JEREMIA 40 - AMÜSÜH HÜM CL Bible (BSI)

Gedalia lung Jeremia Lakhi

¹ Aheangrü wühkenobuh Nebuzaradannü api Rama chingnü dükheshu Atungpuh yu Jeremia kilim arü. Apinü Jeremia ju Jirusalem tüsho Juda aramrübo Babilon ramtso ching hande ayürü bolung yinchiliunü rhüka ngü.

² Aheangrü wühkenobuhnü Jeremia bea lu tüsho api ki tha, “Atungpuh nü Thrünpuhnü ha dangpung ha thsümüchinü müzündo;

³ tüsho kheakü Atungpuhnü ha handarüdo, tüsho apinü athakhi nangde rhimodo, tümütüsho nüsa alalanü Atungpuh azhihde neak yihbeak tüsho api yu mani. Jumonü hadürü nü kheak arükheah.

⁴ Kheakü kheahang, khihni inü nü khahbo ching yinchiliu chingnü nü dükhedo. Nünü I lung Babilon lim arünesho arang, tüsho inü nü düshihde akümbah; tüshe nünü I lung Babilon lim marünesho, nü darü. Kheahang, alomi abümnü nü miki lah; nünü kürü ching tsüde lümla tüsho alungki yüpü lanü yüang.

⁵ Nü külim müyüsho, Babilon kiulongthsüpuhnü Juda kiutobo kurungkheak kovünor mokhitkhi, Shaphan tsührü Ahikam tsührü Gedalia kilim alode yüang, tüsho mihtsürübo lung api ki laang; yungsho nünü külim peang yüpü alungki lümlanü yüang.” Judüki aheangrü wühkenobuhnü api kilim tsühyungpü le thsambah khülang jih tüsho api tsoshih.

⁶ Jushu Jeremianü Mizpa ching Ahikam tsührü Gedalia kilim yü, tüsho lomi ching aninga larü mihtsürübo lung api ki la.

Juda Kovünor Gedalia

⁷ Küyimki lomi mükeak ching thirithsürü limberübo alala tüsho bonungrübonü Babilon kiulongthsüpuhnü Ahikam tsührü Gedalia lomi ching kovünor mokhitkhi, tüsho Babilon ramtso ching hande müyükhi lomi ching zhochih traktrak, athrürü, aliberü tüsho azürübo api jihkhi sokhea,

⁸ arünü Mizpa ching Gedalia kilim yü– Nethania tsührü Ishmael, Karea tsührü Johanan tüsho Jonathan, Tanhumeth tsührü Seraia, Netopharü Ephai tsührübo, Maakathrü tsührü Jezania, arü tüsho bonungrübo.

⁹ Shaphan tsührü Ahikam tsührü Gedalianü arübo le bonungrü ki thiyuchihchimde tha, “ Kaldearü tankihpü dütre. Ha lomi ching laang tüsho Babilon kiulongthsüpuh tankihang tüsho nüsa tsüde alabah.

¹⁰ I a, isa kilim arürü Kaldearü miki nüsa thsung thsüpü Mizpa ching lah; tüshe nüsa a yukhu tüsho muzhu sangasobo le müdangke hanmukhungang, tüsho phühlungbo ching zomukhungang, tüsho nüsanü amükühkhi kiutobo ching laang.”

¹¹ Junangde, küyimki Babilon kiulongthsüpuhnü Juda ching aninga lashihkhi tüsho arü kurungkheak Shaphan tsührü Ahikam tsührü Gedalia kovünor mokhitkhi Moab ching, Amonrü lung, Edom ching tüsho püpü lomibo ching larü Jihudarübo alalanü asokhea,

¹² Jihudarü alala arü müzütpungnü alodarü tüsho Juda lomi lim, Mizpa ching Gedalia kilim arü; tüsho arünü yukhu tüsho muzhu sangasobo suhdahde hanmukhung.

Gedalia Laksahkhi

¹³ Kheakü Karea tsührü Johanan tüsho lomi mükeak ching thirithsü limberü alala Mizpa ching Gedalia kilim arü,

¹⁴ tüsho api ki tha, “Amonrü kiulongthsüpuh Baalisnü Nethania tsührü Ishmael, nü rhangdung lupü thiyikhi nünü mümükheah de?” Tüshe Ahikam tsührü Gedalianü arü kheak mükin.

¹⁵ Judüki Karea tsührü ki ramde asuk, “Muzhobah I yüanü tüsho Nethania tsührü Ishmael laksahanü, tüsho shenü she mümükheah. Tümüde apinü nü rhangdung lushihpü, junangde nü mükamde alarü Jehudarü alala hiumüzütshihpü, tüsho aningkhi Juda dükheakshihpü?”

¹⁶ Tüshe Ahikam tsührü Gedalianü Karea tsührü Johanan ki tha, “Hadürü dürhimo, tümüde nünü Ishmael dünkheak akeangyu thachoh.”