ISAIA 44 - AMÜSÜH HÜM CL Bible (BSI)

Atungpuh Lang Thrünpuh

¹ Tüshe kheakü aniang, O I yamlarü Jakob, inü mokhitkhi Israel!

² Atungpuhnü ha thachoh, shepünü nü thrünkhea, shepünü nü nuyam chingnü kamshihkhea tüsho nü rungpü la: Dütre, O I yamlarü Jakob, Jeshurun, shepü inü mokhitkhea.

³ Tümüde inü akung lo kheak ke dungkihbah, tüsho alo akung kheak yungzü lashihbah; inü nü tsühsoniuso kheak I me dungkihbah, tüsho nü münü kheak I müngühmühibo jihbah.

⁴ Arübo kesang nangde yungzü bukkhi miki sangdung nangde asürübah.

⁵ Khülangnü athabah, “ I Atungpuh yo,” püpü ju Jakob mungnü ajibah, kheaküshe püpü ju khah kheak thrütbah, “Atungpuh yo,” tüsho Israel mung jimulobah.

⁶ Atungpuhnü ha thachoh, Israel kiulongthsüpuh, tüsho api Rhokhitrü, Wuto Atungpuh : I atankih tüsho akheam; I hobah Thrünpuh she müla.

⁷ I nangde shepü la? Arünü zhiyukshang, arünü khipkhitshang tüsho I miki bede arüshang. Shepünü adüso chingnü adünjipü thakhea? Tümü dünjipü lanü arünü isa ki thashang.

⁸ Dajan, yungsho dütre; inü nü ki adüso chingnü mütha de yungsho mükhipkhit de? Nüsa I yumütsan thsürübo! I hobah püpü thrünpuh la shi? Ju ching Lung püpü müla; inü mükheahlah, she müla.

Sangthsü Kingaünkhi ju Makhakhi

⁹ Sangthsü thsürü alala tümü müla, tüsho arü asühkhi kukrukbo alü müla; arü thiyumütsanbo müngü yungsho mümükheah. Jumonü arübo achih ngüshihbah.

¹⁰ Shepünü nihbuh alü mülakhi thrünpuh yungsho sangthsü thsücho?

¹¹ Kheahang, ha kingaünrü alala achih ngüshihbah; keaklahrü she mihtsürü lang ah. Arü alala mukhungshang, arü zhipshang; arü treabahbah, arü achih ngüshihbah.

¹² Yingkingrünü ha thsüchoh tüsho mokhih kheaknü ha rhimochoh, yümlungnü yümarihchoh, tüsho api bin amürangnü hitchoh; api khümabahchoh tüsho asühmüh keakeade kamchoh, api kethürichoh tüsho keakabahchoh.

¹³ Sangrhimosorünü liu züngchoh, lungmüyenü thrütareakchoh, athsukbenü thsukarihchoh, yinchikheambonü nanarihchoh; apinü ju akheahakham mihtsürü nangde kingaünpung ching zopü thsüchoh.

¹⁴ Apinü cedar kiushakchoh yungsho saipress le thülamsang mokhitchoh tüsho murung ching sang bolung müküpde toshihchoh. Apinü tsünsang yangchoh tüsho tsüngnü dütsütmusuchoh.

¹⁵ Jushu mihtsürünü mokhih thsüpü kuklah. Ha chingnü apinü lubah nihbuh thüyüpchoh; apinü mo takkihchoh tüsho yikhap damchoh. Jushu apinü thrünpuh thsüchoh tüsho kingaünchoh, sangthsü khülang thsüchoh tüsho ju miki khukningchoh.

¹⁶ Sang chamkhüh apinü mo ching takchoh; chamkhüh mikheak apinü shih nguchoh, tsühchoh tüsho reangkeamchoh. Api nihbuh she thüyüpa luchoh tüsho thachoh, “Ah, I lamlamlah, inü mo ngülah!”

¹⁷ Aningkhinü apinü thrünpuh, api sangthsü thsüchoh, ju ki khukningchoh tüsho kingaünchoh; apinü tamkhüntamnü tüsho thachoh, “ I khümkhitang, tümüde nü I thrünpuh!”

¹⁸ Arünü mümükheah, yungsho arünü manikhit; tümüde arü mükji tuka lah, junangde arünü müngükhuk, tüsho arü lümkhibo she ah, junangde arünü manikhit.

¹⁹ Shenü mulong ching lümamükheah, yungsho mümükheahmudu yungsho anikhitde mütha, “Ha chamkhüh inü mo ching takdo; ha mokhihbo kheak inü yikhap she damdo, inü shih ngudo tüsho tsüh. Kheakü ha aningkhi inü athraneanbe kamshihba de? Inü sang-sümkhi miki khukningba de?”

²⁰ Apinü awahbo tsühchoh; rükaki lümkhinü api bephülapdo, tüsho apinü anihbuh mükhümkhitkhuk yungsho müthakhuk, “ I khah tsülim ching lakhi kukruk ha arükchih yung de?”

Atungpuh , Athrünrü tüsho Khümkhitrü

²¹ Harü lümkhitang, O Jakob, tüsho Israel, tümüde nü I yamlarü; inü nü kamshihkheah, nü I yamlarü; O Israel, nü inü mihamübah.

²² Nünü alakmihkhibo inü amo nangde wua bahdo tüsho nü neakbo shumuliu nangde bahjihdo; I kilim rholoang, tümüde inü nü rhokhitdo.

²³ Khün thsang O thüningbo, tümüde Atungpuhnü ha thsükheah; zhiang, O alomi asükbo; khün thsüde ahoang, O awungbo, O murung, tüsho ju ching sangdungbo! Tümüde Atungpuhnü Jakob rhokhitdo tüsho Israel ching müretahbah.

²⁴ Atungpuhnü rhokhitrünü ha thachoh, Shepünü nuyam chingnü kamshihkhea: I Atungpuh , shepünü alala thrünkhea, shepünü lang thüningbo züngshangkhea, shepünü I küdahnü alomi jashih;

²⁵ Shepünü akeangyu dünjipü müchitkhi yandoabahcho, tüsho kuhi-kheahrü makharü kamshihcho; shepünü lümlung larü rholoshihcho, tüsho arü mükheahmudu abünrü kamshih;

²⁶ shepünü api yamlarü yu mütsanmükhishih, tüsho api yunithsürünü müchitkhi dünjishih; shepünü Jirusalem dünkheak tha, “Ha ching mihtsürü labah,” tüsho Juda kiutobo dünkheak, “Arübo athsülobah, tüsho inü arü athsümünimkhi yihmusubah;”

²⁷ shepünü ke asük ki tha, “ Kungang– Inü nü yungbo kungshihbah”;

²⁸ shepünü Sairus dünkheak tha, “Api I mihnu neakrü, tüsho apinü I lümkhi alala rhimode ayübah;” tüsho shepünü Jirusalem dünkheak tha, “Ha athsülobah,” tüsho arüngyam dünkheak, “ Nü khimtan khimbah.”