JAKOB 1 - AMÜSÜH HÜM CL Bible (BSI)

¹ Thrünpuh tüsho Atungpuh Jisu khrista tankihrü Jakob kilimnü, Hiumüzüta lakhi trük thürükheak mahne kilim: Salüm.

Akin tüsho Lümlung

² Keoniorübo, küyimki nüsanü rükaki aphuaphu shorubanü alala asühkhi ah de lümang,

³ tümüde nüsa akin rükakikhinü arümkheam akhiukshihchoh de nüsanü mükheahlah.

⁴ Tüsho nüsa tümü muzholümde, khiukdahde tüsho thülünde alapü thsüde arümkheam ju rünkhiungshang.

⁵ Tüsho nüsa khürü lümlung mülasho, müsüngde alala kilim salade ajihbuh Thrünpuh ki kheangang, tüsho ju nü kilim jihbah.

⁶ Tüshe apinü mudukiuhlode akinnü api ki kheangshang, tümüde shepünü dukiuhlochonü apungnü yüna abükshihkhi keto nangde lah.

⁷ Ju mihtsürünü Atungpuh kilimnü tümükhüh ngüpü mülümbeah;

⁸ api a lümtrüp lakhi mihtsürü, api rhimo alala ching achiaying müla.

Zhochihrü tüsho Alarü

⁹ Abobe kuhi ching lakhi keoniorünü api shuhkihkhi dünkheak dükükheang,

¹⁰ tüsho alarünü azhihayihkhi ching lashang, tümütüsho mütüm sangbün nangde api tsoabahbah.

¹¹ Tümüde ani zhipzhip takde akhiukkhinü rim yiuhabahshihchoh; asangbünbo keamkhichoh, tüsho kheahtsübe dükheakchoh. Junangde alarü mihtsürü ju api shothsümolo yüchoki dükheakabahbah.

Rükakheahkhi tüsho Rükaki

¹² Mihtsürü shepünü rükaki arümchonü müngühmühi, tümüde küyimki apinü rükaki arümkhukbanü api muzhorü ki Thrünpuhnü alokhikhi rhangdung kuthran ngübah.

¹³ Tüsho api rükaki lachoki, “Thrünpuhnü I rükakido” de shenü she dütha; tümüde amüneannü Thrünpuh rükakipü mukuk tüsho apinü she sheshe rükmakichoh;

¹⁴ tüshe mihtsürü aban nihbuhnü amütsü künkhinü bephülapde tüsho münityukde lachoki rükakichoh.

¹⁵ Amütsü künkhi küyimki mihlabanü neak zübejihchoh; tüsho küyimki neak azorü kambanü ashepü handarüchoh.

¹⁶ Inü amuzhokhi keoniorübo, dümülapyukshih.

¹⁷ Atsü tüsho khiukdahkhi thsambah aban akulimnü lah, mebo akhinkhi nangde mümüthrikhi yinmi ayinbo Abuh kilimnü akichoh.

¹⁸ Isa ju thrüna lakhi alala lungnü akhuh sangaso mungji thsüpü thsüde thiyuro yu hode isa zübeshihpü apinü mokhit.

Asokhi tüsho Rhimokhi

¹⁹ Inü muzhokhi keoniorübo, ha mükheahang. Mihtsürü abannü asopü niokheamang, tüshe athapü tüsho bukakhiukpü arünnü thsang,

²⁰ tümüde mihtsürü bukakhiukkhinü Thrünpuh thiyuro-lungki mühandarüchoh.

²¹ Jumonü amakham yakli tüsho amütsü dünjide alakhi bahkhiang, tüsho nü khümkhitkhukpü lakhi, nü kheak yangyukkhi yu azhihayihde leangkhiang.

²² Tüshe thiyu yande arhimorü thsang, tüsho nüsa küdahnü mülapyukde asorü lang düthsü.

²³ Tümüde khürü thiyu sorü thsübah arhimorü yungsho, api ju meayinpung ching miro tsütsü ayinkhi mihtsürü kiphahlah;

²⁴ tümüde apinü anihbuh ayina kheahchoh tüsho tsoabahchoh tüsho api küruk lakheanü khülangkinü mihabahchoh.

²⁵ Tüshe shepünü athülünkhi yakzan, zuzu yakzan, tüsho aroride arhimopü ching kheahde, soa lakhi mümihde rhimochonü anihbuh rhimokhi ching api müngühmühibah.

²⁶ Khürünü api ju akin ching mulong jihlah de lümbah anihbuh mulo müdanyuksho, api küdah thsüde mülapyukchoh tüsho api kingaün ju akeangkeang.

²⁷ Thrünpuh tüsho Abuh miki atsangkhitkhi tüsho mümüneankhi kingaün ju ha: arü thsümütsü ching mürerü tüsho khimoberübo rhua kheahpü, tüsho alominü athsümünimkhi chingnü nihbuh mükihkhipü lah.