JEREMIA 17 - AMÜSÜH HÜM CL Bible (BSI)

Juda Neak tüsho Thsümüchi

¹ Juda neak ju yinchi dosangnü thrütlah; shotolung-müküp müzheannü arü mulong beak kheak tüsho arü kingaün sadam juhbo kheak thrütkihlah,

² arü tsührübonü she arü kingaün sadam tüsho Ashera sangthsübo lümkhitchoh, sangdung phüyak aban ki tüsho awung achangbo kheak,

³ mükeak ching awungbo kheak. Nüsa lomi alala ching nüsa lakhit tüsho rahpungbo nüsa neak dün nüsa riribonü alushihbah.

⁴ Nüsa nihbuhnü arhimokhi hode inü nüsa kilim jihkhi yamrüplurüp dükheakbah, tüsho nüsanü mümükheahkhi lomi ching inü nüsabo nüsa riribo tankihshihbah, tümüde I bukakhiukkhi ching lünnü atakpü mo khülang takkih-a lah.

⁵ Atungpuhnü ha thachoh: Shepünü mihtsürü kheak kinchonü muthrumünean, shepünü nihbuh sühmüh thsungkheak shih kheak angükihcho tüsho shepü mulong Atungpuh kheaknü chamkhicho.

⁶ Api ju loshelo ching rim nangde lah tüsho atsü arükhi müngü, tüshe tümü masürüpung thimi lo ching she mülapung labah. Api kheak atsü tümü müdünjichoh.

⁷ Shepünü Atungpuh kheak kinchonü müngühmühi, shepü akin Atungpuh la.

⁸ Api a keyean khimkhi sangdung nangde ayingbo keyung ching chinde yüchoh. Alamlam arüchoki mütre; ayübo kamruhroro phüyaklah. Tsüng marüchoki atrepü müla, aso asodü lang lachoh.

⁹ Mulong ju alala kheaknü mülapmüjikhi lah tüsho athsüngupü münchi holah, shepünü ju anikhitkhukba?

¹⁰ I Atungpuhnü alala kilim arü limrobo ayannü, arü rhimobo ayannü ajihpü rükakichoh tüsho mulong yimchoh.

¹¹ Patridge wuhnunü mühüpkhitde püpürü jipjipbo bemukhungkhi nangde thiyuro mülakhi lakhit hanmukhungrü ju ruk ah; api rhangdung murochoki anihbuh lakhitbo dükheakbah, tüsho akheam ching api makhakhi mütsanbah.

¹² O müretahkhi kiulongthsü-binkiu, atankih chingnü ashuhkihkhi, ju isa arüngyam dangpung ah!

¹³ O Israel mulonglam! O Atungpuh ! Nü bahyukrü alala achih ngübah; sherü nü kheaknü rholode tsochonü alo ching thrütyukbah, tümüde arünü rhangdung ke-bukpung, Atungpuh bahyukdo.

Jeremianü Arung Kheangkhi

¹⁴ I thsüngujang, thsüngujang, O Atungpuh , tüsho I athsüngubah; I khümkhitang, tümüde nü a inü mungshipü lah.

¹⁵ Kheahang küruk arünü I ki thacho, “Atungpuh yu küching la? Ju arüshang!”

¹⁶ Inü nü mihnu neakde nü yankhi chingnü mutso, yungsho inü adükheakpü nimung mükün. I münküp chingnü tümü akhiukkheanü nünü mükheahlah; ha nü miki lakheah.

¹⁷ I ki atrebe düla; nü a thsümütsü nimung ching I tsoyukpung ah;

¹⁸ I thsümüchirü achih ngüshang, tüshe I achih düngüshih; arü müyinsahshang tüshe I a dümüyinsahshih; arü kheak thsümütsü nimung handarang; alochode athsümüchinü arü dükheakshang!

Amunimung Mukhi

¹⁹ Atungpuhnü I ki ha tha: Yüang tüsho Juda kiulongthsürübo le mihtsürübo yüzahla akhiukla düpung chipiripitbo, tüsho Jirusalem chipiripitbo alala kheak zhipang,

²⁰ tüsho arü ki thaang: Nüsa Juda kiulongthsürübo, Juda alala, tüsho Jirusalem ching larü alala, harü chipiripitbo chingnü yüzahrü, Atungpuh yu aniang.

²¹ Atungpuhnü ha thachoh: Nüsa rhangdung thsungkheaknü amunimung hah mühanpü kümkangang yungsho Jirusalem chipiripitbo chingnü hande düyüzah.

²² Tüsho amunimung nüsa yam chingnü hah dühankhit yungsho rhimo tümü düthsü, tüshe inü nüsa jipürü ki thiyukhüm jihkhi nangde, amunimung müsühde zoang.

²³ Tütüshe arünü mani yungsho arü nükhün mumupho; arünü arü hungbo chungthülang tüsho mani yungsho thsangdan müleangkhi.

²⁴ Tüshe Atungpuhnü thachoh, nüsanü I ki anisho, tüsho amunimung ha kiuto chipiripit hode hah tümü hande mazahsho, tüshe amunimung müsühde zosho tüsho rhimo müthsüsho,

²⁵ ha kiuto chipiripit hode David kiulongthsübinkiu kheak binrü kiulongthsürübo, arü torübo, Juda mihtsürü tüsho Jirusalem ching larü khora-lolungbe tüsho khorabo kheak binbah yüzahbah tüsho ha kiuto lünnü alabah.

²⁶ Tüsho mihtsürübo Juda kiutobo tüsho Jirusalem mühi dangpungbo, Benjamin lomi, Shephela, awung lomi, tüsho Negeb chingnü taka kingaünkhi tüsho laksah-a kingaünkhi, hi kingaün tüsho rhümthüneabe, tüsho Atungpuh yam ching makshe jihkhi kingaünbo lubah arübah.

²⁷ Tüshe nüsanü amunimung müsühde azopü tüsho amunimung Jirusalem chipiripitbo ching hah mühanyukpü I ki manisho, ha chipiripitbo ching inü mo takkihbah; hanü Jirusalem dangpung aniuabahbah tüsho shenü müzünmütkhuk.