JEREMIA 47 - AMÜSÜH HÜM CL Bible (BSI)

Filistia dünkheak Atungpuh Yusheak

¹ Pharaonü Gaza müyanyide Filistia dünkheak Atungpuh yu wukihbuh Jeremia kilim arü:

² Atungpuhnü ha thachoh: Kheahang, dukulimnü kebo akichoh tüsho düchi-bukkhi ayung kambah; arünü lomi tüsho ju ching lakhi kiuto tüsho ju ching larübo zündobah. Mihtsürübonü azhihbah tüsho lomi ching larü alalanü tüzhobah.

³ Api khorapungbo biuo jungkhi düsheaknü, api khora-lolungbe truktrukkhinü, arü lolungbe-jing düsheaknü, tsührübo rungpü berübuhrü malodarü, arü khahbo khide kika lah,

⁴ tümütüsho Filistia alala thsümünimpü, Tair tüsho Sidon chingnü arungrü aninga lakhi dükheakpü nimung arüchoh. Tümüde Atungpuhnü Kaphtor keyean lomi ching aninga larü Filistiarü dükheakshihbah.

⁵ Mulong rozhak ato Gaza kheak arüdo, Ashkelon zhikabahdo. O adükhün ching aninga larübo! Küdükhüh nüsa zangrü mulong rozhakba?

⁶ Ah, Atungpuh nukshang! Nü sühakhim müla khiungde külokhüh laba? Nüsa nuktrüp ching yukloang, tukloang tüsho sühakhimang!

⁷ Atungpuhnü thiyukhüm jihsho küde thsah ha zhikde akampü? Apinü Ashkelon tüsho keyean larü yanpü thiyukhüm jihdo.