JEREMIA 1 - AMÜSÜH HÜM CL Bible (BSI)

¹ Benjamin lomi Anathoth ching lakhi amükeamrü bolung Hilkia tsührü Jeremia yubo,

² Amon tsührü Juda kiulongthsüpuh Josia nimungbo ching api kiulongthsü kam thürükheak mahsampü ching anihbuh kilim Atungpuh yu arü.

³ Kheaküshe Josia tsührü Juda kiulongthsüpuh Jehoiakim nimungbo ching, tüsho Josia tsührü Juda kiulongthsüpuh Zedekia kam thürükheak khülang akheam khiungde, khinu phüngü ching Jirusalemrü ramde ayükhi khiungde arü.

Jeremia Jikhi

⁴ Kheakü Atungpuhnü I ki tha,

⁵ “ Inü nü nuyam ching müthrünchokinü inü nü mükheahlah, tüsho nü müzübeyide inü nü müsühkhit; inü nü trükshihbo kilim wukihrü khülang thsüpü mokhit.”

⁶ Judüki inü tha, “Ah, Atungpuh Thrünpuh ! Kheahang, inü küde athabanü mümükheah, tümüde I azürü nunu khülang ah.”

⁷ Tüshe Atungpuhnü I ki tha, “‘ I azürü nunu khülang ah’ de dütha.” Tümüde inü nü sherü kilim yüshihbanü nü ayübah, tüsho inü tümüpürü nü ki thiyukhüm jihbanü nünü athabah.

⁸ Arü dütre, tümüde nü kümpü I nü lung lah, Atungpuhnü thachoh.

⁹ Judüki Atungpuhnü akhah chungkhit tüsho I mün qiu; tüsho Atungpuhnü I ki tha, “ Kheahang, inü I yubo nü mün ching yukjihdo.

¹⁰ Kheahang, khihni inü nü trükshih tüsho kiulongthsübo kurungkheak arukkhitpü tüsho athomülünpü, athsümünimpü tüsho lahyuka bahpü, athsüpü tüsho akhimpü zojihchoh.”

Michih Mahne

¹¹ Atungpuhnü I ki keokhi, “Jeremia, nünü tümü ngücho?” Tüsho inü tha, “ Inü almond sangkhah khülang ngüchoh.”

¹² Judüki Atungpuhnü I ki tha, “ Nünü tsüde ngüdo, tümüde I yu dünjipü rhimoa huhpü inü kheahde lah.”

¹³ Atungpuhnü I ki thalo, “ Nünü tümüpürü ngücho?” Tüsho inü tha, “Phüh khülang amapde alakhi dukulim peangnü angübah ngüde ayükhi inü ngüchoh.”

¹⁴ Judüki Atungpuhnü I ki tha: Lomi ching larü alala kheak dukulim peangnü thsümütsü zhikihde arübah.

¹⁵ Tümüde kheakü inü dukulim kiulongthsü trükbo alala ki jichoh, Atungpuhnü tha; tüsho arü arübah tüsho arü alalanü Jirusalem chipiripitbo ki mükamde alakhi rhü alala kheak tüsho Juda kiutobo alala kheak kiulongthsü-binkiu zobah.

¹⁶ Tüsho arünü I bahyukde mihbukmuyukkhi alala thsungkheak inü arü azhihde I mahkhapkhibo thabah; arünü jipürü thrünpuhbo ki rhümthüneabe taka kingaün, tüsho arü nihbuh khahnü arhimokhi ki kingaün.

¹⁷ Tüshe nü, nü chim rümang; asürang tüsho inü nü ki thiyukhüm jihkhi alala arü ki thaang. Arü miki dütre jude yungsho inü nü arü miki treshihbah.

¹⁸ Tüsho kheahang, khihni inü nü kilim chipi ayünkhi kiuto, yinchi dungjing, müwayinchi rhü, lomi alala azhihde– Juda kiulongthsürübo, yakzanshuhrübo, amükeamrübo tüsho lomi mihtsürü azhihde thsüjihdo.

¹⁹ Arünü nü bede keochihbah; tüshe arünü nü mukuk, tümüde nü bekhitpü I nü lung lah, Atungpuhnü thachoh.