ISAIA 50 - AMÜSÜH HÜM CL Bible (BSI)

¹ Atungpuhnü ha thachoh: Inü nü be thiyia tsoshihkhi abah-hüm küching la? Yungsho inü nü yinkhi I sho putungpuh ju shepü a? Yung, nü neakbo dünkheaknü nü yinkheah, tüsho nünü alakmihkhibo dünkheak nü be tsoshihkheah.

² Tümüde I arüchoki she mülakhea? Tümüde inü ajichoki shenü malokhea? Mürhokhitkhukpü thsüde I khah kihla de? Yungsho abekhitpü I wu müla de? Inü thürühbah keto ngahshih, inü ayungbo loshelo kamshih; ke mülakhinü thüngühbo shuhabah tüsho kethürikhinü sheabah.

³ Inü thüningbo amürak phuyujih, tüsho shungliukhim arü mühiudobe kamshih.

Mihyuanikhi Atungpuh Yamlarü

⁴ Atungpuh Thrünpuhnü I kilim thsangyupü mulo khülang jih, junangde inü keaksahrü thiyu khülangnü reangzahshihpü mükheahbah. Yapsu aban apinü I yihmusuchoh– khürükhüh thsangyukhi anipü nangde I nükhün dukoshih.

⁵ Atungpuh Thrünpuhnü I nükhün khimshuhjih, tüsho inü mazhih, inü mutsolo.

⁶ Inü I shikrü kilim I düthsün jih, tüsho mükhühnam rukrü kilim I ngobo jih; inü mükhemükim tüsho mükeke mukhiukkhi chingnü I miro müjik.

⁷ Atungpuh Thrünpuhnü I rungchoh; jumonü I achih müngü; jumonü inü molaklung nangde I miro kheah, tüsho I achih müngü de inü mükheah;

⁸ shepünü I alim thsüjihchonü phünide lah. Shenü I ki azhihpü? Isa rukhüh zhipanü. I azhihrübo sherü a? Arü I ki arüshang.

⁹ I rungbuh ju A TU N GPU H T H RÜ NPU H lah; shenü I amülim jihpü? Arü alala khim nangde amürhütbah; arinü tsühabahbah.

¹⁰ Nüsa bolung shepünü Atungpuh trecho tüsho api yamlarü düsheak anicho, shepünü amiting ching tsahcho tüsho ayin müla, tütüshe Atungpuh mung ching kincho tüsho api Thrünpuh kheak düthsün angücho?

¹¹ Tüshe nüsa alala mo takkihrü, mozhuh takkihrü ah. Nü mo trukhi ching tüsho nünü atakkihkhi mozhuh bolung tsahang! Ha I khah chingnü nünü angübah: nü thsümütsü ching yapbah.