JAKOB 3 - AMÜSÜH HÜM CL Bible (BSI)

Mulo Kümkangpü

¹ I keoniorübo, nüsa ahihkhüh thsangyurü dükam, tümüde isa sherünü thsangyuchonü atobenü müküpde thiyukhapbah de nüsanü mükheahlah.

² Tümüde isa alalanü hihde lakmihchoh, tüsho mihtsürü khülang apinü athakhi ching mülakmihsho api athülünkhi mihtsürü, pang she abümnü adanyukpü kukkhi lah.

³ Isanü khorabo mün ching isa ki mihyuanishihpü thsüde münmükhipbo yukjihsho, isanü arü pang abümnü bechoh.

⁴ Sangkungbo she kheahang; arü khide ato thsüthsü she tüsho apung amüküpnü yünyün she, abebuhnü amulongkhi yande abebe anikhühnü bechoh.

⁵ Junangde mulo ju pang shihcham lung aninibe ah, tüshe tode kükheangchoh. Mo dübin anikhühnü künangde mütüm ato takchonü lümakheahang!

⁶ Tüsho mulo ju mo ah. Ha isa pang shihcham bolung amütsü lomi, pang athrünkhi thsümünimjihde, thsümüchi chingnü arükhi mo kheak rhangdung athrünkhi yihkih-a takchoh.

⁷ Tümüde shiwüh mungji aban tüsho wuhnu, keakninphuru tüsho keto loriloko dankhuklah tüsho mihtsürünü danyukdo,

⁸ tüshe mihtsürü shenü she mulo müdankhuk. Ha mükeamramkhi amütsü, ashebe müzümnü milah.

⁹ Hanü isanü Atungpuh jichoh tüsho Abuh shijihchoh, tüsho hanü isanü Thrünpuh kiphahkhi ching thrünkhi mihtsürü athruajichoh.

¹⁰ Ju mün rukhüh chingnü mungshipü tüsho athruajipü akhiukchoh. I keoniorübo, hade müthsübeah.

¹¹ Kenü rukhüh chingnü ke aniung tüsho akhüh bukkhitpü kukla de?

¹² I keoniorübo, khubasodungnü olivbo, yungsho kurungasoliunü khubaso asopü kukla de? Yungsho hukenü ke tsütsü akhiukshihpü mukuk.

Akulimnü Lümlung

¹³ Nüsa bolung shepü lümlung tüsho anikhitkhi la? Api rhangdung atsü hode azhihayih lümlung chingnü api rhimobo huhshang.

¹⁴ Tüshe nü mulong ching mükthsü akhüh, tüsho mükhütmüra lasho, ju dünkheak dükükheang tüsho thiyuro düreanglo.

¹⁵ Hadürü lümlung ju akulimnü arükhi yung; ha alomi yo, me-mülakhi, amünean ah.

¹⁶ Tümüde küching mükthsü tüsho mükhütmüra lanü, ju ching neamneamruru tüsho amütsü rhimo labah.

¹⁷ Tüshe akulimnü arükhi lümlung ju akhuhde atsangkhitkhi, jushu mungtsü, azhihayih, zhakmüzhi, mihmüthsüm tüsho sangaso atsünü mide, jakkheahkhi tüsho yiuhkhapkhi müla.

¹⁸ Tüsho mungtsü-thsürünü mungtsü ching mükheankhi ju thiyuro-lungki yimlukhi lah.