JEREMIA 23 - AMÜSÜH HÜM CL Bible (BSI)

Arüpü Lakhi Mulonglam

¹ Yakzanshuhrü shepünü api mihtsürü thsümünimcho tüsho yanmüzütchonü are! Atungpuhnü thachoh.

² Jumonü Atungpuh Israel Thrünpuhnü, I mihtsürü kümrü yakzanshuhrübo dünkheak ha thachoh: Nüsanü I mihtsürübo müküm; nüsanü arübo yanmüzüt tüsho yana tsoshihdo. Jumonü nüsa rhimo amütsü thsungkheak inü nüsa thsümüchibah. Atungpuhnü thachoh.

³ Inü I mihtsürübo aningkhi lomibo ching yanmüzütkhi bemukhungbah, tüsho arübo nihbuh lapung lomi ching bedarübah, tüsho arübo tsührü labah tüsho wüh jabah.

⁴ Inü arü kümpü yakzanshuhrübo mokhitbah, tüsho arünü kheaküa mütre, yungsho mümüyinnim, yungsho müdükheak, Atungpuhnü thachoh.

⁵ Atungpuhnü thachoh, David thsungkheaknü inü thiyuro-lungki sangkhah asürüshihpü nimungbo tsükjide arado, tüsho kiulongthsürü nangde kiulongthsübah tüsho lümlung lade rhimobah, tüsho lomi ching thiyuro tüsho thiyuro-lungki rhimobah.

⁶ Api nimungbo ching Juda khümkhitbah tüsho Israel akhümkhitkhi ching labah. Tüsho apinü ajipü mung ha labah: “Atungpuh ju isa thiyuro-lungki.”

⁷ Jumonü, Atungpuhnü thachoh, nimungbo arado, judüki kheaküa ha mütha, “Atungpuh lale, shepünü Israel mihtsürü Ijip lomi chingnü bekhit,”

⁸ tüshe “Atungpuh lale, shepünü Israel yamkhün tsührübo dukulim lomi tüsho apinü arü yanmüzütpung lomi alala chingnü bekhit tüsho bekhea.” Tüsho arübonü arü nihbuh lomi ching labah.

Wukihrübo dünkheak Jeremia Yusheak

⁹ Wukihrübo dünkheak: Atungpuh tüsho api amüsüh yu dünkheaknü I mulong trüthünaka lah, I robo alala ajanchoh; I a amüshangrü nangde, khürü yukhunü zhihokhi nangde kamdo.

¹⁰ Tümüde alomi ju müzammüramnü milah; muthrumüneankhi hode lomi tüzhochoh tüsho sunglo ching shiwüh yimtsühpung kungabahdo. Arü rhangdung limro amütsü lah tüsho arü wu-sühmüh alungki yung.

¹¹ Wukihrü tüsho amükeamrü chido Thrünpuh manikhit; I yam ching she inü arü mihbukmuyuk ngüdo, Atungpuhnü thachoh.

¹² Jumonü arü limro ju amiting ching limro shahshah nangde alabah, küpü ching arü jing mükheba tüsho alungba; tümüde arü thsümüchipü kam ching inü arü kheak thsümütsü handarübah, Atungpuhnü thachoh.

¹³ Samaria ching wukihrü bolung inü amukhiukbe ngüdo: Arünü Baal hode müchit tüsho I mihtsürü Israel bephülapde tso.

¹⁴ Tüshe Jirusalem ching wukihrü bolung inü khide atrebe ngüdo: Arünü müzammüramchoh tüsho akeangyu ching tsahchoh; arünü amütsü rhimorü khah düküngloshihchoh, junangde sheshe mihbukmuyuk chingnü murholo; arü alala I ki Sodom nangde kamdo, tüsho ha ching larübo Gomorra nangde lah.

¹⁵ Jumonü wukihrübo dünkheak Wuto Atungpuhnü ha thachoh: “ Inü arü kilim tsühyungpü akhüh tsühshihbah, tüsho müzüm duhbah; tümüde Jirusalem ching wukihrübo kheaknü Thrünpuh mümükheahkhi lomi ching budo.”

¹⁶ Wuto Atungpuhnü ha thachoh: Nüsa ki müchitrü wukihrübo yu dani; arünü nüsa bemüchihchoh. Arünü nihbuh lümkhi michih asukchoh, Atungpuh mün chingnü yung.

¹⁷ Atungpuh yu mükhemükimrü kheak arünü thachoh, “ Nüsa tsüde alabah;” tüsho nihnihde nihbuh mulongkhi ching yanrü ki arünü thachoh, “Thsümütsü tümü she nüsa kheak marü.”

¹⁸ Tüshe shepünü akheahpü tüsho api yu anipü Atungpuh athsunganah ching zhipde? Azhiyukpü thsüde shepünü api yu anide?

¹⁹ Kheahang, Atungpuh tsüngpungtsüngpung! Bukakhiukkhi tsodo, chitmühean khülang; ha mihbukmuyuk ku kheak keamkihbah.

²⁰ Api lümkhi mürhimoyiki tüsho akuk müngüyiki Atungpuh bukakhiukkhi murholo. Püpü nimungbo ching nüsanü mütsande anikhitbah.

²¹ Inü wukihrübo müthiyi, tütüshe arünü alihdo; inü arü ki masuk, tütüshe arünü müchitdo.

²² Tüshe arünü I athsunganah ching zhipkhülaa, arünü I mihtsürübo ki I yu zhiyuka labah, tüsho arü amütsü limro tüsho arü rhimo amütsü chingnü rholoa labah.

²³ Atungpuhnü thachoh, I a aphüni lakhi Thrünpuh a de, tüsho limshu Thrünpuh yung de?

²⁴ Inü arü müngükhukpü thsüde sherünü ajik dangpungbo ching jikpü kukla? Atungpuhnü thachoh. Inü yinmi tüsho alomi mümi de? Atungpuhnü thachoh.

²⁵ Akeangyu müchitrü wukihrübonü I mung chingnü athakhi inü sodo, “ Inü mido, inü mido!”

²⁶ Wukihrübonü arü lümkhi akeangyu müchitkhi akeangyu wukihrü mulong ching külokhüh laba?

²⁷ Arü jipürünü I mihbah Baal kilim rholokhi nangde I mihtsürübonü arü milim kheankhinü I mung mihshihpü arünü lümchoh.

²⁸ Wukihrü shepünü milim mikheanü milim kheanshang, tüshe shepü I yu lanü thiyuronü I yu asukshang. Tümü rimneang ju wheat hi lung rukhüh la? Atungpuhnü thachoh.

²⁹ Atungpuhnü thachoh, I yu mo nangde yung de, tüsho lungto adütre kamde kingnakbe yümlung nangde yung de?

³⁰ Kheahang, jumonü shepünü khülang kheaknü khülang I yu ahühchonü wukihrübo kheak inü azhihchoh, Atungpuhnü thachoh.

³¹ Kheahang, inü wukihrübo azhihchoh, Atungpuhnü thachoh, sherünü nihbuh yunü thacho, “Atungpuhnü thachoh.”

³² Kheahang, akeangyu milim müchitrü inü azhihchoh, Atungpuhnü thachoh, tüsho sherünü jurü thacho, tüsho sherünü inü müthiyide, akeangyu thade tüsho mükümkangde I mihtsürübo bephülapde tsocho; jumonü arünü ha mihtsürü shahjungde alü müthsüshih, Atungpuhnü thachoh.

Atungpuh Hahmülang

³³ Küyimki ha mihtsürü, yungsho wukihrü, yungsho amükeamrünü nü ki keokhiba, “Atungpuh müchityu tümü a?” nünü arü ki thabah, “Tümü müchityu, tüsho inü nüsa bahyukbah, Atungpuhnü thachoh.”

³⁴ Tüsho wukihrü yungsho amükeamrü, yungsho mihtsürü sherünü athaba, “Atungpuh müchityu,” inü arü tüsho arü yamkhün thsümüchibah.

³⁵ Hanangde nüsa khülangnü khülang nüsa bolung thaachihbah, “Atungpuhnü tümü alojih de?” Yungsho “Atungpuhnü tümü asukde?”

³⁶ Tüshe “Atungpuh müchityu” de arünü kheaküa dütha, tümüde müchityu ju mihbüm aban yubo lah, tüsho junangde nüsanü Wuto Atungpuh isa arhang Thrünpuh yu thamüchihchoh.

³⁷ Nünü hanangde wukihrü ki keokhibah, “Atungpuhnü nü ki tümü alode?” Yungsho “Atungpuhnü tümü asukde?”

³⁸ Tüshe nüsanü, “Atungpuh müchityu” de müthapü inü nüsa thiyichoki, “Atungpuh müchityu,” Atungpuhnü thachoh de thasho: Tümütüsho nüsanü harü yubo, “Atungpuh müchityu” thado,

³⁹ jumonü tsükjide inü nüsa thrüa lubah tüsho nüsa le nüsa jipürü kilim inü ajihkhi kiuto I mikinü jipa bahbah.

⁴⁰ Tüsho inü arü kheak akheam müla mihmüthsüm mülakhi tüsho lünnü achih ngüpü amümihbe handarübah.