Biblia Todo Logo
Bìoball air-loidhne

- Sanasan -

JAKOB 2 - AMÜSÜH HÜM CL Bible (BSI)


Rükmütsü azhihde Atünadoyu

1 I keoniorübo, isa Atungpuh Jisu Khrista, müretahkhi Atungpuh kheak nüsanü kinla le, jakkheahkhi dühuh.

2 Tümütüsho mihtsürü khülang suna nüpü tüsho khimmih atsü yihbah nüsa mukhungmüdan ching arü, tüsho zhochih mihtsürü she khimmih amürhüt yihbah azahsho,

3 tüsho nüsanü khimmih atsü yihbuh ki mulong jihde, “Muzhobah ha kheak binang,” tüshe zhochihbuh ki, “Nü ha kheak zhipang,” yungsho, “I jing ki adampü kheak binang,” de thasho,

4 nüsanü nüsa bolung yakkhitchoh yung de, tüsho amütsü lümkhibo bede mahkhaprübo kamchoh yung de?

5 Aniang, inü muzhokhi keoniorübo. Akin ching alarü thsüpü tüsho apinü amuzhorü ki alokhikhi kiulongthsü yamrüplurüp lupü Thrünpuhnü zhochihrü mokhitkhi yung de?

6 Tüshe nüsanü zhochihrü mükhemükimdo. Nüsa junokhi ju alarünü yung de, nüsa mahkhappung ching nima yüshihkhi arü yung de?

7 Nüsa kilim jihkhi mung atsü mükhemükimkhi arü yung de?

8 Nüsanü atsütsü amüsühyu yande, “Nünü nü yamhingrü ki nihbuh nangde muzhoang,” dükhi kiulongthsü yakzan rhimochosho, tsüde rhimochoh.

9 Tüshe nüsanü jakkheahkhi huhsho, nüsanü neak yihbeakchoh, tüsho athsümünimrü ah de yakzannü mütsanchoh.

10 Tümüde shepünü yakzan athrünkhi zocho tüshe thiyuji khülang lakphahsho ju alala amülim kamshihchoh.

11 Tümütüsho khürünü, “Müzammüram düyihbeak,” kheaküshe, “Dülaksah,” de tha. Nünü müzammüram müyihbeak tüshe laksahsho, nü ju yakzan thsümünimrü kamdo.

12 Jumonü zuzu kampü yakzannü mahkhaprü lakhi mihtsürübo nangde asukang tüsho rhimoang.

13 Tümüde mihmüthsüm muhuhrü ki mahkhapkhinü mihmüthsüm mülachoh; tütüshe mihmüthsümnü mahkhap kurungkheak kukchoh.


Akin tüsho Rhimo

14 I keoniorübo, mihtsürü khülangnü api akin lah de thabah rhimobo mülasho, junü tümü alü thsücho? Api akinnü anihbuh khümkhitpü kukba de?

15 Keoniorü yungsho keonioberü khülang khimmih yungsho tsühyungbe mülasho,

16 tüsho nüsa khülangnü arü pang thsungkheak yihnüpü lakhi kukruk müjihde arü ki, “Mungtsü chingnü yüang, lamlamang tüsho bukthsüang,” de thasho, ju tümü alü la?

17 Jumonü akin müthsünnü, ju ching rhimobo mübesho ashekhi ah.

18 Tüshe khürünü athabah, “Nü akin lah tüsho I a rhimobo lah.” Nü rhimobo mübede I ki nü akin huhang, tüsho I rhimobo hode inü nü ki I akin huhbah.

19 Thrünpuh khülang lah de nüsanü kinchoh; tsülah! Arimrinü she kinchoh tüsho trede ajanchoh.

20 Nü makha mihtsürü, rhimobo mübesho akin ju akeangkeang de nünü thiyumütsan lunela de?

21 Apinü atsührü Isak kingaün sadam kheak jihchoki, isa abuh Abraham rhimobonü alim mütsankhi yung de?

22 Api rhimobo lungnü akin müzhakde alakhi nüsanü ngülah, tüsho akin ju rhimobonü banthsangshih,

23 tüsho amüsühyu dünjide tha, “Abrahamnü Thrünpuh kin, tüsho api kilim thiyuro-lungki khejih”; tüsho api ju Thrünpuh müyambuh de ji.

24 Mihtsürü khülang ju akinnü lang yungde, rhimobonü alim mütsankhi nüsanü ngülah.

25 Tüsho junangde müzammürambe Rahabnü she yunithsürübo beyukbah limro püpünü awukhiukshihchoki rhimobonü anihbe alim mütsankhi yung de?

26 Tümüde me mübesho pang ju ashekhi lakhi nangde, rhimobo mübesho akin ju ashekhi ah.

Yimkhiung Naga CL Bible - AMÜSÜH HÜM

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan