ISAIA 53 - AMÜSÜH HÜM CL Bible (BSI)

¹ Isa yusheak shepünü akinkhea? Tüsho shepü ki Atungpuh khah akhiukkhea?

² Tümüde api müngüh api sangji nangde asürü, tüsho alo akung ching yo sangying nangde; isanü api kheak kheahpü thsüde api trungdung yungsho wüntre-müretah müla, api jakphü ching isanü api mürühpü thsüde tümü müla.

³ Api ju mihtsürübonü mükhemükim tüsho bahyuk; mulong tukthsü mihtsürü tüsho thsünümih lakheah; tüshe mihtsürübonü api kheaknü miro ramabah, api mükhemükim thsü, tüsho isanü api mükheyuk.

⁴ Tsükjide apinü isa thsünü arümdo tüsho isa tukthsü hando; tütüshe api a Thrünpuhnü ashikkhi, tüsho thsünüshihkhi nangde isanü lüm.

⁵ Tüshe isanü alakmihkhi thsungkheak api yuri, isa amülimbo thsungkheak zünak; api kheak thsümüchi hode isa khiukde kamshih, tüsho api mübo hode isa ngushih.

⁶ Isa alala namfimihnunubo nangde tsophülapdo; isa alala nihbuh limro rholodo, tüsho Atungpuhnü isa alala mülimkhibo api kheak zojih.

⁷ Api ajunokheah, tüsho api thsümüchido tütüshe apinü amün mükhimshuh; namfimihnunu alaksahpü bede ayükhi nangde, tüsho namfimihnunu khülang anam rhiprü miki zhikde alakhi nangde, apinü amün mükhimshuh.

⁸ Thsümüchide tüsho mahkhapde api bede tso. Shepünü api arübe-kuhi lümakheah-a laba? Tümüde rhangdung lakhi lomi chingnü api dükheakshih, I mihtsürünü alakmihkhi dün shik.

⁹ Apinü thiyih mubuka lalashe tüsho amün ching akeangyu mülalashe, Arünü api mibahpung ju mihbukmuyuk lung thsü tüsho api kiuyuk alarü lung thsü.

¹⁰ Tütüshe api thsünüde azünakpü ju Atungpuh lümkhi lakheah. Küyimki nünü api rhangdung neak dün kingaün jihbanü, apinü anihbuh tsührü ngübah tüsho api nimungbo thoshangbah; api hode Atungpuh lümkhi akuk ngübah.

¹¹ Api thsünükhi chingnü apinü ayin ngübah; api mükheahmudu hode api reangkeam ngübah. Thiyuro-lungki labuh, I yamlarünü ahihdo thiyuro-lungki kamshihbah tüsho apinü arü mülimkhibo hanbah.

¹² Jumonü inü ato bolung api ki shihcham jihbah tüsho sühmüh lakhi lung api ayankhikhi-kukruk chama jihbah; tümütüsho apinü anihbuh langzünü she tüsho alakmihrü lung kheyuk; tütüshe apinü ahihdo neak han tüsho alakmihrü thsungkheak tamkhüntamnü.