ISAIA 6 - AMÜSÜH HÜM CL Bible (BSI)

Isaia Tankihpü Thiyikhi

¹ Kiulongthsüpuh Uzzia shekhi kam ching, inü Atungpuh kiulongthsü-binkiu kheak binde, achang tüsho shuhkih-a ngü; tüsho api shulünkhimnü arüngyam mi.

² Api kumung seraphbo lakheah; arü abande ghidükeang thuruk kih-a lakheah: mahnenü arü miro lüpdo tüsho mahnenü arü jing lüpdo, tüsho mahnenü phinde alakheah.

³ Tüsho khülangnü püpürü ki ji tüsho tha: “Amüsüh, amüsüh, amüsüh ju Wuto Atungpuh ; alomi lüpdükhi api müretahkhinü milah.”

⁴ Arü jikhi düsheaknü dungjingbo tüsho khimtanbo aniungshih tüsho mokhühnü thüyam mi.

⁵ Tüsho inü tha, “ I ayokhe, I mülatsan, tümüde I a münküp mümüsühkhi mihtsürü ah, tüsho I a münküp mümüsühkhi mihtsürü bolung lah: tütüshe I müknü Wuto Atungpuh , kiulongthsüpuh ngüdo!”

⁶ Judüki seraph khülangnü kingaün sadam kheak yo mo kihkhi mokhih amüjipbenü shuhbah I kilim phinde arü.

⁷ Seraphnü I mün kheak junü qiu tüsho tha: “ Kheakü hanü nü münküpbo qiudo, nü mülimkhibo chamachihdo tüsho nü neak nankhita bahdo.”

⁸ Judüki Atungpuhnü athakhi düsheak inü so, “ Inü shepü yüshihba, tüsho isa thsungkheak shepü yüba?” Tüsho inü tha, “ I ha ching lah; I yüshang!”

⁹ Tüsho apinü tha, “ Yüang tüsho mihtsürübo ki ha thaang: Anibah, tüshe manikhit; akheahbah, tüshe mümükheah.

¹⁰ Ha mihtsürü lümkhi zhazhade kamshang, tüsho arü nükhünbo peangshang, tüsho arü mükbo yihdojang, junangde arünü arü mükbonü mükheah, tüsho arü nükhünbonü mani tüsho arü lümkhibonü manikhit, tüsho rholode müthsüngu.”

¹¹ Judüki inü tha, “ Külokhüh, O Atungpuh ?” Tüsho apinü tha, “ Kiutobo she mülade thsümünima lakhi tüsho thüyambo mihtsürü mülade, lomi shahde azhikkhi khiungde;

¹² Atungpuhnü mihbüm aban limshude yüshihkhi, tüsho lomi shahde abahyukkhi khiungde.

¹³ Thürü ching khülang aningning she, kheaküshe athsümünimbah, mudungsang yungsho ame wokhi nangde.” Müjih amüsüh ju hoju ame ah.