ISAIA 55 - AMÜSÜH HÜM CL Bible (BSI)

Thrünpuh Mihmüthsüm Jihkhi

¹ He, sherü kethürila, ke ching arang; tüsho nüsa sho mülarübo, arang, luang tüsho tsühang! Arang, yukhu tüsho niuhke adün müjihde luang.

² Tümüde nünü yikhap yungde püpü thsungkheak sho bahcho, tüsho reangmükeampü thsungkheak nünü rhimocho? Kümkangde I ki aniang, tüsho tümü atsüanü tsühang, tüsho birikhi tsühyungpü ching nü me asühang.

³ Nü nükhün muphoang, tüsho I kilim arang; aniang, junangde nü labah. Inü nü kheak akheam mülakhi tangzüng, inü muzhodakkhi, David thsungkheak tsükjide muzhokhi labah.

⁴ Kheahang, inü api ki mihtsürübo thiyumütsan thsüjihdo, limberü khülang tüsho mihtsürübo thsungkheak limthorü lah.

⁵ Kheahang, nünü mümükheahkhi trükshihbo nünü ajibah, tüsho nü mümükheahkhi trükshihbonü, Atungpuh , nü Thrünpuh, Israel Amüsüh Thrünpuh dünkheaknü nü kilim arübah; tümüde apinü nü müretahshih.

⁶ Api ngüpü lachoki Atungpuh yimang, api thüninde lachoki api ki jiang;

⁷ mihbukmuyuknü arü limro tüsho thiyuro mülarünü arü lümkhi bahyukshang; arünü Atungpuh kilim rholoshang, junangde apinü arü kheak mihmüthsüm labah, tüsho isa Thrünpuh kilim rholoshang, tümüde apinü suhdahde neak bahjihbah.

⁸ Tümüde I lümkhibo ju nü lümkhibo yung, yungsho nü limrobo ju I limrobo yung, Atungpuhnü thachoh.

⁹ Tümüde yinmibo ju alomi kheaknü achangbe, junangde I limrobo ju nü limrobo kheaknü achangbe tüsho I lümkhibo ju nü lümkhi kheaknü achangbe.

¹⁰ Tümüde tsüng tüsho phürüm thüning chingnü akichoh, tüsho alo müpangyi khiungde ju ching müyükihlo, bemusushihde tüsho mukhuhshihde, müjih-hiurü kilim müjih jihde tüsho atsührü kilim yikhap jihde,

¹¹ junangde I mün ching I yu wukhiukbah; I kilim akeangkeang malodarü tüshe I lümkhi akuk ngübah, tüsho inü thiyikhi ching kukzambah.

¹² Tümüde nü asühachihkhi ching wukhiukbah, tüsho mungtsü ching belodarübah; nü müngüh lakhi awungbo tüsho amujukbonü khün thsüde alanbah, tüsho thulu ching sangbo alalanü khah dambah.

¹³ Ayang müthri saipress sang asürübah; khingphu müthri martel sang asürübah; tüsho ha Atungpuh kilim mümihkhi khülang labah, tümüde akheam mülakhi amütsan khülang müdükheakshih.