa yo khimoberübo I kheak kinshang.

¹² Tümüde Atungpuhnü ha thachoh: khürü pung yungpü müthülünlün she, judü lang ayungbah, nü a müthsümüchide atsoba de? Nü müthsümüchide müyü; nünü ju ayungpü tsütsü.

¹³ Tümüde I küdahnü thiyuchihchimdo, Atungpuhnü thachoh, junangde Bozra ju mihtrebe tüsho münedung, abahkhi, tüsho muthrukhi kukruk khülang kambah; tüsho anihbe kiutobo alala lünnü abahkhi labah.

¹⁴ Inü Atungpuh kilimnü thiyusheakbo sodo, tüsho trükshih bolung yunithsürü khülang yüshihdo: “ Nüsa rukhühnü mukhungang tüsho anihbe azhihde arang tüsho keochihpü wusuang!”

¹⁵ Tümüde inü nü trükshih bolung aninibe kamshihde, mihtsürünü mükhemükimshihbah.

¹⁶ Nünü bukmükekhi tüsho nü mulong kükheangkhinü nü mülapyukdo, nü shepü lungkubo ching lacho, shepü awung achang ramrihla. Nünü müleang nangde changde sap shushu she, ju chingnü inü nü thokhibah, Atungpuhnü thachoh.

¹⁷ Edom ju mihtrebe kukruk kambah; ha horü abannü müyinsahbah tüsho ha thsümütsü alala dünkheaknü ish thsübah.

¹⁸ Sodom le Gomorra tüsho arü yamhingrü lahyuka bahchoki nangde, ju ching she mihtsürü müla, Atungpuhnü thachoh.

¹⁹ Kekhüzü khülang Jordan sangrung akheah chingnü aphüyak rimlopung azhihde atukhi nangde, inü tsükjide ju chingnü Edom yanyuka bahbah; tüsho ju kurungkheak inü amokhitkhi zojihbah. Tümüde I nangde she la? Shepünü I azhihkhukla? I miki zhipkhukpü thsüde namfimihnu neakrü she la?

²⁰ Jumonü Atungpuhnü Edom, Teman ching larü azhihde lümkhi thsükhi aniang: Tsükjide mihnu aninibo yanyuka bahbah; arübo dünkheaknü apinü arü rimlopung shahde thsümünimbah.

²¹ Arü keamkhi düsheaknü alomi ajanbah; akhungkhi düsheak Amürüm Keto ching sobah.

²² Kheahang, müleang nangde apinü müheankihbah tüsho phinkhibah, tüsho Bozra azhihde api ghidükeang chutreakbah, tüsho ju nimung Edom thirithsürübo ju aliberü khungarü ngüpü thsünükhi nangde alabah.

Damaska kheak Atungpuh Mahkhap

²³ Damaska dünkheak. Hamath tüsho Arpad mulong ninido, tümüde arünü thiyusheak amütsü sodo; arübo atrekhinü janiudo, arübo mükeamramkhi keto nangde küpkhukdo.

²⁴ Damaska süh mülade kamdo, anihbe ashanpü rholodo, tüsho thsününü anihbe khiungdo; aliberü thsünüchoki nangde thsünü tüsho mulong rozhaknü anihbe tholoa lah.

²⁵ Küdükhüh mungthu kiuto asühachihkhi kiuto bahyuka la!

²⁶ Jumonü anihbe athrününgtsüngbo kiudunglimrobo ching keambah, tüsho anihbe bonungrü alala ju nimung dükheakbah, Wuto Atungpuhnü thachoh.

²⁷ Tüsho inü Damaska chipi kheak mo takkihbah, tüsho hanü Ben-hadad chipi aniuabahbah.

Kedar Trük tüsho Hazor Kiuto kheak Mahkhap

²⁸ Babilon kiulongthsüpuh Nebukednezarnü akukkhi Kedar tüsho Hazor kiulongthsübo dünkheak Atungpuhnü ha thachoh: Asürang, tüsho Kedar yanang; tüsho Aniakhiuklim mihtsürü dükheakshang!

²⁹ Arü khimyambo tüsho arü mihnubo, zhindokhim tüsho arü kukruk alala luang; nüsa thsungkheaknü kemelbo luang, tüsho azhikhi khülang yükihbah: “Alala mükamde mihtrebe lah!”

³⁰ Shanang, limshude tsoang, asük dangpungbo ching jikang, O Hazor ching larübo! Atungpuhnü thachoh. Tümüde Babilon kiulongthsüpuh Nebukednezarnü nü azhihde lümkhi thsüdo.

³¹ Asürang, lalim tsüde akhimahe ching, chipiripit yungsho akhrihbe mülade alangzü lakhi trükshih yanang, Atungpuhnü thachoh.

³² Arü yo kemelbo tüsho moshibo yankhia luang. Limshu ching larübo apung ching hiumüzütshihbah, tüsho thrip aban chingnü arü azhihde inü thsümütsü handarübah, Atungpuhnü thachoh.

³³ Hazor ju shirung lapung akheam mülakhi abahkhi kambah; ju ching sheshe müla.

Elam kheak Atungpuh Mahkhap

³⁴ Juda kiulongthsüpuh Zedekia kiulongthsü atankih ching, Elam dünkheak Atungpuh yu wukihbuh Jeremia kilim arükhi ha lah.

³⁵ Wuto Atungpuhnü ha thachoh: Inü Elam sanglüh, atsunglopung ato yihshakbah;

³⁶ tüsho inü thüning thrip phüyi chingnü Elam kheak apung handarübah; tüsho inü harü apungbo ching arübo müzütshihbah, tüsho Elam chingnü ramtso müyükhi trükshih khülang she mülade müthsü.

³⁷ Inü arü riribo miki Elam treshihbah, tüsho arü rhangdung yimrü miki inü arü kheak thsümütsü I bukakhiuk handarübah, Atungpuhnü thachoh. Arü mümuyu khiungde inü arü dunglim nukshang yüshihbah;

³⁸ tüsho inü Elam ching I kiulongthsü-binkiu zobah, tüsho arü kiulongthsürübo tüsho atorübo thsümünimbah, Atungpuhnü thachoh.

³⁹ Tüshe ashulim nimungbo ching inü Elam kuhi jihlobah, Atungpuhnü thachoh.