JEREMIA 24 - AMÜSÜH HÜM CL Bible (BSI)

Khubaso Muluk Mahne

¹ Atungpuhnü khubaso muluk mahne Atungpuh arüngyam miki zokhi I ki huh. Ha Babilon kiulongthsüpuh Nebukednezarnü Jehoiakim tsührü Juda kiulongthsüpuh Jehoiakin, api lung Juda torübo, keaklahrü, yingkingrü, Babilon ramtso ching hande ayü dunglim lakheah.

² Muluk khülang ching akhuh münkhi khubaso nangde, khide atsü lakheah, tüshe püpü muluk ching a mütsühkhukpü thsüde khide amütsü khubaso lakheah.

³ Tüsho Atungpuhnü I ki tha, “ Nünü tümü ngüla, Jeremia?” Inü tha, “ Khubasobo, khubasobo atsü a khide tsülah, tüsho khubaso amütsübo a mütsühkhukpü thsüde khide mütsü.”

⁴ Judüki Atungpuh yu I kilim arü:

⁵ Atungpuh Israel Thrünpuhnü ha thachoh: Harü khubaso atsü nangde, inü ha dangpung chingnü Kaldearü lomi ching yüshihrü Juda ching ramtsorü atsü khejihbah.

⁶ Atsü thsungkheaknü arü kheak I mük zobah, tüsho ha lomi ching inü arü belodarübah. Inü arü thsükihbah, tüsho arü müthokheam; inü arü khimbah, tüsho arü mürukkhit.

⁷ Inü arü kilim I Atungpuh de mükheahpü mulong jihbah; tüsho arübo I mihtsürü thsübah tüsho I arü Thrünpuh thsübah, tümüde arü mulong athrünkhinü arübo I kilim rholobah.

⁸ Tüshe Atungpuhnü ha thachoh: Khubaso amütsü mütsühkhukpü lakhi nangde, inü Juda kiulongthsüpuh Zedekia, api yo atorübo, ha lomi ching lakhi Jirusalem ching aningkhibo tüsho Ijip lomi ching larübo ki rhimobah.

⁹ Inü arübo alomi kiulongthsü alala ki atrebe, amütsübe, mihmüthsüm mülakhi, mührü münedung, mulong yuribe, tüsho inü arü yana yüshihkhi dangpungbo alala ching muthrumünean lashihbah.

¹⁰ Tüshe inü nukshang, khümzung, tüsho arüm-tukthsü, inü arü tüsho arü jipürü kilim jihkhi lomi chingnü arübo shahde müdükheakshihyi khiungde arü kheak yüshihbah.