JEREMIA 37 - AMÜSÜH HÜM CL Bible (BSI)

Zedekianü Jeremia ki Mushukhi

¹ Josia tsührü Zedekia, Babilon kiulongthsüpuh Nebukednezarnü Juda lomi ching kiulongthsürü thsüshihbuhnü Jehoiakim tsührü Konia müthri kiulongthsü.

² Tüshe api yungsho api yamlarü yungsho lomi mihtsürünü Atungpuhnü wukihbuh Jeremia hode asukkhi yubo mani.

³ Kiulongthsüpuh Zedekianü Shelemia tsührü Jehukal tüsho Maaseia tsührü amükeambuh Zephania wukihbuh Jeremia kilim yüshihde tha, “Muzhobah Atungpuh isa Thrünpuh ki isa thsungkheak tamkhüntamnüjang.”

⁴ Kheakü Jeremianü mihtsürü bolung judü lang yüla arüla de alakheah, tümüde api rihyam ching muyukyide alakheah.

⁵ Ju dükeak ching, Pharao bonungrü Ijip chingnü akhiuk; tüsho küyimki Jirusalem yanrü Kaldearünü arü yusheak sokhea, arübo Jirusalem chingnü tsoabah.

⁶ Judüki wukihbuh Jeremia kilim Atungpuh yu arü:

⁷ Atungpuh , Israel Thrünpuhnü ha thachoh: I ki keokhishihpü nü kilim thiyibuh Juda kiulongthsüpuh ki thaang, Nü rungpü Pharao bonungrü tsahmusukhi ju arü lomi Ijip lim alode ayübah.

⁸ Tüsho Kaldearü alodarübah tüsho ha kiuto bede thirithsübah; arünü ju lubah tüsho monü atakbah.

⁹ Atungpuhnü ha thachoh: Nü zangrü mülapyukde dütha, “Tsükjide Kaldearü isa kheaknü atsobah,” tümüde arübo tsoamübah.

¹⁰ Nüsanü nüsa bede keochihrü Kaldearü bonungrü alala kukkuk she tüsho arü khimyambo ching yurirü lang aninga lalashe, arünü asürübah tüsho ha kiuto monü atakbah.

Jeremia Rihyam ching Zokhi

¹¹ Kheakü küyimki Pharao bonungrü arükhi hode Kaldearü Jirusalem chingnü atsokhea,

¹² Jeremianü ju ching mihtsürü bolung nihbuh shihcham lakhit-kukruk lupü Jirusalem ching yü.

¹³ Küyimki api Benjamin Chipiripit khiungkhea, ju ching aheangrü khülang Hanania tsührü Shelemia tsührü amung Irija nü wukihbuh rambah tha, “ Nü Kaldearü kilim tsokhide yüchoh.”

¹⁴ Tüsho Jeremianü tha, “Ju akeangyu ah; I Kaldearü kilim tsode müyü.” Tüshe Irijanü api ki mani, tüsho Jeremia rambah atorübo kilim bedarü.

¹⁵ Atorübonü Jeremia kheak bukakhiuk tüsho api lakbah athrütbuh Jonathan yam ching ramyuka zo, tümüde ju rihyam thsüa lakheah.

¹⁶ Junangde Jeremia alokhün ching yuka zo, tüsho ju ching nimung ahihdo lakheah.

¹⁷ Judüki kiulongthsüpuh Zedekianü I bepü arüshihbah api yam ching bede yü, tüsho ramde keokhi, “Thiyu khürü Atungpuh kilimnü la shi?” Jeremianü alo, “ Lah!” Judüki apinü tha, “ Nü Babilon kiulongthsüpuh khah ching jihbah.”

¹⁸ Jeremianü kheaküshe kiulongthsüpuh Zedekia ki tha, “ Inü nü yungsho nü yamlarübo yungsho ha mihtsürübo ki tümü amülim rhimokhi nünü I rihyam ching zokhea?

¹⁹ Nü yo wukihrübo küching la, sherünü nü ki müchitde, ‘ Nü tüsho ha lomi azhihde Babilon kiulongthsüpuh marü’ de athakhea?

²⁰ Kheakü muzhobah I ki aniang, I tungpuh kiulongthsüpuh: Inü amushukhi tsüde anijang, tüsho ju ching shepü thsüde athrütbuh Jonathan yam ching I alode düyüshih.”

²¹ Jumonü kiulongthsüpuh Zedekianü thiyukhümbo jih, tüsho arünü Jeremia ju aheangrü mahkhappung ching jih; tüsho kiuto chingnü yikhap alala mükheamyi khiungde yikhapthsüpungbo chingnü nimung abande I kilim yikhap khülang jih. Junangde Jeremia ju aheangrü mahkhappung ching lakheah.