JEREMIA 36 - AMÜSÜH HÜM CL Bible (BSI)

Arüngyam ching Küpqiu Khekhi

¹ Josia tsührü Juda kiulongthsüpuh Jehoiakim kam phüyipü ching Atungpuh yu ha Jeremia kilim arü:

² Küpqiu khülang luang tüsho inü Israel le Juda tüsho trükshih alala azhihde, Josia kiulongthsüchoki inü nü ki asukpü tankihkhinü kheakü khiungde nü ki asukkhi yubo ju kheak thrütang.

³ Khükia inü arü kheak rhimopü lümkhi thsümütsü alala Juda yamkhünnü sobah arü alala arü amütsü limrobo chingnü rholobah, junangde inü arü mülimkhi tüsho arü neak bahjihbah.

⁴ Judüki Jeremianü Neria tsührü Baruk ji tüsho Atungpuhnü Jeremia ki asukkhi yubo alala apinü thade Baruknü küpqiu kheak thrütkih.

⁵ Tüsho Jeremianü Baruk ki thiyukhüm jihde tha, “ I Atungpuh yam ching yüzahpü mümülü;

⁶ jumonü nü yüang, tüsho khümkeak thsü nimung inü thade nünü athrütkhi Atungpuh yu küpqiu chingnü mihtsürübonü sode kheang. Nünü jurübo Juda mihtsürü arü kiutobo chingnü arürünü she sode kheang.

⁷ Khükia arünü mushukhi Atungpuh miki arübah, tüsho arü alala arü amütsü limrobo chingnü rholobah, tümüde ato ju Atungpuhnü ha mihtsürü azhihde athakhi bukakhiukkhi tüsho mulong zhipzhip lah.”

⁸ Tüsho Neria tsührü Baruknü Atungpuh yu küpqiu chingnü Atungpuh yam ching khepü wukihbuh Jeremianü thiyukhüm jihkhi alala rhimo.

⁹ Josia tsührü Juda kiulongthsüpuh Jehoiakim kam phüngü, khinu tukupü ching Jirusalem ching mihtsürü alala tüsho Juda kiutobo ching Jirusalem ching arürü mihtsürü alalanü Atungpuh miki khümkeak thsüpü zhiyuk.

¹⁰ Judüki Baruknü Atungpuh yam ching yüzahpung chipiripit aso kheak achangbe yamkhuh ching, Shaphan tsührü athrütbuh Gemaria khiungshak chingnü, Atungpuh yam ching mihtsürü alalanü sode küpqiu chingnü Jeremia yubo khe.

Atorübo ki Küpqiu Khekhi

¹¹ Küyimki Shaphan tsührü Gemaria tsührü Mikaianü küpqiu chingnü Atungpuh yu alala sokhea,

¹² apinü kiulongthsüpuh yam lim, athrütbuh khiungshak ching yüki, tüsho ju ching atorübo alala binde alakheah: athrütbuh Elishama, Shemaia tsührü Delaia, Akbor tsührü Elnathan, Shaphan tsührü Gemaria, Hanania tsührü Zedekia, tüsho atorü alala.

¹³ Tüsho Baruknü mihtsürübonü sode alachoki, Mikaianü asokhi yubo alala arü ki tha.

¹⁴ Judüki atorü alalanü Baruk ki thashihpü, Kushi tsührü Shelemia tsührü Nethania tsührü Jehudi yüshih, “ Nünü mihtsürübonü sode akhekhi küpqiu lubah arang.” Jumonü Neria tsührü Baruknü küpqiu akhah ching lu tüsho arübo kilim arü.

¹⁵ Tüsho arünü api ki tha, “Binang tüsho ju isa ki kheang.” Jumonü Baruknü ju arü ki khea huh.

¹⁶ Küyimki arünü thiyubo alala sokhea, arünü alanachihde khülangnü khülang kilim anguh, tüsho Baruk ki tha, “ Isanü tsükjide harü yubo alala kiulongthsüpuh kilim jihbah.”

¹⁷ Judüki arünü Baruk ki keokhi, “ Kheakü isa ki thaang, küde thsah nünü harü yubo alala thrütkhea? Ha Jeremianü thaa thrütshihkhea de?”

¹⁸ Baruknü arü ki alo, “Apinü harü yubo alala I ki thaa thrütshih, tüsho inü jurübo dokenü küpqiu kheak thrütkih.”

¹⁹ Judüki atorübonü Baruk ki tha, “ Nü tüsho Jeremia, yüang tüsho jikang, tüsho nüke küching lanü shenü she dümükheahshih.”

Kiulongthsüpuhnü Küpqiu Takkhi

²⁰ Athrütbuh Elishama khiungshak ching küpqiu zojihbahle arünü kiulongthsüpuh mahkhappung ching yü; tüsho thiyu alala kiulongthsüpuh ki thaa huh.

²¹ Judüki kiulongthsüpuhnü küpqiu lupü Jehudi yüshih, tüsho apinü athrütbuh Elishama khiungshak chingnü ju lu; tüsho Jehudinü kiulongthsüpuh tüsho api ki zhiprü atorü alala ki ju khea huh.

²² Kheakü khinu tukupü ching kiulongthsüpuh ju tsüngkam binpung-yam ching binde alakheah, tüsho api miki mothsüpung ching mo takde alakheah.

²³ Jehudinü aphu mahsam yungsho phüyi kheshu kiulongthsüpuhnü nukjipnü nipnak tüsho küpqiu abümnü mütakkhamyi khiungde mothsüpung ching yuka tak.

²⁴ Tütüshe kiulongthsüpuh yungsho api yamlarü harü yu sorü shenü she mütre, yungsho arü khimmih muthonak.

²⁵ Elnathan, Delaia tüsho Gemaria arünü kiulongthsüpuh ki küpqiu mütakpü mushushu she, apinü arü ki mani.

²⁶ Tüsho kiulongthsüpuhnü kiulongthsürü tsührü Jerameel, Azriel tsührü Seraia tüsho Abdeel tsührü Shelemia, athrütbuh Baruk tüsho wukihbuh Jeremia rampü thiyukhüm jih. Tüshe Atungpuhnü ane ramabah.

Jeremianü Küpqiu Thrütlokhi

²⁷ Kheakü, Jeremianü Baruk ki thaa thrütshihkhi yubo bede kiulongthsüpuhnü küpqiu takshu, Atungpuh yu Jeremia kilim arü:

²⁸ Küpqiu püpü luang tüsho Juda kiulongthsüpuhnü takabahkhi akhuhbe küpqiu ching lakhi yubo ju kheak thrütang.

²⁹ Tüsho Juda kiulongthsüpuh Jehoiakim dünkheak nünü athabah: Atungpuhnü thachoh, Nünü ha küpqiu takpü tha, “Tsükjide Babilon kiulongthsüpuh arübah tüsho ha lomi, mihtsürü tüsho shiwühbo thsümünimpü tümüde nünü ha ching thrütkhea?”

³⁰ Jumonü Juda kiulongthsüpuh Jehoiakim dünkheak Atungpuhnü ha thachoh: David kiulongthsü-binkiu kheak binpü api a she müla, tüsho api ashemi animuro atak ching bahbah tüsho azhing ching thüwün ching bahbah.

³¹ Tüsho inü arü mülimkhi dün api le atsührü tüsho ayamlarübo thsümüchibah; inü arü le Jirusalem ching larü tüsho Juda mihtsürü kheak inü arü azhihde athakhi thsümütsü alala handarübah, tümütüsho arünü mani.

³² Judüki Jeremianü küpqiu püpü lu tüsho Neria tsührü Baruk kilim jihbah, Juda kiulongthsüpuh Jehoiakimnü mo ching takabahkhi Jeremianü thaa thrütshihkhi küpqiu yubo alala thrütkih; tüsho akiphahkhi yubo ahihdo yukajak.