JEREMIA 22 - AMÜSÜH HÜM CL Bible (BSI)

Juda kilim Jeremia Yusheak

¹ Atungpuhnü ha thachoh: Juda kiulongthsüpuh yamkhün ching yükiang, tüsho ju ching ha yu asukang,

² tüsho thaang: Atungpuh yu aniang, O David kiulongthsübinkiu kheak binkhi Juda kiulongthsüpuh–nü, tüsho nü yamlarübo, tüsho ha chipiripitbo ching azahrü nü mihtsürübo.

³ Atungpuhnü ha thachoh: Thiyuro tüsho thiyurolungkinü rhimoang, tüsho rükyuka larü ajunorü khah chingnü bekhitang. Tüsho amülim düthsü, yungsho khiungkerü, mürerü, tüsho khimoberü ki athsümünim düla, yungsho ha dangpung ching amülim mülarü thiyih dübuk.

⁴ Tümüde nüsanü ha yu anisho, ha yam ripitbo hode David kiulongthsü-binkiu kheak binrü kiulongthsürübo, arübo, tüsho arü yamlarübo, tüsho arü mihtsürübo, khora-lolungbe tüsho khorabo kheak binbah azahbah.

⁵ Tüshe nüsanü ha yubo manisho, I Atungpuhnü thiyuchihchimde thachoh, ha yam zhikrangkhündo akambah.

⁶ Tümüde Juda kiulongthsüpuh dünkheak Atungpuhnü ha thachoh: Nü a I ki Gilead nangde Lebanon wung nangde lah; tüshe nü sunglo, mihtsürü mülakhi kiuto kamshihpü inü thiyuchihchimchoh.

⁷ Inü nü azhihde thsümünimrü, arü alala thsühnuk shuhbahle tsanglungbah; arünü nü yo amokhitkhi cedarbo kiushakbah tüsho mo ching jipyukbah.

⁸ Tüsho trükshih ahihdonü ha kiuto hode atsahhobah, tüsho arü alalanü khülangnü khülang ki thabah, “Ha kiuto ato kheak tümüde Atungpuhnü ha ruk rhimokhea?”

⁹ Tüsho arünü alobah, “Tümütüsho arünü Atungpuh arü Thrünpuh tangzüngkhi bahyukdo tüsho püpü thrünpuhbo kingaün tüsho tankih.”

Joahaz dünkheak Jeremia Yusheak

¹⁰ Shepü shea lanü api thsungkheak dütrip, yungsho api thsungkheak dütüzho; tüshe shepü tsoabahchonü api thsungkheak tripang, tümüde anihbuh asürü-lomi kheahpü api malodarü.

¹¹ Atungpuhnü Josia tsührü Joahaz, shepü abuh müthri Juda kiulongthsüpuh lakhea, tüshe ha dangpung chingnü tsoabahkheanü, api dünkheaknü tha: Api ha ching malodarü,

¹² tüshe arünü api ramde ayüpung api shebah, tüsho apinü küyimkishe ha lomi müngülo.

Jehoiakim dünkheak Jeremia Yusheak

¹³ Shepünü thiyuro mülade anihbuh yam thsücho tüsho thiyuro müthade anihbuh khiungshak akube thsücho; shepünü anihbuh yamhingrü tümü mülakhi thsungkheak rhimoshihcho, tüsho arü mihkhahbo müjihchonü are;

¹⁴ shepünü thacho, “ Inü I yam khiungshak atotobo achangbe khiungshak ato bede athsübah,” tüsho shepünü ju thsungkheak ayinripitbo thsücho, cedarnü kümlocho tüsho yin-mürümmuchunü mujucho.

¹⁵ Cedarnü thüyambo thsümonü nü kiulongthsürü kamshihcho de? Nü buhnü atsühkhi tüsho ayungkhi yung de tüsho thiyuro tüsho thiyuro-lungki mürhimokhea de? Junangde api kheak alala tsüde alakheah.

¹⁶ Apinü zhochihrü tüsho müthsümülarü dünkheak mahkhap; ju tsüde alakheah. Ha amütsan I mükheahpü yung de? Atungpuhnü thachoh.

¹⁷ Tüshe nü mükbo tüsho mulong thiyuro mülakhi alü thsüpü amülim mülarü thiyih bukpü, tüsho juno-rhimopü tüsho athsümünim-yakli rhimopü lang ah.

¹⁸ Jumonü Jehoiakim tsührü, Juda kiulongthsüpuh Josia dünkheak Atungpuhnü ha thachoh: Arünü api thsungkheak ha ruk thade mütüzho, “Aha, akhiung!” yungsho “Aha, achi!” Arünü api thsungkheak ha ruk thade mütüzho, “Aha, Atungpuh !” yungsho “Aha, api wüntre-müretah!”

¹⁹ Donki mi bahkhi nangde api mi bahbah, Jirusalem chipiripitbo hode nimkhita tüsho jipkhita bahbah.

²⁰ Lebanon lim wutuang, tüsho zhiang, tüsho Bashan ching nü düsheak shuhkihang; Abarim chingnü zhiang, tümüde nü muzhorü alala zünaka lah.

²¹ Inü nü lalim-tsükhi ching asuk, tüshe nünü tha, “ Inü mani.” Ha nü athunuchoki nü limro lakheah, tümüde nünü I yu mani.

²² Apungnü nü mihnu neakrübo yünde atsobah, tüsho nü muzhorü ramde atsobah; judüki nü rhimo amütsü alala dünkheak nü achih ngübah tüsho mulong dükheakbah.

²³ O Lebanon ching larübo, cedarbo ching sap shurübo, nüsa kheak aliberü thsünükhi nangde thsünü arüchoki nüsa küdükhüh amuzhobe laba!

Jehoiakin kheak Thrünpuh Mahkhap

²⁴ Atungpuhnü thachoh, Jehoiakim tsührü, Juda kiulongthsüpuh Jehoiakin I khah tsülim peang mütsan-dokhi yingkhüm thsüthsü she, ju chingnü she inü nü rukkhita bahbah

²⁵ tüsho nü rhangdung yimrü khah ching nünü atrerü khah ching, Babilon kiulongthsüpuh Nebukednezar tüsho Kaldearü khah ching jihbah.

²⁶ Inü nü tüsho nü zübekhi nü be, nü müzübepung lomi ching yana tsoshihbah, tüsho ju ching nü shebah.

²⁷ Tüshe arünü arülopü künkhi lomi ching arü marülo.

²⁸ Ha mihtsürü Jehoiakin ha mükheahnekhi atrükhi phüh a de? Tümü thsükhi api le api tsührübo yankhita bah-a la tüsho arünü mümükheahkhi lomi ching yana tsoshih-a la?

²⁹ O alomi, alomi, alomi, Atungpuh yu aniang!

³⁰ Atungpuhnü ha thachoh: Ha mihtsürü ha tsührü mülapü thrütyukang, api nimungbo ching akuk müngüpü mihtsürü; tümüde api tsührü shenü she David kiulongthsü-binkiu kheak binpü api tüsho Juda ching yakzan shuhpü api mümüthri.