ISAIA 64 - AMÜSÜH HÜM CL Bible (BSI)

¹ O nünü yinmi chakashungbah akikhülaa, junangde awungbonü nü miki niukbah–

² monü sangkhah aniuchoki nangde tüsho monü ke amapshihchoki nangde–nü azhihrü ki nü mung mükheahshihpü, junangde trükshihbonü nü miki ajanbah!

³ Küyimki nünü isanü mükkin mülakhi atrebe rhimokhea, nü aki, awungbonü nü miki ajan.

⁴ Ahokhi lünbo ching shenü muso, she nükhünnü musokhit, api aleangrü thsungkheak shepünü rhimocho, nü hobah she müknü tümü Thrünpuh müngü.

⁵ Asühde alungki rhimorü nü limrobo ching nü lümkhitrü nünü shoruchoh. Tüshe nü bukakhiukde alakheah, tüsho isanü neak yihbeak; hanangde isanü mutuklode rhimosho, küde thsah isa khümkhitba?

⁶ Isa alala mümüsührü nangde kamdo, tüsho isa thiyurolungki rhimo alala amüneankhi khim nangde lah. Isa alala sangyü nangde kamshihchoh, tüsho isa amülimnü apung nangde isa yünde tsochoh.

⁷ Nü mung jirü she müla, yungsho nü ramlopü mürangrü müla; tümüde nünü nü miro isa kheaknü jikabah, tüsho isa neak dünkheaknü isa bahyuk.

⁸ Tütüshe, O Atungpuh , nü a isa Abuh; isa ju alo, tüsho nü isa phühdamrü; isa alala nü khah rhimo ah.

⁹ Müshakde bukdakhiuk, O Atungpuh , tüsho lünnü amülim dülümkhit. Kheakü lümakheahang, isa alala nü mihtsürü.

¹⁰ Nü amüsüh kiutobo sunglo kamdo, Zion ju sunglo kamdo, Jirusalem zhikrangkhündo lah.

¹¹ Isa yo amüsüh tüsho akheahakham arüngyam, küpü ching isa jipürünü nü mung shikhea, ju monü takabahdo, tüsho isa lopung atsübo athsümünimkhibo kamdo.

¹² Ha alala dunglim, nü tukloba de, O Atungpuh ? Nü zhikde alaba de, tüsho isa khitode thsümüchiba de?